ខេត្តកំពង់ឆ្នាំង ៖ ក្រៅពីផលិតចំណី ដើម្បីបំប៉នសត្វគោ ម្ចាស់កសិដ្ឋាន មានទីតាំងនៅភូមិស្វាយផ្អែម ឃុំស្វាយជុក ស្រុកសាមគ្គីមានជ័យ នៅបានដាំស្មៅ ដែលនាំចូលពីបរទេសមកដាំលើផ្ទៃដីជាង ៧ហិកតា ដើម្បីធ្វើជាចំណីដល់សត្វគោបន្ថែមទៀតសម្រាប់ការធំធាត់របស់សត្វគោឲ្យបានលឿន ។
លោក យុត រដ្ឋា អ្នកឯកទេសដាំស្មៅនៅក្នុងកសិដ្ឋានខាងលើបានឲ្យដឹងថា ៖ តាមពិតកសិដ្ឋានខាងលើនេះ មានម្ចាស់ឈ្មោះ រស់ វិសុទ្ធ នៅរាជធានីភ្នំពេញ រូបគាត់គ្រាន់តែជំនាញដាំស្មៅតែប៉ុណ្ណោះ គឺក្នុងរយៈពេល៣ទៅ៤ឆ្នាំមកហើយ ដែលគាត់បានមកដាំស្មៅ នៅក្នុងកសិដ្ឋានមួយនេះ ។ ស្មៅដែលគាត់បានដាំ គឺបាននាំពូជមកពីបរទេសមានដូចជា ពូជស្មៅផ្អែមអ៊ីស្ត្រាអែល និងពូជស្មៅស៊ុបពឺណេតពែ ។
ចំពោះពូជស្មៅ ផ្អែមអ៊ីស្ត្រាអែល គឺយើងដាំក្នុងរយៈពេល៤៥ ថ្ងៃ គឺបានផលអាចកាត់ឱ្យគោស៊ីបានហើយ ។ ដោយឡែកចំពោះពូជស្មៅស៊ុបពឺណេតពែ គឺមានអាយុដល់ទៅ១០០ថ្ងៃ ទើបអាចកាត់យកមកផ្អាប់ រួចឱយគោស៊ីបាន ។ ប៉ុន្តែពូជស្មៅប្រភទនេះ បន្ទាប់ពីយើងកាត់លើកទី១ ដែលមានអាយុ១០០ថ្ងៃនេះហើយ នៅពេលកាត់លើកក្រោយៗ ទៀត គឺត្រឹមតែ៤៥ថ្ងៃ យើងអាចកាត់វាបានហើយ ព្រោះវាធំលឿននឹងដុះស្លឹកបានល្អ ។
លោក យុត រដ្ឋា បានបន្ថែមថា ៖ បច្ចុប្បន្នម្ចាស់កសិដ្ឋានបានឱ្យចំណីដែលផលិតដោយខ្លួនឯងដល់សត្វគោ ដែលទិញមកបំប៉នសម្រាប់លក់ក្នុង១ថ្ងៃចំនួន២ពេល ។ ប៉ុន្តែសម្រាប់ស្មៅដែលដាំដុះក្នុងកសិដ្ឋាននេះ គឺកាត់ឲ្យគោស៊ីតែមួយពេលប៉ុណ្ណោះ ក្នុង១មួយថ្ងៃ មានន័យថា ៖ បើពេលព្រឹកឲ្យគោស៊ីស្មៅហើយ ព្រឹកនោះមិនឲ្យចំណីដែលផលិតនោះទៀតទេ ល្ងាចបានឱ្យចំណីវាស៊ីម្តងទៀត ។
សូមបញ្ជាក់ដែរថា ម្ចាស់កសិដ្ឋានខាងលើទទួលបានជោគជ័យក្នុងការទិញគោស្គមៗ បាក់កម្លាំង ឬក៏ឲ្យចំណីមិនគ្រប់គ្រាន់យកមកបំប៉នដោយឱ្យចំណីដែលផលិតបានដោយខ្លួនឯង និងឱ្យស្មៅដែលដាំដោយខ្លួនឯង ដល់គោទាំងនោះក្នុងរយៈពេលតែ ៣ទៅ ៤ខែ គោបានធំធាត់ អាចចាប់លក់បានហើយ ដោយក្នុង១ខែជាមធ្យម កសិដ្ឋានខាងលើ អាចលក់គោដែលបំប៉នបានធំធាត់ជាង៣០ក្បាល ៕
ចែករំលែកព័តមាននេះ