រាជធានីភ្នំពេញ ៖ អតីតកញ្ញាឯកចក្រវាលកម្ពុជា ឆ្នាំ២០១៨ កញ្ញា រឿន ណាត កំពុងស្ថិតនៅក្នុងការពិភាក្សាពីថ្នាក់ដឹកនាំរបស់ខ្លួន ក្នុងគម្រោងចង់ឲ្យតារារូបនេះ អាចវិលមកកាន់ការប្រកួតប្រជែងផ្នែកសម្រស់ថ្នាក់អន្តរជាតិជាថ្មីឡើងវិញ បន្ទាប់ពីកញ្ញាទទួលបានការចាប់អារម្មណ៍ និងលេចធ្លោម្នាក់ផងដែរ នៅក្នុងការប្រកួតប្រជែងកាលពីពេលកន្លងទៅ។
រឿន ណាត ត្រូវបានគេរំពឹងថា នាងអាចនឹងមានឱកាសចូលរួមនៅក្នុងកម្មវិធីប្រកួតប្រជែងបរវកញ្ញាថ្នាក់អន្តរជាតិចំនួន២ធំៗមានដូចជា Miss International និង Miss Supranational ដែលកម្មវិធីទាំងពីរខាងលើនេះ ត្រូវបានគេគិតថា មានភាពសាកសមសម្រាប់រូបនាងខ្លាំង។
បើយោងតាមការបង្ហោះពីផេក Miss Cambodia បានឲ្យដឹងថា កញ្ញាឯកចក្រវាលកម្ពុជាឆ្នាំ២០១៨ នឹងទៅប្រកួតនៅលើឆាកអន្តរជាតិម្តងទៀត ដោយថ្មីៗនេះ National director របស់នាងកំពុងសម្លឹងមើលសមត្ថភាពនាង ថា តើរវាង Miss International និង Miss Supranational កម្មវិធីមួយណាដែលសាកសមនឹងនាង? ហើយតើអ្នកទាំងអស់គ្នាចង់ឃើញ រឿន ណាត ប្រកួតកម្មវិធីមួយណា? ហេតុអ្វី? តែសម្រាប់ផេក Miss Cambodia វិញ ចង់ឃើញនាងប្រកួត Miss Supranational ព្រោះចង់ឱ្យនាងក្លាយជាស្ត្រីខ្មែរដំបូងដែលចូលរួមប្រកួតកម្មវិធីហ្នឹង ហើយនាងក៏មានឱកាសខ្ពស់ដែរ ក្នុងការទទួលបានម្កុដ Miss Supranational ផងដែរ។
ដោយឡែកពាក់ព័ន្ធទៅនឹងបញ្ហាខាងលើនេះដែរ កញ្ញា រឿន ណាត បញ្ជាក់ប្រាប់កោះសន្តិភាពតាមសារអេឡិចត្រូច នៅថ្ងៃទី១៥ ខែមិថុនា ឆ្នាំ២០២០នេះថា ចំពោះបញ្ហានេះ គឺប្រធានក្រុមហ៊ុន និងប្រិយមិត្តគាំទ្ររបស់នាងជាច្រើនមានបំណងចង់ឲ្យនាងទៅចូលរួមប្រកួតប្រជែងសារជាថ្មីឡើងវិញ។
នាងបញ្ជាក់ថា សម្រាប់នាងក៏ចង់ចូលរួមប្រកួតម្តងទៀតផងដែរ ព្រោះជាឱកាសម្រាប់នាងបញ្ចេញសមត្ថភាពជាថ្មី ក្នុងពេលការប្រកួតកន្លងមក គឺជាការចូលរួមដំបូងបំផុតសម្រាប់រូបនាង ហើយអ្វីៗសុទ្ធតែថ្មីសម្រាប់នាង ដែលធ្វើឲ្យនាងមិនអាចធ្វើបានល្អ។ ប៉ុន្តែប្រសិនបើមានឱកាសជាថ្មីឡើងវិញពិតមែននោះ នាងនឹងខិតខំពង្រឹងសមត្ថភាពឲ្យខ្លាំងជាងមុន ព្រោះដោយយើងធ្លាប់មានបទពិសោធន៍ចូលរួមប្រកួតម្តងរួចហើយ ហេតុនេះអ្វីៗយើងអាចដឹងច្រើន និងអាចត្រៀមខ្លួនបានល្អជាងមុនផងដែរ។
យ៉ាងណា បើតាម រឿន ណាត សម្រាប់កម្មវិធីប្រកួតប្រជែងទាំងពីរខាងលើនេះ នាងមានការចាប់អារម្មណ៍ទាំងពីរ ប៉ុន្តែមានប្រិយមិត្តគាំទ្រនាងជាច្រើនចង់ឃើញនាងចូលរួមប្រកួតក្នុងកម្មវិធី Miss Supranational ជាង ព្រោះកន្លងមក កម្មវិធីនេះមិនមាននារីខ្មែរណាម្នាក់បានចូលរួមប្រកួតនោះឡើយ។ ហេតុនេះ ប្រសិនបើនាងមានឱកាសចូលរួមក្នុងកម្មវិធីនេះមែន នោះអាចចាត់ទុកថា នាងជានារីខ្មែរទី១ បង្អស់ ដែលបានចូលរួមក្នុងការប្រកួតប្រជែងក្នុងកម្មវិធីនេះ ខណៈពេលថ្នាក់ដឹកនាំរបស់នាងក៏មានបំណងចង់ឲ្យនាងចូលរួមនៅក្នុងកម្មវិធីនេះផងដែរ។
ទោះជាយ៉ាងណា រឿន ណាត បានអះអាងបន្ថែមថា សម្រាប់គម្រោងខាងលើនេះ គឺនៅមិនទាន់ច្បាស់នៅឡើយទេ ព្រោះអ្វីៗស្ថិតនៅក្នុងគម្រោង និងការពិភាក្សាគ្នានៅឡើយ ហើយរហូតមកទល់ពេលនេះ នាងក៏មិនទាន់បានដឹងនៅឡើយទេថា រូបនាងនឹងអាចមានឱកាសបានចូលរួមនៅក្នុងកម្មវិធីណាមួយ នៅក្នុងចំណោមកម្មវិធីទាំងពីរខាងលើនេះ។
គួរបញ្ជាក់ថា កញ្ញា រឿន ណាត បានទទួលនូវការសរសើរពីមហាជនក៏ដូចជាអ្នកគាំទ្រ ក្នុងពេលដែលនាងបានបង្ហាញឈុតតំណាងជាតិអមដោយផែនទីព្រះរាជណាចក្រកម្ពុជាក្នុងព្រឹត្តិការណ៍ប្រកួតបវរកញ្ញាចក្រវាលឆ្នាំ២០១៨ នៅប្រទេសថៃ កាលពីពេលកន្លងទៅ។
ឈុតប្រពៃណីជាតិដែលបង្ហាញពីកម្ពុជា និងអត្តសញ្ញណជាតិនេះកញ្ញា រឿន ណាត បានធ្វើឱ្យលេចអណ្តែតយ៉ាងស្រស់ស្អាតលើឆាកព្រឹត្តិការណ៍ប្រកួតបវរកញ្ញាចក្រវាលឆ្នាំ ២០១៨ អមដោយសំលេងគាំទ្រក្នុងព្រឹត្តិការណ៍ ព្រមទាំងប្រជាជនខ្មែរផងដែរ។
ទោះជាយ៉ាងណាក្តី បើទោះជាបវរកញ្ញាតំណាងប្រទេសកម្ពុជាកញ្ញា រឿង ណាត មិនបានជាប់ចូលក្នុង Top 20 ក្តី ក៏ប៉ុន្តែនាងបានខិតខំយ៉ាងអស់ពីសមត្ថភាពក្នុងការប្រកួតប្រជែងនេះ ដែលធ្វើឲ្យគ្រប់គ្នាលាន់មាត់សរសើររូបនាង គ្រប់ៗគ្នាតែម្តង។ យ៉ាងណា បន្ទាប់ពីបញ្ចប់បេសកកម្មភាពប្រកួតប្រជែងលើឆាកអន្តរជាតិនេះរួចមក រឿន ណាត ស្រីស្អាតសម្រស់លេចធ្លោពីធម្មជាតិ កំពុងមានប្រជាប្រិយភាពខ្ពស់នាពេលបច្ចុប្បន្ន ក្នុងអាជីពសិល្បៈ ដោយនាងអាចបញ្ចេញសមត្ថភាពយ៉ាងប៉ិនប្រសប់ក្នុងការសម្តែង និងហាក់មមាញឹកយ៉ាងខ្លាំងក្នុងវិស័យសិល្បៈសម្តែងជាខ្លាំងដែលស្ទើរតែគ្មានពេលសម្រាក៕ (កែសម្រួលដោយ ៖ បុប្ផា)
ចែករំលែកព័តមាននេះ