រាជធានីភ្នំពេញ ៖ យុវជនម្នាក់ ខណៈពេលបើកម៉ូតូសណ្តោងរ៉ឺម៉កដឹកថ្មម៉ាបគេចរថយន្តមួយគ្រឿង ក៏ជ្រុលទៅបុករបងថ្ម បណ្តាលឱ្យបាក់កបាត់បង់ជីវិតភ្លាមៗនឹងកន្លែងកើតហេតុ កាលពីវេលាម៉ោងប្រមាណ៨និង២០នាទីព្រឹកថ្ងៃទី១៣ ខែមិថុនា ឆ្នាំ២០២០ នៅតាមបណ្តោយផ្លូវជាតិលេខ៦ ត្រង់ចំណុចស្ពានទី៤ ស្ថិតក្នុងភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
យុវជនរងគ្រោះខាងលើឈ្មោះយន សារ៉េត អាយុ១៦ឆ្នាំ ជាកម្មករដឹកថ្មម៉ាប មានស្រុកកំណើតនៅភូមិ ព្រែកអំបិល ឃុំស្អាង ស្រុកស្អាង ខេត្តកណ្តាល ។
តាមប្រភពពីសាក្សីនៅកន្លែងកើតហេតុបានអោយដឹងថា មុនពេលកើតហេតុ គេឃើញយុវជនរងគ្រោះម្នាក់ខាងលើបើកម៉ូតូសណ្តោងរ៉ឺម៉កមួយគ្រឿងដឹកថ្មម៉ាបចេញពីត្រង់ស្ពានលេខ២សំដៅទៅព្រែកអញ្ចាញស្ថិតក្នុងស្រុកមុខកំពូល ខេត្តកណ្តាល ដោយធ្វើដំណើរក្នុងទិសដៅពីត្បូងទៅជើង។
តាមប្រភពដដែលបានបន្តថា លុះនៅពេលយុវជនរងគ្រោះបើកម៉ូតូរ៉ឺម៉កដឹកថ្មម៉ាបធ្វើដំណើរមកដល់ចំណុចកើតហេតុខាងលើ ក៏បានគេចរថយន្តមួយគ្រឿងដែលបត់ឆ្លងផ្លូវ និងគេចម៉ូតូដែលចេញពីផ្លូវលំបណ្តាលអោយជ្រុលចង្កូតទៅបុករបងថ្មយ៉ាងពេញទំហឹង បណ្តាលឲ្យបាក់កបាត់បង់ជីវិតភ្លាមៗនៅកន្លែងកើតហេតុ ។ បន្ទាប់ពីគ្រោះថ្នាក់ ក្រុមគ្រួសារក៏បានចុះទៅកន្លែងកើតហេតុ រួចនាំសពបញ្ជូនទៅកាន់ស្រុកកំណើត ដើម្បីធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ