ខេត្តព្រះសីហនុ ៖ នៅរសៀលថ្ងៃទី១២ មិថុនា ២០២០នេះ ស្នងការដ្ឋាននគរបាលខេត្តព្រះសីហនុ បានបំភ្លឺថា អតីតមន្ត្រីនគរបាលម្នាក់ បានយកឯកសណ្ឋាននគរបាលរបស់ខ្លួន បោះចោលនៅការ៉ាស់សាំង sokimex និងTela នោះ ត្រូវបានលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានដាក់បទបញ្ជាអោយការិយាល័យបុគ្គលិក ធ្វើការណែនាំ ជាច្រើនដងរួចមកហើយ និងបានធ្វើការបណ្តេញចេញពីក្របខ័ណ្ឌនគរបាលជាតិ នៃស្នងការដ្ឋាននគរបាលខេត្តព្រះសីហនុ ផងដែរ ។
ស្នងការដ្ឋាននគរបាលខេត្តព្រះសីហនុ បានបំភ្លឺជូនសាធារណៈជនឲ្យជ្រាបជាព័ត៌មានបែបនេះ បន្ទាប់ពីមានគណនីហ្វេសប៊ុកឈ្មោះថា Chum Phearum បានបង្ហោះរៀបរាប់ កាលពីព្រឹកថ្ងៃទី១១ ម្សិលមិញនេះថា “មានករណីភ្ញាក់ផ្អើល នឹងមន្ត្រីនគរបាលខេត្តព្រះសីហនុម្នាក់ ដែលទំនងជាបែកថ្នាំ បានយកខោអាវនគរបាលរបស់ខ្លួនមកបោះចោល នៅការ៉ាស់សាំង sokimex និង Tela ក្នុងសង្កាត់៣ ក្រុងព្រះសីហនុ រួចឡើងឡានក្រុងចេញទៅបាត់” ។
គណនីហ្វេសប៊ុកដដែល បន្តថា គេសង្កេតនៅលើអាវមានឈ្មោះ ស វេសនា អត្តលេ ៦៨០៤១ ពាក់ស័ក្តិ២ ហើយមានស័ក្តិ៣ថ្មីមួយទៀត ដែលទំនងត្រៀមឡើងស័ក្តិផងក៏មិនដឹង ។
បើតាមមន្ត្រីនគរបាលខេត្តព្រះសីហនុ បានអោយដឹងថា ម្ចាស់ឯកសណ្ឋាននេះគឺពិតជាមន្ត្រីនគរបាលប្រាកដមែន នៅការិយាល័យអគ្គិភ័យ ។
មន្ត្រីដដែលបន្ថែមថា មន្ត្រីនគរបាលរូបនេះធ្លាប់ត្រូវបាននគរបាលសង្កាត់លេខ៣ ចាប់ខ្លួនម្តងដែរ ពីបទចែកចាយនិងរក្សាទុកគ្រឿងញៀន ។
ចំណែកឯ លោកប្រធានការិយាល័យបុគ្គលិក នៃស្នងការដ្ឋាននគរបាលខេត្តព្រះសីហនុ ក៏បានប្រាប់ឱ្យដឹងថា មន្ត្រីនគរបាលរូបនេះត្រូវបានស្នការដ្ឋាននគរបាលខេត្តព្រះសីហនុ ដាក់សំណើរទៅលើ ដើម្បីដកចេញរួចហើយ នៅតែការប្រកាសចេញមកប៉ុណ្ណោះ ៕
ចែករំលែកព័តមាននេះ