រាជធានីភ្នំពេញ ៖ យោងតាមលិខិតរបស់អគ្គនាយកដ្ឋានការងារនៃក្រសួងការងារនិងបណ្តុះបណ្តាលវិជ្ជាជីវៈ កាលពីថ្ងៃទី១៨ មីនា ឆ្នាំ២០១១ ចុះហត្ថលេខាដោយលោកសេង សក្កា ជម្រាបទៅប្រធានក្រុមហ៊ុនធី&ភី ដែលកោះសន្តិភាពទទួលបានឲ្យដឹងថា មជ្ឈមណ្ឌលនេះត្រូវបានប្រកាសឱ្យបិទជាបន្ទាន់ និងជាស្ថាពរ។
ក្នុងលិខិតដដែលបានបន្តថា អគ្គនាយកដ្ឋានការងារនៃក្រសួងការងារ និងបណ្តុះបណ្តាលវិជ្ជាជីវៈបានពិនិត្យឃើញថា ការគ្រប់គ្រងមជ្ឈមណ្ឌលណែនាំតម្រង់ទិសឈ្មោះ T&P Training Center របស់ក្រុមហ៊ុនធី&ភីខូអិល ធីឌី ស្ថិតនៅផ្ទះលេខ១១ ផ្លូវលេខ២៧១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ និងស្ថានភាពមជ្ឈមណ្ឌលនេះ មិនមានលក្ខណៈគ្រប់គ្រាន់អាចអនុញ្ញាតឲ្យបន្តដំណើរការតទៅទៀតបានឡើយ។ អាស្រ័យហេតុនេះ អគ្គនាយកដ្ឋានការងារកំណត់ឲ្យបិទដំណើរការមជ្ឈមណ្ឌលដែលមានឈ្មោះ និងអាសយដ្ឋានដូចខាងលើនេះ ជាបន្ទាន់ និងជាស្ថាពរចាប់ពីពេលនេះតទៅ ដោយត្រូវដោះស្រាយរាល់បញ្ហាជាប់ទាក់ទងឲ្យបានត្រឹមត្រូវចប់សព្វគ្រប់ចៀសវាងជះឥទ្ធិពលមិនល្អនានា ដែលកើតមានឡើងចំពោះកម្មករក៏ដូចជាផលវិបាកមិនល្អផ្សេងៗទៀតផងដែរ។
លិខិតអគ្គនាយកដ្ឋានការងារបានជម្រាបផងដែរថា មិនត្រូវឲ្យមានករណីមជ្ឈមណ្ឌលណាមួយនៅក្រោមឱវាទក្រុមហ៊ុនធី&ភី ខូអិលធីឌី មានការគ្រប់គ្រង និងស្ថានភាពមិនសមស្របបែបនេះទៀតឡើយចាប់ពីពេលនេះតទៅ។ ក្នុងករណីត្រូវរៀបចំបើកដំណើរការមជ្ឈមណ្ឌលថ្មីណាមួយត្រូវសហការ និងទទួលបានការយល់ព្រម និងការណែនាំជាមុនពីអគ្គនាយកដ្ឋានការងារដើម្បីធានាបានប្រសិទ្ធភាពខ្ពស់របស់មជ្ឈមណ្ឌល។ គួររំលឹកថា មជ្ឈមណ្ឌលធីអេនភី នេះបានផ្ទុះឡើងនូវរឿងរា៉វគួរឱ្យតក់ស្លុតមួយ ខណៈពលការិនីមួយរូបដោយសារតែនឹកកូនសុំច្បាប់មិនបាន ក៏លួចរត់ចុះតាមទុយោពីអគារកម្ពស់៤ជាន់រហូតធ្លាក់មកទើរលើដំបូលផ្ទះប្រជាពលរដ្ឋជិតខាង បណ្តាលឱ្យបាក់ជើងទាំង២ និងប៉ុន្មានថ្ងៃក្រោយមកពលការិនីម្នាក់ទៀតក៏បានស្លាប់នៅក្នុងទីតាំងមជ្ឈមណ្ឌលនោះដែរ៕
ចែករំលែកព័តមាននេះ