ខេត្តកំពង់ឆ្នាំង ៖ ប្រជាពលរដ្ឋភាគច្រើនមកពីខេត្តពោធិ៍សាត់ និងខ្លះទៀតអ្នករស់នៅខេត្តកំពង់ឆ្នាំង បាននាំគ្នាសម្រុកឡើងទៅភ្នំស្រែអំពិល ស្ថិតនៅក្នុងឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង ដើម្បីបេះផ្សិតប៉ក់ ឬខ្លះហៅផ្សិត ផូងផាំង យកមកលក់ឲ្យឈ្មួញ ដែលចាំទិញនៅចំណុចផ្សារក្តុល ដើម្បីយកទៅលក់បន្តឱ្យទៅថៃ ក្រុងប៉ោយប៉ែត ។
តាមការបញ្ជាក់របស់ប្រជាពលរដ្ឋទាំងនោះ បានឱ្យដឹងថ ៖ពួកគាត់ខ្លះនៅភូមិបំណក់ ភូមិឈើតុំ ស្រុកក្រគរ ខេត្តពោធិ៍សាត់ ខ្លះនៅភូមិក្រាំស្គា ឃុំក្តុលសែនជ័យ ស្រុកទឹកផុសខេត្តកំពង់ឆ្នាំង បាននាំគ្នាទៅបេះផ្សិតប៉ក់ នៅចំណុចជើងភ្នំស្រែអំពិល នេះ គឺនៅពេលដែលមានភ្លៀងធ្លាក់ ព្រោះចាប់តាំងពីមានភ្លៀងធ្លាក់ប៉ុន្មានថ្ងៃជាប់គ្នាមក មានផ្សិតប៉ក់បានដុះយ៉ាងច្រើនពេញព្រៃ ។
ហើយពេលបេះបាន គឺដឹកតាមម៉ូតូមកដល់ផ្សារក្តុល មានឈ្មួញចាំទិញ នៅទីនោះស្រាប់ ដោយផ្សិត១គីឡូក្រាម លក់បានថ្លៃ៧ពាន់រៀល ហើយក្នុងម្នាក់ៗមួយថ្ងៃអាចរកបាន ពី៤ទៅ៥គីឡូក្រាម ឬខ្លះអាចច្រើនជានេះបើប៉ះចំហ្វូងរបស់វា ។
ជាមួយគ្នានេះ ឈ្មួញដែលជាអ្នកចាំទិញពីប្រជាពលរដ្ឋបានឲ្យដឹងថា គាត់ទិញពីប្រជាពលរដ្ឋថ្លៃ ៧ពាន់រៀល ពេលដឹកដល់លក់ឱ្យថៃ ១គីឡូក្រាម លក់បាន៣ទៅ៤រយបាត ឬស្មើនឹងជាង៣ម៉ឺនរៀល ប៉ុន្តែផ្សិតទម្រាំដឹកដល់ទីនោះ វាបានស្រកគីឡូច្រើន ម្យ៉ាងវិញទៀត យើងត្រូវលាងសំអាតឱ្យបានស្អាត ទើបថៃទិញដែរ ។ ក្នុងមួយថ្ងៃពួកគាត់អាចទិញ ពី៤ទៅ៥រយគីឡូក្រាម ឬអាចច្រើនជាងនេះ ពេលផ្សិតសំបូរ ។
ដោយឡែក លោក ម៉ឹង វិសាលសុខ មេឃុំក្តុលសែនជ័យវិញ បានឱ្យដឹងតាមទូរស័ព្ទថា ប្រជាពលរដ្ឋភាគច្រើនមកពីស្រុកក្រគរ ខេត្តពោធិ៍សាត់ បានមកបេះផ្សិតប៉ក់ ភ្នំស្រែអំពិលនេះ ព្រោះនៅស្រុកក្រគរ គេកាប់ព្រៃអស់ទៅ គឺគ្មានព្រៃដែលផ្សិតអាចដុះបានឡើយ ម្ល៉ោះហើយ ពួកគាត់មកបេះតែជើងភ្នំស្រែអំពិល ក្នុងឃុំក្តុលសែនជ័យនឹងទេ ។ សម្រាប់អ្នកភូមិក្រាំងស្គា ភូមិក្តុល ខេត្តកំពង់ឆ្នាំង ក៏មានអ្នកឡើងបេះផ្សិតប៉ក់នេះដែរ ហើយខ្លះប៉ះចំហ្វូងវា អាចរកចំណូលបានជាង១០ម៉ឺនរៀលក្នុង១ថ្ងៃ តែខ្លះបានត្រឹមតែ៤-៥ម៉ឺនរៀលប៉ុណ្ណោះ។
តាមដែលលោកបានដឹងតគ្នាថា ថៃ គេចូលចិត្តហូបផ្សិតប៉ក់នេះ ធ្វើជាម្ហូប ព្រោះមានជំនឿងថា ផ្សិតប៉ក់ហូបទៅបាត់ឈឺខ្នង ឈឺចង្កេះ ។ ហើយផ្សិតប៉ក់នេះ គឺធ្វើម្ហូប ដោយយកវាមកឆា ជាមួយសាច់ជ្រូក សាច់គោ ឬស្ងោវាក៏បានដែរ ថែមទាំងមានរសជាតិឆ្ងាញ់ ដូចផ្សិត ធម្មជាតិផ្សេងៗ ដូចជាផ្សិតកញ្ជោ ផ្សិតចំបើង និងផ្សិតសណ្តែកជាដើម៕ (កែសម្រួលដោយ ៖ បុប្ផា)
ចែករំលែកព័តមាននេះ