រាជធានីភ្នំពេញ ៖ ក្នុងន័យជួយសម្រួលដល់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្មណាដែលរងគ្រោះដោយការព្យួរ ឬបន្ថយសកម្មភាពផលិតកម្ម ឬអាជីវកម្ម ទោះជាទីតាំងនោះប្រើអគ្គិសនីដែលផ្គត់ផ្គង់ដោយអគ្គិសនីកម្ពុជា ឬក៏ផ្គត់ផ្គង់ដោយឯកជនដែលទិញប្រភពអគ្គិសនីពីអគ្គិសនីកម្ពុជាក៏ដោយនឹងទទួលបានការអនុគ្រោះលើថ្លៃអគ្គិសនីរយៈពេល៥ខែ ចាប់ពីខែមិថុនា ដល់ខែតុលា ឆ្នាំ២០២០ ។ នេះបើយោងតាមក្រសួងរ៉ែ និងថាមពល ។
យោងតាមលិខិតរបស់ក្រសួងបានប្រកាសដាក់ឱ្យអនុវត្តន៍ផែនការអនុគ្រោះ និងលើកទឹកចិត្តចំពោះការប្រើប្រាស់អគ្គិសនីរបស់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្ម ចាប់ពីខែមិថុនា ដល់ខែតុលាឆ្នាំ២០២០ នេះបើតាមសេចក្តីប្រកាសរបស់ក្រសួងរ៉ែ និងថាមពល កាលពីជាងពាក់កណ្តាលខែឧសភាកន្លងទៅ ។
សេចក្តីប្រកាសដែលមានចុះហត្ថលេខាដោយលោក ស៊ុយ សែម រដ្ឋមន្ត្រីក្រសួងរ៉ែ និងថាមពលបាននិយាយថា « គោលដៅកែសម្រួលការបង់ថ្លៃប្រើប្រាស់អគ្គិសនីនេះ គឺដើម្បីជួយសម្រួលទាំងការលំបាកក្នុងការបង់ថ្លៃអគ្គិសនីរបស់ទីតាំងដែលមានបរិយាកាស អំណោយផលអាចបង្កើនសកម្មភាពផលិកម្ម ឬអាជីវកម្ម ក្នុងរយៈពេលអនុវត្តការណែនាំរបស់រាជរដ្ឋាភិបាលកម្ពុជាក្នុងការទប់ស្កាត់ការចំលងមេរោគកូដ១៩» ។
ចំពោះផែនការអនុគ្រោះនឹងលើកទឹកចិត្តចំពោះការប្រើប្រាស់អគ្គីសនីរបស់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្មពីខែមិថុនា ដល់ខែតុលា ឆ្នាំ២០២០ មានខ្លឹមសារដូចខាងក្រោម ៖
ទី១. ផ្តល់ការអនុគ្រោះលើកលែងការបង់ថ្លៃអគ្គិសនីតាម លក្ខខណ្ឌអប្បបរមា និងលើកលែងការបង់ថ្លៃតាមលក្ខខណ្ឌអានុភាព រួចអនុញ្ញាតឱ្យបង់ថ្លៃអគ្គិសនីត្រឹមតែចំនួនគីឡូវ៉ាត់ម៉ោង ដែលបានប្រើប្រាស់ជាក់ស្តែងតាមអត្រាថ្លៃមធ្យម ចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្ម ណាដែលរងគ្រោះដោយការព្យួរ ឬបន្ថយសកម្មភាពផលិតកម្ម ឬអាជីវកម្ម ទោះជាទីតាំងនោះប្រើអគ្គិសនីដែលផ្គត់ផ្គង់ដោយអគ្គិសនីកម្ពុជា ឬក៏ផ្គត់ផ្គង់ដោយអ្នកផ្គត់ផ្គង់ឯកជន ដែលទិញប្រភពអគ្គិសនីពីអគ្គិសនីកម្ពុជា ក៏ដោយ។
ទី២. រក្សាស្ថានភាពផ្គត់ផ្គង់ និងការបង់ថ្លៃអគ្គិសនីដូចមុន ដោយមិនមានការ កែប្រែចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្មណា ដែលមិនមានការប៉ះពាល់ធំដុំ អាចបន្តដំណើរការផលិតកម្ម ឬអាជីវកម្មរបស់ខ្លួនជាធម្មតាប្រហាក់ប្រហែលពេលមុន ។
ទី៣. ផ្តល់ការលើកទឹកចិត្តដោយបន្ថយថ្លៃអគ្គិសនីចំនួន២៥ភាគរយ លើការបង់ថ្លែអគ្គិសនីដែលបានប្រើលើសពីចំនួនប្រើប្រចាំខែមធ្យម ក្នុងរយៈពេល៣ខែ ដើមឆ្នាំ (ពីខែមករា ដល់ខែមីនា) ចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្មណា ដែលបរិយាកាសអំណោយផលអាចបង្កើនសកម្មភាពផលិតកម្ម ឬអាជីវកម្មរបស់ខ្លួន ជួយទប់ការថយចុះនៃសេដ្ឋកិច្ចក្នុងរយៈពេលអនុវត្តន៍ការណែនាំរបស់រាជរដ្ឋាភិបាលកម្ពុជា ក្នុងការទប់ស្កាត់ការចម្លងមេរោគកូវីដ១៩ ។
លោករដ្ឋមន្ដ្រីបានបញ្ជាក់ថា ផែនការអនុគ្រោះ និងលើកទឹកចិត្តចំពោះការប្រើប្រាស់អគ្គិសនីរបស់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្មពីខែមិថុនា ដល់ខែតុលា ឆ្នាំ២០២០ ដែលដាក់ឱ្យអនុវត្តន៍នៅក្នុងប្រកាសនេះមានវិសាលភាពអនុវត្តន៍លើការផ្គត់ផ្គង់អគ្គិសនីទាំងឡាយដែលយកប្រភពអគ្គិសនីពីបណ្តាញជាតិទាំងការផ្គត់ផ្គង់ដោយអគ្គីសកម្ពុជាផ្ទាល់ និងទាំងការផ្គត់ផ្គង់ដោយអ្នកកាន់អាជ្ញាប័ណ្ណបញ្ជូនរង ឬចែកចាយអគ្គិសនីឯកជន ។
ជាមួយគ្នានេះក្នុងប្រកាសលោករដ្ឋមន្ដ្រីបានបន្ដថា ការផ្តល់ការអនុគ្រោះលើកលែងការបង់ថ្លៃអគ្គិសនីតាមលក្ខខណ្ឌអប្បបរមា និងលើកលែងការបង់ថ្លៃតាមលក្ខខណ្ឌអានុភាព រួចអនុញ្ញាតឱ្យបង់ថ្លៃអគ្គិសនីត្រឹមតែចំនួនគីឡូវ៉ាត់ម៉ោង ដែលបានប្រើជាក់ស្តែង តាមអត្រាថ្លៃមធ្យម ចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្មណាដែលរងគ្រោះដោយ ការព្យួរ ឬបន្ថយសកម្មភាព ផលិតកម្ម ឬ អាជីវកម្ម គឺជាបន្ទុកផ្ទាល់របស់អ្នកផ្គត់ផ្គង់អគ្គិសនីនៃទីតាំងនីមួយៗ។
ការលើកទឹកចិត្តដោយបន្ថយថ្លៃអគ្គិសនីចំនួន ២៥ភាគរយ លើការបង់ថ្លៃអគ្គិសនីដែលបានប្រើ លើសពីចំនួនប្រើ ប្រចាំខែមធ្យមក្នុងរយៈពេល ៣ខែ ដើមឆ្នាំ (ពីខែមករា ដល់ខែមីនា) ចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្ម ដែលបរិយាកាសអំណោយផល អាចបង្កើនសកម្មភាពផលិតកម្ម ឬអាជីវកម្មរបស់ខ្លួន ជួយទប់ការថយចុះនៃសេដ្ឋកិច្ច ក្នុងរយៈពេលអនុវត្តការណែនាំរបស់រាជរដ្ឋាភិបាលកម្ពុជា ក្នុងការទប់ស្កាត់ការចម្លងមេរោគកូវីដ១៩ គឺជាបន្ទុករបស់អគ្គិសនីកម្ពុជា ទាំងក្នុងការផ្គត់ផ្គង់ដោយអគ្គិសនីកម្ពុជាផ្ទាល់ និងទាំងក្នុងការផ្គត់ផ្គង់ដោយអ្នកកាន់អាជ្ញាប័ណ្ណបញ្ចូនរង ឬចែកចាយអគ្គិសនីឯកជន ដែលយកប្រភពអគ្គិសនីពីអគ្គិសនីកម្ពុជា ៕
ចែករំលែកព័តមាននេះ