អតីតហ៊្វ្រេសស៊ីលេខ១ សុខ វិច្ឆរ៉ា ហេតុអ្វីមិនលេចមុខក្នុងពិភពសិល្បៈ?
- ភ្នំពេញ
រាជធានីភ្នំពេញ ៖ រាងតូចស្រឡូន សម្បុរខ្មៅស្រឯម ញញឹមស្រស់ស្រាយ គឺយុវតីសុខ វិច្ឆរ៉ា ជាហ៊្វ្រេសស៊ីហ្គើលចំណាត់ថ្នាក់លេខ១ ប្រចាំឆ្នាំ២០១៧ ។…
រាជធានីភ្នំពេញ ៖ រាងតូចស្រឡូន សម្បុរខ្មៅស្រឯម ញញឹមស្រស់ស្រាយ គឺយុវតីសុខ វិច្ឆរ៉ា ជាហ៊្វ្រេសស៊ីហ្គើលចំណាត់ថ្នាក់លេខ១ ប្រចាំឆ្នាំ២០១៧ ។…
រាជធានីភ្នំពេញ ៖ រាងតូចស្រឡូន សម្បុរខ្មៅស្រឯម ញញឹមស្រស់ស្រាយ គឺយុវតីសុខ វិច្ឆរ៉ា ជាហ៊្វ្រេសស៊ីហ្គើលចំណាត់ថ្នាក់លេខ១ ប្រចាំឆ្នាំ២០១៧ ។ វិច្ឆរ៉ា មាននិស្ស័យចូលចិត្តសិល្បៈ ប៉ុន្តែតើហេតុអ្វី នាងមិនល្បីឈ្មោះក្នុងពិភពសិល្បៈដូចជាហ៊្វ្រេសស៊ីជាច្រើនទៀត ?
សិល្បៈចម្រៀង និងសម្តែងភាពយន្ត គឺជាប្រភេទសិល្បៈដែលយុវតីសុខ វិច្ឆរ៉ា មាននិស្ស័យចូលចិត្ត ។ នាងមានទឹកដមសំឡេងពីរោះ និងមានទេពកោសល្យសម្តែងល្អ ។ កាលពីពេល ថ្មីៗកន្លងមក យុវតីស្អាតរូបនេះនិយាយថា «ខ្ញុំចូលចិត្តច្រៀង និងសម្តែងកាយវិការ វាជាអ្វីដែលខ្ញុំអាចធ្វើបានពីធម្មជាតិ ។ ខ្ញុំរឹតតែមានទេពកោសល្យ និងយល់ដឹងខ្លាំងឡើងពីសិល្បៈទាំងនេះនៅពេលចូលរួមប្រកួតហ៊្វ្រេសស៊ី ព្រោះកម្មវិធីតម្រូវឲ្យហ្វឹកហាត់សិល្បៈច្រើនទម្រង់ មានផ្នែករបាំបុរាណ ចម្រៀង និងសិល្បៈបង្ហាញម៉ូដជាដើម »។
ក្តីស្រមៃធំមួយរបស់សុខ វិច្ឆរ៉ា គឺកសាងជីវិតជាតារាចម្រៀង តារាភាពយន្ត និងតារាបង្ហាញម៉ូដ ។ នាងចង់ប្រើប្រាស់ទេពកោសល្យ និងក្តីស្រលាញ់សិល្បៈទាំងនោះចាប់ជាអាជីព ដើម្បីចិញ្ចឹមជីវិត និងដើម្បីកេរ្តិ៍ឈ្មោះ ។
ទោះជាយ៉ាងណាក្ដី សុខ វិច្ឆរ៉ា មិនអាចបំពេញក្តីស្រមៃរបស់ខ្លួននោះបាន គឺនាងហាក់នៅឆ្ងាយពីសិល្បៈ ។ មូលហេតុ ព្រោះពីដំបូងនាងត្រូវចំណាយពេលច្រើនយកចិត្តទុកដាក់លើការសិក្សា ។ ក្រោយមកនាងត្រូវធ្វើការផ្សេង ដើម្បីរកប្រាក់កម្រៃផ្គត់ផ្គង់ជីវភាពផ្ទាល់ខ្លួន និងគ្រួសារ ។
កន្លងមកក៏ធ្លាប់មានផលិតកម្មមួយចំនួនដែរទាក់ទងសុខ វិច្ឆរ៉ា ឲ្យចូលរួមសម្ដែង តែនាងមិនអាចលៃពេលបាន គឺនាងត្រូវធ្វើការងារក្រៅសិល្បៈជាចាំបាច់ ដើម្បីជីវភាពគ្រួសារ ។ មិត្តភក្តិរួមថ្នាក់ និងក្រុមគ្រួសារសុទ្ធតែដឹង សុខ វិច្ឆរ៉ា មាននិស្ស័យ និងទេពកោសល្យសិល្បៈ ។ មិត្តរួមថ្នាក់សរសើរថា វិច្ឆរ៉ា ច្រៀងពីរោះណាស់ ។
មិត្តម្នាក់និយាយថា «វិច្ឆរ៉ា ច្រៀងពីរោះពីធម្មជាតិ ទឹកដមសំឡេងរបស់នាងសក្តិសមជាតារាចម្រៀង ។ នាងអាចប្រើប្រាស់ទឹកដមសំឡេងជាអាជីពបាន » ។
ទាំងក្រុមគ្រួសារ ទាំងមិត្តភក្តិ គាំទ្រសុខ វិច្ឆរ៉ា ចំពោះគោលដៅអនាគតសាងជីវិតជាអ្នកសិល្បៈ ។ ពួកគេជឿជាក់នាងនឹងបានសម្រេចសមតាមបំណង ។
ទាំងទឹកមុខញញឹម យុវតីដ៏ស្រស់ផូរផង់សុខ វិច្ឆរ៉ា និយាយរាបសាថា «ខ្ញុំប្រាថ្នាចង់ឲ្យមហាជនស្គាល់មុខ និងឈ្មោះសុខ វិច្ឆរ៉ា ទៅទីណា ឬអ្នកណាក៏ស្គាល់ ។ នាមជាតារាល្បី ជាអ្វីដែលខ្ញុំចង់ឲ្យកើតឡើងសម្រាប់ជីវិតរបស់ខ្ញុំ ។ ទោះជាយ៉ាងណាក្ដី ខ្ញុំជាប់ធ្វើការងារផ្សេង មិនទាន់អាចដកឃ្លាបាន តែខ្ញុំចង់ណាស់ ហើយសង្ឃឹមធ្វើបាននាថ្ងៃណាមួយ»។
មិនលេចមុខខ្លាំងក្នុងពិភពសិល្បៈ តែសុខ វិច្ឆរ៉ា ធ្លាប់ចូលរួមច្រៀងលើឆាកតន្ត្រីទូរទស្សន៍ និងក្នុងកម្មវិធីកម្សាន្តផ្សេងទៀតរបស់ទូរទស្សន៍ ខ្លះៗដែរនាពេលកន្លងមក ។ ពិសេសបន្ទាប់ពីគ្រងតំណែងជាហ៊្វ្រេសស៊ីហ្គើលចំណាត់ថ្នាក់លេខ១ ភ្លាម នាឆ្នាំ២០១៧ សុខ វិច្ឆរ៉ា តែងតែឆ្លៀតពេលពីការសិក្សាចូលរួមសម្តែងឈុតផ្សាយពាណិជ្ជកម្ម និងកម្មវិធី ផ្សេងៗតាមតម្រូវរបស់ក្រុមហ៊ុនដែលរៀបចំប្រកួតហ្វ្រេស៊ី ។ ឈុតផ្សាយពាណិជ្ជកម្មមួយចំនួនដែលវិច្ឆរ៉ា ចូលរួមសម្តែងបានចាក់ផ្សាយតាមកញ្ចក់ទូរទស្សន៍នានា ដែលទស្សនិកជនធ្លាប់ឃើញរួចមកហើយ ។
យុវតីស្អាតរូបនេះចាប់កំណើត និងរស់នៅភ្នំពេញ ។ នាងជាកូនពៅក្នុងចំណោមបងប្អូនចំនួន៥នាក់ ។ ដោយឳពុកបង់ជីវិតទៅហើយ វិច្ឆរ៉ា រស់នៅជាមួយម្តាយ និង បងៗរបស់នាង ៕ (កែសម្រួលដោយ ៖ បុប្ផា)
ចែករំលែកព័តមាននេះ