ខេត្តកំពង់ចាម ៖ វត្តភ្នំហាន់ជ័យត្រូវបានគេចាត់ទុកជាវត្តមានបារមីស័ក្ដិសិទ្ធិ ស្ថិតនៅប្របតាមដង ទន្លេមេគង្គ ក្នុងឃុំហាន់ជ័យ ស្រុកកំពង់សៀម។ នាព្រឹកថ្ងៃទី១៣ មិថុនា ២០២០…
ខេត្តកំពង់ចាម ៖ វត្តភ្នំហាន់ជ័យត្រូវបានគេចាត់ទុកជាវត្តមានបារមីស័ក្ដិសិទ្ធិ ស្ថិតនៅប្របតាមដង ទន្លេមេគង្គ ក្នុងឃុំហាន់ជ័យ ស្រុកកំពង់សៀម។ នាព្រឹកថ្ងៃទី១៣ មិថុនា ២០២០ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពុងចាម បានរៀបចំចំរើនព្រះជន្មថ្វាយ សម្ដេចព្រះមហាក្សត្រី នរោត្ដម មុនីនាថសីហនុ ព្រះវររាជមាតាជាតិខ្មែរ គម្រប់៨៤យាងចូល៨៥ព្រះ វស្សា។ នាឱកាសនោះមានការចូលរួមពីសំណាក់ប្រធានមន្ទីរនានាជុំវិញខេត្ត លោកតាលោកយាយ សមាជិការរដ្ឋសភា និងព្រឹទ្ធសភា ម្នាក់ៗសុទ្ធតែបានពាក់ម៉ាស់ ដើម្បីការពារបង្ការកុំឲ្យឆ្លងជំងឺកូវីដ-១៩ ផងដែរ។
លោកស្រី សុភ័ក្រ ប្រធានមន្ទីរធម្មការ និងសាសនាខេត្ត បានគូសបញ្ជាក់ថា ស្របពេលដែលពិភពលោក កំពុងតែទទួលរង និងការរីករាលដាលនៃជំងឺកូវី-១៩ ប្រមុខរាជរដ្ឋា ភិបាលកម្ពុជា បានណែនាំឱ្យរាល់កម្មវិធីប្រជុំនានាត្រូវកាត់បន្ថយចំនួនអ្នកចូលរួម។ ជាក់ស្ដែងនៅក្នុង កម្មវិធីចម្រើនព្រះជន្មសម្ដេចយាយ បានរៀបចំនៅភ្នំហាន់ជ័យនេះ ដោយចំនួនអ្នកចូលរួមត្រូវបាន កាត់បន្ថយដើម្បីបង្ការកុំឲ្យឆ្លងជំងឺ។
ឯកឧត្តម អ៊ុន ចាន់ដា អភិបាលនៃគណៈអភិបាលខេត្តមានប្រ សាសន៍ដោយគូសបញ្ជាក់ថា៖ កន្លងទៅព្រះមេគណខេត្ត ប៊ត តាំងឆេង បានចាត់ឱ្យមន្ត្រីសង្ឃចូលរួម យ៉ាងផុលផុសដោយនាំបច្ច័យជូនគណៈកម្មការប្រយុទ្ធប្រឆាំង និងជំងឺកូវី-១៩។ ជាមួយនោះដោយ មានការយកចិត្តទុកដាក់ពីសំណាក់ក្រុមគ្រូពេទ្យបានធ្វើអោយអ្នកជំងឺកូវីដ-១៩ ចំនួន១៦នាក់ បានជាសះស្បើយទាំងអស់។ ឯកឧត្តម អ៊ុន ចាន់ដា អភិបាលខេត្ត មានប្រសាសន៍បន្តថា ក្នុងឱកាសព្រះរាជពិធីបុណ្យចម្រើនព្រះជន្មគម្រប់៨៤យាងចូល៨៥ព្រះវស្សា សម្ដេចព្រះមហាក្សត្រីនរោត្ដម មុនិនាថ សីហនុ ព្រះវររាជមាតាជាតិខ្មែរក្នុងសិរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា ដែលនឹងប្រព្រឹត្តទៅនាថ្ងៃទី១៨ មិថុនា ២០២០ ខាងមុខ។
ក្នុងនាមគណៈកិត្តិយសសមាជិកសមាជិកាគណៈកម្មាធិការសាខា អនុសាខា មន្ត្រីប្រតិបត្តិ យុវជន អ្នកស្ម័គ្រចិត្តកាកបាទក្រហមកម្ពុជា ទូទាំងខេត្តកំពង់ចាម សូមព្រះបរមរាជានុញ្ញាត ក្រាបបង្គំសម្ដែងថ្វាយនូវព្រះសព្វសាធុកាពរ បវរសួស្ដី សិរីវឌ្ឍនា វិបុលសុខ គ្រប់ប្រការ សូមសម្ដេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហម កម្ពុជា ជាទីសក្ការៈដ៏ខ្ពង់ខ្ពស់បំផុតសូមមានព្រះរាជរាជបុត្រភាពល្អបរិបូរណ៍ ព្រះបញ្ញាញាណភ្លឺថ្លា ព្រះកាយពលរឹងមាំ និងមានព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ ដល់ប្រជារាស្ត្រ ជាកូន ចៅ ចៅទួត ជារៀងដរាបតទៅ។
បន្ទាប់ពីព្រះមេគណខេត្ត ប៊ត តាំងឆេង និងព្រះសង្ស៧អង្គទៀត បានសូត្រពុទ្ធជ័យមង្គលចម្រើនព្រះបរិត្តទៅតាមទំនៀមទម្លាប់ប្រពៃណី សាសនារួចមកឯកឧត្តម អ៊ុន ចាន់ដា និងលោកជំទាវ ព្រមទាំងថ្នាក់ដឹកនាំខេត្ត បានអញ្ជើញវេភត្តហារ ប្រគេនព្រះសង្ឃចំនួន ៧អង្គ ដោយមួយអង្គៗទទួលបានចង្ហាន់១ស្រាក់ ផ្លែឈើ១កន្ត្រក សាដក១ និងបច្ច័យចំនួន៥ម៉ឺនរៀល ដោយឡែកព្រះចៅអធិការវត្តបច្ច័យ២០ម៉ឺនរៀល។
យាយជីតាជី៨៥នាក់ ម្នាក់ៗទទួលបានថវិកា២ម៉ឺនរៀល។ សម្រាប់វត្តជ័យគីរីហៅវត្តភ្នំហាន់ជ័យ ឯកឧត្តមអភិបាលខេត្ត និងលោកជំទាវបានប្រគេនអង្ករ ២៥០គីឡូក្រាម មីជាតិ១០កេស ត្រីខ១២០កំប៉ុង ទឹកក្រូច១០កេស ទឹកសុទ្ធ១០កេស និងបច្ច័យ១លានរៀល។ បន្ទាប់មកថ្នាក់ដឹកនាំខេត្តបានអញ្ជើញចុះពិនិត្យការសាងសង់ស្ពានបេតុងនៅជើងភ្នំហាន់ជ័យ ជាមួយនោះឯកឧត្តមអភិបាលខេត្ត ក៏បានឲ្យក្រុមសាងសង់ស្ពាន ជួយពន្លឿនការសាងសង់ ដើម្បីឲ្យប្រជាពលរដ្ឋបានធ្វើដំណើរក្នុងពេលខាងមុខដ៏ឆាប់មុនទឹកទន្លេហូរចូលព្រែក៕ ដោយ ៖ យ៉ាន់ ចាន់ថេត
ចែករំលែកព័តមាននេះ