ប្រទេសអុីតាលី ៖ ប្រធានសហព័ន្ធកីឡាបាល់ទាត់អុីតាលី (FIGC) សង្ឃឹមថាការប្រកួតទាំងអស់ នឹងអាចបើកឱ្យអ្នកគាំទ្រចូលទស្សនានៅខែក្រោយ ប្រសិនបើអត្រានៃការឆ្លងកូវីដ-១៩ បន្តធ្លាក់ចុះនៅក្នុងប្រទេសនេះ។
សកម្មភាពបាល់ទាត់អុីតាលី បានចាប់ផ្តើមឡើងវិញកាលពីថ្ងៃសុក្រ ក្នុងការប្រកួតពានរង្វាន់ Coppa Italia បន្ទាប់ពីត្រូវផ្អាកទាំងស្រុងកាលខែមីនា ។ ដោយឡែកសម្រាប់ការប្រកួតក្នុងក្របខណ្ឌ Serie A នឹងចាប់ផ្តើមឡើងវិញនៅថ្ងៃទី២០ ខែមិថុនាខាងមុខនេះ។
នាពេលបច្ចុប្បន្ន ការប្រកួតទាំងអស់ កំពុងត្រូវបានលេងដោយគ្មានវត្តមានអ្នកគាំទ្រចូលរួមទស្សនាផ្ទាល់ក្នុងកីឡដ្ឋាន ។ ប៉ុន្តែសម្រាប់ប្រធាន FIGC លោក Gabriele Gravina បាននិយាយនៅក្នុងបទសម្ភាសន៍ជាមួយវិទ្យុ Deejay កាលពីថ្ងៃសៅរ៍ថា «យើងបានបោះជំហានចុងក្រោយ ឆ្ពោះរកការបញ្ចប់លីគជើងឯក បើទោះបីជាមានវិបត្តិដោយសារកូវីដ-១៩។ ខ្ញុំពិតជាសប្បាយចិត្តណាស់ ប៉ុន្តែនៅខ្វះធាតុផ្សំដ៏សំខាន់មួយទៀត គឺការចូលរួមពីអ្នកគាំទ្រ។ ហើយខ្ញុំសង្ឃឹមថា ពួកគេនឹងត្រូវអនុញ្ញាតឱ្យត្រឡប់មកទស្សនាក្នុងកីឡដ្ឋានវិញ នៅខែកក្កដា វាអាចនៅសប្តាហ៍ដំបូង ឬពាក់កណ្តាលខែកក្កដា» ។
សូមបញ្ជាក់ថា ប្រទេសអុីតាលី បានធ្វើការបន្ធូរបន្ថយការរឹតត្បិតគោលការណ៍រឹតបន្តឹងជាច្រើន ហើយស្ថានភាពដ៏ខ្មៅងងឹតនៃការឆ្លងកូវីដ-១៩ ក៏បានថយចុះគួរឱ្យកត់សំគាល់ពីមួយថ្ងៃទៅមួយថ្ងៃ ដែលបានជុំវិញឱ្យមានបើកទ្វារសេដ្ឋកិច្ចជាបណ្តើរៗក្នុងប្រទេសមួយនេះ ៕ (ដកស្រង់ចេញពី៖ Reuters)
ចែករំលែកព័តមាននេះ