រាជធានីភ្នំពេញ ៖ ជនសង្ស័យជាចោរឆក់កាបូបម្នាក់ត្រូវនគរបាល និងសមត្ថកិច្ចកងរាជអាវុធហត្ថចាប់ខ្លួនបានកាលពីវេលាម៉ោង៨ និង៤០នាទីព្រឹក ថ្ងៃទី៧ ធ្នូ ២០១៤ បន្ទាប់ពីជិះម៉ូតូមួយគ្រឿងធ្វើសកម្មភាពឆក់កាបូបពីស្ត្រីម្នាក់បានសម្រេចនៅមុខសាកលវិទ្យាល័យភូមិន្ទភ្នំពេញ ស្ថិតក្នុងសង្កាត់ទឹកល្អក់ទី១ ខណ្ឌទួលគោក ហើយព្យាយាមគេចខ្លួន។
ជនសង្ស័យឈ្មោះណែម រដ្ឋា ភេទប្រុស អាយុ១៧ឆ្នាំ មានទីលំនៅ និងមុខរបរមិនពិតប្រាកដ ធ្លាប់បួសជាព្រះសង្ឃ ទើបនឹងសឹកថ្មីៗ។ ចំណែកនារីជាម្ចាស់កាបូបឈ្មោះមុត សៅរដ្ឋ អាយុ៣៤ឆ្នាំ ជាមន្ត្រីរាជការនៅរាជ្យបណ្ឌិតសភា ស្នាក់នៅផ្ទះលេខ៥៩៤ ផ្លូវលំភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ។
ប្រភពបានឱ្យដឹងថា មុនពេលកើតហេតុ ស្ត្រីរងគ្រោះជិះម៉ូតូមួយគ្រឿងម៉ាកហុងដាធុនC110 ពណ៌ទឹកប៊ិច ធ្វើដំណើរតែម្នាក់ឯងតាមផ្លូវសហព័ន្ធរុស្ស៊ីក្នុងបំណងយកទូរស័ព្ទទៅជួសជុលនៅផ្សារដេប៉ូ ខណៈដល់ចំណុចខាងលើស្រាប់តែមានជនសង្ស័យម្នាក់ជិះម៉ូតូមួយគ្រឿងម៉ាកវីវ៉ា ពណ៌ខ្មៅ ពាក់ស្លាកលេខតាកែវ១A១៥០៨ មកអែបជិតធ្វើសកម្មភាពឆក់កាបូបពីស្ត្រីរងគ្រោះបានសម្រេចហើយចៃដន្យទាក់ដៃចង្កូតម៉ូតូគ្នាដួលទាំង២នាក់ ខណៈនោះជនសង្ស័យបានព្យាយាមរត់ចូលទៅក្នុងសាកលវិទ្យាល័យភូមិន្ទភ្នំពេញបំណងគេចខ្លួនក៏ត្រូវក្រុមនិស្សិតក្នុងសាលា ព្រមទាំងប៉ូលិស និងកងរាជអាវុធហត្ថចេញអន្តរាគមន៍ចាប់បាននាំទៅកាន់ប៉ុស្តិ៍នគរបាលរដ្ឋបាលទឹកល្អក់ទី១ដើម្បីសួរនាំ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ