រាជធានីភ្នំពេញ ៖ ចំនួនភ្ញៀវទេសចរទាំងជាតិនិងបរទេសទៅលេងប្រាសាទព្រះវិហារបានថយចុះយ៉ាងខ្លាំងដោយសារតែបញ្ហាកូវីដ១៩។ នេះបើយោងតាមអ្នកនាំពាក្យរបស់ក្រសួងទេសចរណ៍បាននិយាយ ប្រាប់កោះសន្តិភាពនៅថ្ងៃទី១៥ ខែមិថុនានេះ។
លោក តុប សុភ័ក អនុរដ្ឋលេខាធិការ និងអ្នកនាំពាក្យក្រសួងទេសចរណ៍បានប្រាប់កោះសន្តិភាព នៅរសៀលថ្ងៃនេះថា «បន្ទាប់ពីប្រទេសកម្ពុជាមានវិបត្តិកូវីដ១៩ នេះមក មានតែទេសចរបរទេស ដែលកំពុងរស់នៅក្នុងប្រទេសទេ ដែលចេញដើរកម្សាន្ត។ ទេសចរអន្តរជាតិ (មកពីក្រៅ) ស្ទើរតែគ្មាន ប៉ុន្តែក្នុងខែមករា និងខែកុម្ភៈ ដើមឆ្នាំនេះ មានភ្ញៀវទេសចរបរទេសខ្លះ មកពីក្រៅស្រុកដែរ។
រយៈពេល៥ខែចុងក្រោយក្នុង ឆ្នាំ២០២០នេះ មានទេសចរបរទេសទៅទស្សនាប្រាសាទព្រះវិហារ ប្រមាណជាង៤ពាន់នាក់ ថយចុះ ជាង៦៦ភាគរយ បើធៀបនឹងរយៈពេលដូចគ្នាក្នុងឆ្នាំ២០១៩។
លោក សុភ័កបានបន្តទៀតថា សម្រាប់ភ្ញៀវជាតិមានជាង២ម៉ឺន៧ពាន់នាក់ ថយជាង៤៥ភាគរយ ធៀបនឹង៥ខែចុងក្រោយ ក្នុងឆ្នាំ២០១៩។
លោកបន្ថែមថា «នេះជាផលប៉ះពាល់ទូទៅគ្រប់កន្លែង ជាពិសេសអ្នកពឹងផ្អែកលើទេសចរណ៍ តែយ៉ាងណាប្រជាជនអាចរកចំណូលបានផ្សេងទៀតផងដែរ ដោយធ្វើការដាំដុះ កសិកម្មរបស់ខ្លួន»។
គួរំលឹកផងដែរថា ថ្ងៃទី១៥ ខែមិថុនា ឆ្នាំ២០២០នេះ ជាខួប៥៨ឆ្នាំ (១៥ មិថុនា ១៩៦២ – ១៥ មិថុនា ២០២០) ដែលតុលាការយុត្តិធម៌អន្តរជាតិ (ICJ) នាទីក្រុងឡាអេ ប្រទេសហុឡង់ បានសម្រេចឱ្យ កម្ពុជាឈ្នះក្តីជាមួយប្រទេសថៃ ក្នុងសំណុំរឿងប្រាសាទព្រះវិហារ ដែលតុលាការយុត្តិធម៌អន្តរជាតិ សម្រេចឱ្យកម្ពុជាជាម្ចាស់កម្មសិទ្ធិលើប្រាសាទព្រះវិហារ។
នៅលើផេកផ្លូវការរបស់សម្ដេតេជោ ហ៊ុន សែន បានសរសេរអបអរសាទរ ដែលគូសបញ្ជាក់ថា សម្តេចព្រះមហាវីរក្សត្រខ្មែរ ព្រះបរមរតនកោដ្ឋ ព្រះករុណា ព្រះបាទ សម្តេចព្រះ នរោត្តម សីហនុ បានបំពេញព្រះរាជបូជនីយកិច្ចយ៉ាងស្វិតស្វាញបំផុត ដើម្បីទាមទារប្រាសាទព្រះវិហារ រហូតដល់ យើងបានចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក ថ្ងៃទី៧ កក្កដា ឆ្នាំ២០០៨៕
ចែករំលែកព័តមាននេះ