កម្ពុជាត្រូវបានចាត់ទុកថា ជាប្រទេសមួយជោគជ័យនៅក្នុងការប្រឆាំងកូវីដ១៩ រហូត មកដល់ពេលនេះ ដោយសារតែការព្យាបាលជាស្ទើរទាំងអស់ និងគ្មានអ្នកស្លាប់ដោយ សារមេរោគដ៏សាហាវនេះឡើយ រហូតមកដល់ពេលនេះ។
ប៉ុន្តែការវិវត្តរយៈពេលក្រោយនេះ ទំនងជាចង្អុលបង្ហាញថា កម្ពុជានៅតែប្រឈមមុខខ្ពស់នឹងការរាលដាលមេរោគកូវីដ១៩ ដែលបានឆ្លងដល់មនុស្សជិត៨លាននាក់ និងសម្លាប់មនុស្សជាងបួនសែននាក់ក្នុងពិភពលោក។
ការប្រឈមមុខខ្លាំង គឺការនាំចូលជំងឺកូវីដ១៩ មកពីខាងក្រៅ ខណៈដែលការធ្វើ ដំណើរតាមយន្តហោះ មកកម្ពុជា ហាក់ដូចជាកម្រើកឡើងវិញ។
ក្រសួងសុខាភិបាលបានអោយដឹងនៅថ្ងៃទី១៤ ខែមិថុនា ឆ្នាំ២០២០ថា ខ្លួនបានរក ឃើញអ្នកឆ្លងជំងឺកូវីដ១៩ ចំនួន២ថ្មីបន្ថែមទៀត។
ដូច្នេះរហូតមកដល់ពេលនេះ អ្នកឆ្លងជំងឺកូវីដ១៩ មានចំនួន១២៨នាក់ អ្នកជាសះស្បើយមានចំនួន១២៥នាក់ នៅសល់៣នាក់កំពុងសម្រាកព្យាបាលនៅមន្ទីរពេទ្យ។
បុរសដែលឆ្លងជំងឺកូវីដ១៩ ជាជនជាតិខ្មែរ មានអាយុ 29 ឆ្នាំ និងបុរសជនជាតិខ្មែរមាន អាយុ២២ឆ្នាំ មានអាសយដ្ឋាននៅខេត្តកំពង់ចាម។ ទាំងពីរនាក់បានធ្វើដំណើរពីប្រទេសឥណ្ឌូនេស៊ី តាមជើងហោះហើរត្រង់មកកាន់ប្រទេសកម្ពុជា នៅថ្ងៃទី 12 ខែមិថុនា ឆ្នាំ 2020 ហើយបច្ចុប្បន្នអ្នកទាំងពីរត្រូវបានដាក់ឲ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀតរួចហើយ។
ក្រសួងបាន កត់សម្គាល់ថា ជើងហោះហើរនេះ មានអ្នកដំណើរសរុបចំនួន ៤៦នាក់ (ស្រី២៤នាក់) ហើយក្នុងចំនួននេះ មានជនជាតិខ្មែរចំនួន ៤២នាក់ (ស្រី២២នាក់) និងជនជាតិឥណ្ឌូណេស៊ីចំនួន ០៤នាក់ (ស្រី០២នាក់ ហើយក្នុងនោះមានកុមារីអាយុ៤ឆ្នាំ ម្នាក់)។
អ្នកដំណើរចំនួន ៤៤ នាក់ ដែលមានលទ្ធផល តេស្តអវិជ្ជមានវីរុសកូវីដ-១៩ នោះ ត្រូវបានដាក់នៅមណ្ឌលចត្តាឡីស័កជម្ពូវ័ន១ មណ្ឌលចត្តាឡីស័កនៅ តាមបណ្តាខេត្ត ដែលបុគ្គលរស់នៅ (សម្រាប់អ្នកដែលមិនមានលទ្ធភាពបង់ថ្លៃសណ្ឋាគារ ) និង សណ្ឋាគារមួយក្នុងទីក្រុងភ្នំពេញ (សម្រាប់អ្នកដែលជ្រើសរើសយក ការបង់ ថ្លៃសណ្ឋាគារ ដើម្បីតាមដានសុខភាពបន្តទៀត។
ដូច្នេះ វានៅមិនប្រាកដនៅឡើយថា តើពួកគេនឹងមានឆ្លងមេរោគកូវីដ ១៩ ដូច បុរសពីរនាក់នៅខេត្តកំពង់ចាម នោះឬក៏អត់ ខណៈដែលពួកគេបានធ្វើដំណើរលើយន្តហោះតែមួយ។
ការរកឃើញករណីនាំចូលពីរនាក់ថ្មីនេះ គឺកើតមានបន្ទាប់ពីកន្លងកម្ពុជាបានរកឃើញករណីនាំចូលពីប្រទេសបារាំង និងថៃផងដែរ។
ដោយពិនិត្យទៅលើការរកឃើញទាំងនេះ ការនាំចូលកូវីដ១៩ ពីក្រៅប្រទេស គឺជាបញ្ហាប្រឈមមួយដែលគំរាមកំហែងដល់កម្ពុជាគ្រប់ពេលវេលា ហើយតម្រូវអោយកម្ពុជាចាត់វិធានការយ៉ាងម៉ឺងម៉ាត់ ដើម្បីទប់ស្កាត់ឱ្យបានមានប្រសិទ្ធភាពចំពោះការនាំចូលកូវីដ១៩ពីក្រៅប្រទេស។
ដរាបណាគ្មានវ៉ាក់សាំងបង្ការកូវីដ១៩ទេនោះ កម្ពុជាក៏ដូចជាប្រទេសទាំងអស់ក៏ដូចជា ពិភពលោកទាំងមូល នៅតែប្រឈមខ្ពស់នឹងការឆ្លងរាលដាលមេរោគ កូវីដ១៩នេះ គ្រប់ពេលវេលាទាំងអស់។ នេះគ៏ដោយសារតែមេរោគកូវីដ១៩នេះ ធ្វើការចម្លងពីមនុស្សម្នាក់ទៅម្នាក់ទៀតយ៉ាងងាយស្រួលតាមរយៈតំណក់តូចល្អិតដែល ក្អក ឬកណ្តាស ចេញពីអ្នកផ្ទុកមេរោគកូវីដ១៩ ឬក៏ការប៉ះពាល់ជាមួយនឹងវត្ថុដែល មានផ្ទុកមេរោគ ហើយយកដៃមកប៉ះផ្ទៃមុខ។ មិនតែប៉ុណ្ណោះ ការស្រាវជ្រាវជាច្រើនបង្ហាញថា សូម្បីតែមនុស្សដែលមានផ្ទុកមេរោគកូវីដ១៩ ប៉ុន្តែគ្មានលេចចេញរោគសញ្ញាក៏អាចធ្វើការចម្លងមេរោគនេះបានដែរ។
ដំណឹងដែលល្អនោះ គឺមកដល់ពេលនេះ កម្ពុជាមានសមត្ថភាពរកឃើញករណីកូវីដ ១៩ នៅព្រលានយន្តហោះ មុនពេលដែលអ្នកអ្នកផ្ទុកមេរោគបានធ្វើដំណើរក្នុងក្រុង ភ្នំពេញ និងរស់នៅជាមួយគ្រួសាររបស់ពួកគេ ឬក៏បានរកឃើញក្នុងអំឡុងពេលនៃការដាក់ខ្លួននៅដោយឡែក។
នៅពេលដែលកម្ពុជាលុបចោលការរឹតត្បិតការធ្វើដំណើរពីបរទេស ដើម្បីហេតុផលសេដ្ឋកិច្ចនោះ កិច្ចការត្រួតពិនិត្យតាមច្រកព្រលានយន្តហោះ និងច្រកអន្តរជាតិនានា មានសារសំខាន់ជាអាយុជីវិត។
អ្នកបំពេញការងារតាមច្រកអន្តរជាតិទាំងអស់ត្រូវបន្តចាត់វិធានការយ៉ាងម៉ត់ចត់បំផុត ដោយមិនអោយថ្លោះធ្លោយ ដើម្បីធ្វើយ៉ាងណាកុំអោយមានការនាំចូលកូវីដ១៩ មកចម្លងដល់ប្រជាជនកម្ពុជា នៅភ្នំពេញ ក៏ដូចជាតាមបណ្តាខេត្តនានា។
សំខាន់ដូចគ្នានេះ គោលការណ៍នៃការគោរពការណែនាំរបស់ក្រសួងសុខាភិបាល ក្នុងការដាក់ខ្លួននៅដោយ ឡែករយះពេល១៤ថ្ងៃ នៅពេលធ្វើដំណើរពីបរទេសចូល ប្រទេសកម្ពុជា ក៏មានសារសំខាន់ខ្លាំងណាស់ដែរ។ ទាំងជនបរទេស និងកម្ពុជា ត្រូវអនុវត្តគោលការណ៍នេះអោយបានល្អ ដើម្បីចៀសវាងការចម្លងមេរោគដោយមិនដឹងខ្លួនទៅកាន់អ្នកដទៃ។
កិច្ចការនេះ គឺដើម្បីកុំអោយមានការថ្លោះធ្លោយដែលថា អ្នកខ្លះអាចនឹងធ្វើតេស្តឃើញអវិជ្ជមាន នៅថ្ងៃធ្វើតេស្ត បើទោះបីជាពួកគេមានផ្ទុកមេរោគកូវីដ១៩ក្តី។
ចំណែកប្រជាជនកម្ពុជានៅក្នុងប្រទេសទាំងអស់ក៏ត្រូវប្រុងប្រយ័ត្នអោយបានខ្ពស់ដូចតាមការណែនាំរបស់សម្តេចតេជោ ហ៊ុន សែន ដែលបារម្ភពីស្ថានភាពកូវីដ១៩ អាចនឹងផ្ទុះឡើងគ្រប់ពេល។
ការរក្សាគម្លាតពីរម៉ែត្រ និងការពាក់ម៉ាស ព្រមទាំងការរស់នៅប្រកបដោយ អនាម័យ ខ្ពស់ មានសារសំខាន់នៅក្នុងការទប់ស្កាត់ការឆ្លង និងចម្លងមេរោគកូវីដ១៩។
ប្រជាជនកម្ពុជាទាំងអស់មិនត្រូវគិតថា ស្ថានភាពបច្ចុបន្នមានន័យថា កូវីដ១៩លែងគំរាមកំហែងកម្ពុជាឡើយ។
ដរាបណាពិភពលោកមិនមានវ៉ាក់សាំងការពារកូវីដ១៩ទេនោះ កម្ពុជាក៏ដូចជា ប្រទេសនានានៅក្នុងពិភពលោកដែរនៅតែប្រឈមមុខខ្ពស់នឹងការរាលដាលនៃមេរោគកូវីដ១៩នេះ ដោយពិចារណាទៅលើរបៀបដែលមេរោគនេះ ឆ្លង និងចម្លងពីមនុស្សម្នាក់ទៅម្នាក់ទៀត។
វានឹងមានគ្រោះថ្នាក់ដូចគ្នា បើសិនជាអ្នកខ្លះមិនត្រូវបាន៕
ចែករំលែកព័តមាននេះ