លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត បានប្រាប់មន្ត្រីរបស់លោកថា ដើម្បីធ្វើឲ្យពលរដ្ឋចូលរួមបោះឆ្នោត គឺត្រូវធ្វើឲ្យពលរដ្ឋជឿជាក់លើស្ថាប័នរៀបចំការបោះឆ្នោត គេជឿជាក់លើគជបនោះឯង ។ លោកបានលើកឡើងថា…
លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត បានប្រាប់មន្ត្រីរបស់លោកថា ដើម្បីធ្វើឲ្យពលរដ្ឋចូលរួមបោះឆ្នោត គឺត្រូវធ្វើឲ្យពលរដ្ឋជឿជាក់លើស្ថាប័នរៀបចំការបោះឆ្នោត គេជឿជាក់លើគជបនោះឯង ។
លោកបានលើកឡើងថា «ក្នុងនាមយើង ជាស្ថាប័នរៀបចំការបោះឆ្នោតត្រូវតែធ្វើយ៉ាងណាឱ្យប្រជាពលរដ្ឋមានជំនឿទុកចិត្តលើការបោះឆ្នោត ក៏ដូចជាជឿជាក់លើស្ថាប័នរៀបចំការបោះឆ្នោត ។ នៅពេលដែលប្រជាពលរដ្ឋជឿជាក់ ហើយនោះពួកគាត់នឹងចូលរួមបោះឆ្នោតមិនខានឡើយ» ។
គណៈកម្មាធិការជាតិរៀបចំការបោះឆ្នោត ដែលហៅកាត់ថា គជប បានរៀបចំការបោះឆ្នោត នៅក្នុងប្រទេសកម្ពុជា ចាប់តាំងពីឆ្នាំ១៩៩៨មក ក្រោយពីការអង្គការសហប្រជាជាតិបានចូល មករៀបចំការបោះឆ្នោតនៅឆ្នាំ១៩៩៣ ។ ស្ថាប័នគជប តែងតែទទួលបានគាំទ្រទាំងហិរញ្ញវត្ថុ និងបច្ចេកទេសពីបណ្តាប្រទេស អង្គការនានាដែលជាដៃគូអភិវឌ្ឍន៍កម្ពុជា។កំណែតម្រង់ធំ និងគួរឲ្យកត់សម្គាល់មួយរបស់ស្ថាប័ននេះ បានធ្វើឡើងនៅក្រោយការបោះឆ្នោតសកល ឆ្នាំ២០១៣។
ក្នុងឱកាសជួបជាមួយមន្ត្រី និងថ្នាក់ដឹកនាំជាប់កិច្ចសន្យា ដែលធ្វើការនៅតាមលេខាដ្ឋានគណៈកម្មាធិការរៀបចំការបោះឆ្នោតខេត្ត កាលពីថ្ងៃទី១២ មិថុនា ឆ្នាំ២០២០ ប្រធានគជប បានគូសបញ្ជាក់ថា ដើម្បីឲ្យពលរដ្ឋជឿលើការបោះឆ្នោត គឺថាពលរដ្ឋខ្មែរគ្រប់រូបដែលបានបំពេញលក្ខណ្ឌត្រឹមត្រូវតាមច្បាប់ ត្រូវមានឈ្មោះក្នុងបញ្ជីបោះឆ្នោត និងចូលរួមបោះឆ្នោត ។ សន្លឹ្កឆ្នោតរបស់ពួកគាត់ត្រូវរាប់យ៉ាងត្រឹមត្រូវ និងមានតម្លាភាពជាទីបំផុត។
លោក ស៊ិក ប៊ុនហុក បាននិយាយថា មានតែការបោះឆ្នោតនោះទេ ទើបធ្វើឲ្យប្រទេសជាតិមាន សុខសន្តិ ភាពនិងការអភិវឌ្ឍន៍ ។ លោកបានអះអាងថា ស្ថាប័នរៀបចំការបោះឆ្នោតនេះ នឹងធ្វើកំណែទម្រង់ការបោះការបៅឆ្នោតជាបន្តទៀត ដើម្បីឲ្យស្របតាមប្រព័ន្ធបច្ចេកវិទ្យាព័ត៌មានវិទ្យា ។ កម្ពុជានឹងរៀបចំការបោះឆ្នោតក្រុមប្រឹក្សាឃុំសង្កាត់នៅឆ្នាំ២០២២ និងការបោះឆ្នោតជ្រើស រើសសមាជិករដ្ឋសភានីតិកាលទី៧នៅឆ្នាំ២០២៣ ខាងមុខ ៕
ចែករំលែកព័តមាននេះ