ខេត្តកំពង់ឆ្នាំង ៖ សត្វននាលខ្យងចំនួន៥ក្បាល ត្រូវបានសមត្ថកិច្ចនគរបាលប៉ុស្តិ៍រដ្ឋបាលកំពង់ឆ្នាំង សហការជាមួយនិងប្រជាការពារ ធ្វើការចាប់ឃាត់ពីបុរស២នាក់ ខណៈកំពុងធ្វើសកម្មភាពធ្វើធ្នាក់ទាក់ចាប់នៅចំណុចទួលអំពិល ស្ថិតនៅក្នុងភូមិដំណាក់កំពូល សង្កាត់កំពង់ឆ្នាំង ក្រុងកំពង់ឆ្នាំង…
ខេត្តកំពង់ឆ្នាំង ៖ សត្វននាលខ្យងចំនួន៥ក្បាល ត្រូវបានសមត្ថកិច្ចនគរបាលប៉ុស្តិ៍រដ្ឋបាលកំពង់ឆ្នាំង សហការជាមួយនិងប្រជាការពារ ធ្វើការចាប់ឃាត់ពីបុរស២នាក់ ខណៈកំពុងធ្វើសកម្មភាពធ្វើធ្នាក់ទាក់ចាប់នៅចំណុចទួលអំពិល ស្ថិតនៅក្នុងភូមិដំណាក់កំពូល សង្កាត់កំពង់ឆ្នាំង ក្រុងកំពង់ឆ្នាំង ព្រឹកថ្ងៃទី១៣ មិថុនា ។
លោកឯក ណារ៉ា នាយនគរបាលប៉ុស្តិ៍រដ្ឋបាលសង្កាត់កំពង់ឆ្នាំងបានដឹងថា ខណៈដែលមន្ត្រីនគរបាលប៉ុស្តិ៍
រដ្ឋបាល សហការជាមួយប្រជាការពារធ្វើការតាមល្បាតនៅចំណុចខាងលើ ត្រូវបានប្រជាពលរដ្ឋរាយការណ៍ថា ជនសង្ស័យកំពុងតែដាក់លបវ៉ៃចាប់សត្វ ននាលខ្យង នៅចំណុចមិនទួលអំពិល ។
ពេលនោះ សមត្ថកិច្ចនិងប្រជាការពារក៏បានទៅធ្វើការចាប់ឃាត់ខ្លួនជនសង្ស័យទាំង២នាក់ រួម ជាមួយសត្វននាលខ្យងចំនួន៥ក្បាល, លប២គ្រឿង និងម៉ូតូចំនួន១គ្រឿង ផងដែរ ។ ប្រភពដដែលបានបន្តថា ជនសង្ស័យទី១-ឈ្មោះ ប៊ុន ស្នា អាយុ២៦ឆ្នាំ និងទី២-ឈ្មោះប៊ិន ណេត អាយុ២៤ឆ្នាំ ទាំងពីរនាក់មានទីលំនៅភូមិកំពង់ផ្ចឹក ឃុំអណ្ដូងស្នាយ ស្រុករលាប្អៀរ ។
តាមចម្លើយសារភាពរបស់ជនសង្ស័យទាំង២នាក់ បានប្រាប់សមត្ថកិច្ចនគរបាលឱ្យដឹងថា កន្លងមកពួកគេតែងយកលបទៅចាប់សត្វននាលខ្យងជាច្រើនលើកណាស់មកហើយ នៅចំណុចខាងលើ ពេលចាប់បាន ពួកគេយកទៅលក់ឲ្យពួកអ្នកលក់សត្វព្រៃនៅភូមិអូរសណ្ដាន់ ឃុំទឹកហូត ស្រុករលាប្អៀរ ដោយក្នុងមួយក្បាល លក់បាន២ម៉ឺនរៀល ។ ជនសង្ស័យទាំង២នាក់រួមនឹងវត្ថុតាង ត្រូវបានសមត្ថកិច្ចនគរបាល ប្រគល់ឲ្យមន្ត្រីជំនាញដើម្បីចាត់ការតាមនីតិវិធីច្បាប់ ។
ចែករំលែកព័តមាននេះ