រាជធានីភ្នំពេញ ៖ ក្រោយពីមានការពិន័យមិនឱ្យកីឡាករឡុង ជិន ឡើងប្រកួតនៅលើសង្វៀនរហូតដល់៣ខែ បានធ្វើឱ្យកីឡាកររូបនេះ បង្ហាញពីអារម្មណ៍មិនសប្បាយចិត្ត និងបារម្ភពីការបាត់បង់ចំណូលក្នុងអំឡុងពេលបិទមិនឱ្យឡើងរេញនេះ ។ លោកបានបង្ហើបប្រាប់កីឡាករដូចគ្នាពីអារម្មណ៍លែងចង់បន្តការប្រដាល់នោះផង ក្នុងពេលដែលលោកក៏ថ្ងូរថាមិនសូវរកបានពីការប្រដាល់ ។
ការរងពិន័យមិនឲ្យឡើងសង្វៀនប្រកួតចំនួន៣ខែនេះ គឺបានកើតឡើងពីកំហុសឆ្គងរបស់លោក ដែលមិនគោរពវិន័យក្នុងក្លិប ដែលនាំឱ្យម្ចាស់ក្លិបសម្រេចមិនឱ្យកីឡាកររូបនេះមានឈ្មោះឡើងរេញគ្រប់ប៉ុស្តិ៍ទាំងអស់រយៈពេល៣ខែដើម្បីព្រមានដល់កីឡាករដែលខ្វះការយកចិត្តទុកដាក់នៅក្នុងវិស័យប្រដាល់ផ្សេងទៀត ។ យ៉ាងណាមិញ ដំណោះស្រាយក៏អាចនឹងមានផងដែរប្រសិនបើមានការសម្របសម្រួលណាមួយ ។ នេះបើយោងតាមការបញ្ជាក់ពីម្ចាស់ក្លិប។
លោក រីក គី (Ricky) គ្រូបង្វឹកក្លិប ខ្លារខិនមានរិទ្ធិ បានអះអាងក្រោយការដាក់ពិន័យថា កីឡាករ ឡុង ជិន អាចនឹងឡើងសង្វៀនប្រដាល់មុនពេលវេលាកំណត់បាន ប្រសិនបើរូបគេកែប្រែអត្តចរិត និងព្រម ទទួលស្គាល់កំហុស ហើយមកស្នើសុំដល់គ្រូបង្វឹក និងម្ចាស់ក្លិប ។ លោកថា កីឡាកររូបនេះ បានអវត្តមានពីការហ្វឹកហាត់អស់ជាច្រើនសប្តាហ៍មកហើយ ដោយការចូលខ្លួនមកទទួលកំហុសក៏មិនទាន់មាននោះដែរ។
លោកស្រី ឡុង រ៉ាវី ម្ចាស់ក្លិបខ្លារខិន មានរិទ្ធិ បានសម្រេចដាក់ពិន័យកីឡាករ ឡុងជិន មិនឲ្យឡើងសង្វៀនប្រកួតគ្រប់ស្ថានីយទូរទស្សន៍ ចំនួន៣ខែ ក្រោមហេតុផលថាកីឡាកររូបនេះ មិនគោរពវិន័យក្លិប ដោយចង់ឈប់ក៏ឈប់ ហើយរាល់ពេលមានការស្នើឱ្យមកទទួលការហ្វឹកហាត់ជាប់លាប់ ក៏មិនសូវឃើញនាពេលចុងក្រោយ ។ មុនឈានដល់ការដាក់ពិន័យនេះ លោកស្រីអះអាងថា កីឡាករ រូបនេះបានប្រព្រឹត្តកំហុសបែបនេះជាច្រើនលើក ច្រើនសារួចមកហើយ ។ ហើយបណ្ដាលមកពីលោកស្រីយល់ថា កីឡាករ ឡុង ជិន ហាក់លែងយកចិត្តទុកដាក់ក្នុងក្លិប ពោលគឺចង់បានតែឈ្មោះផ្គូផ្គងឱ្យឡើងរេញ ដើម្បីបានលុយទើបលោកស្រីធ្វើការព្រមានតែម្ដង។
លោក រីក គី គ្រូបង្វឹកក្លិបខ្លារខិនមានរិទ្ធិបាននិយាយថា មូលហេតុដែលប្រធានក្លិបដាក់ពិន័យលើកីឡាករ ឡុង ជិន ដោយសារ រូបគេមិនគោរពពេលវេលាហ្វឹកហាត់ ហើយ ពេលទៅណាមកណាមិនដែលផ្តល់ដំណឹងដល់ក្លិបទេ ។ លោកអះអាងថា កីឡាកររូបនេះ មិនមែនទើបតែបង្កើតកំហុសម្តងនោះទេ ពោលគឺរូបគេបានបង្កកំហុសបែបនេះជាច្រើនលើករួចមកហើយ ។ លោក រីក គី យល់ថា ការដាក់ពិន័យ នេះ មិនមែនជាការធ្វើទារុណកម្មនោះទេ តែជាការដាស់តឿនដល់រូបគេឲ្យមានការ ភ្ញាក់រលឹក និងចេះកែប្រែកំហុសទៅវិញទេ ។
លោកអះអាងថា បើឡុង ជិន ចេះកែប្រែកំហុស ហើយព្យាយាមហ្វឹកហាត់ក្នុងអំឡុងពេលនៃការដាក់ពិន័យនេះ រូបគេទំនងអាចឡើងសង្វៀន ប្រកួតមុនពេលកំណត់ ។ ផ្ទុយទៅវិញបើរូបគេទន់ទោរទៅតាមការពិន័យនេះ ហើយមិន ព្យាយាមហ្វឹកហាត់ រូបគេអាចចំណាយពេល ច្រើនជាង៣ខែ ទើបក្លិបអនុញ្ញាតឲ្យឡើង ប្រកួត ។ លោក រីក គី បានបញ្ជាក់បន្ថែមទៀតថា កីឡាករ ឡុង ជិន បានខកខានហ្វឹកហាត់ អស់រយៈពេល៣សប្តាហ៍ហើយ ដូច្នេះប្រសិនបើមិនពិន័យគឺពិតជាប៉ះពាល់មុខមាត់ក្លិប ។ លោក សង្ឃឹមថា រូបគេនឹងចូលមកហ្វឹកហាត់ ហើយ កែប្រែកំហុសដើម្បីទទួលបានឱកាសឡើង សង្វៀនប្រកួតសាជាថ្មី ។ គ្រូបង្វឹករូបនេះ ទទួលស្គាល់ថា កំហុសរបស់កីឡាករ ឡុង ជិនក៏មានការរួមចំណែកពីលោកផងដែរ ដែលអប់រំ មិនបានល្អ ។
ងាកទៅកាន់កីឡាករ ឡុង ជិន វិញ លោកបានបង្ហើបប្រាប់អ្នករាប់អានជិតខាងថា លោកអាចប្រឈមនឹងកង្វះប្រាក់ចំណូលក្នុងពេលដាក់ពិន័យនេះ ប៉ុន្តែលោកក៏ហាក់មិនខ្វល់ពីការចរចា
ឬកែប្រែនោះដែរ ដោយលោកបង្ហើបតាមមិត្តភ័ក្ដិថា ម្ចាស់ក្លិបចង់ដាក់ឱ្យលោកបានឡើងរេញពេលណាពេលហ្នឹងទៅ ដោយសារតែលោកក្នុងរយៈពេលនេះ ក៏មិនសូវមានកម្លាំងចិត្តហ្វឹកហាត់ឱ្យជាប់លាប់នោះដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ