ខេត្តកំពង់ឆ្នាំង ៖ ឯកឧត្តម ឈួរ ច័ន្ទឌឿនអភិបាលខេត្ត មានប្រសាសន៍ថា សមិទ្ធផលថ្មីដែលអាជ្ញាធរខេត្តរៀបចំកសាងនៅពេលនេះគឺជាទីទួលសុវត្ថិភាពសម្រាប់សង្គ្រោះជីវិតមនុស្ស សត្វ នៅពេលមានទឹកជំនន់កើតឡើង ។
ឯកឧត្តមអភិបាលខេត្ត មានប្រសាសន៍បែបនេះ នៅក្នុងពិធីក្រុងពាលីកសាងទីទួលសុវត្ថិភាព មួយកន្លែង នៅមុខវត្តយាយទេព ក្នុងភូមិផ្សារ ឆ្នាំង សង្កាត់កំពង់ឆ្នាំង ក្រុងកំពង់ឆ្នាំង ។
ឯកឧត្តម ឈួរ ច័ន្ទឌឿន ថ្លែងទៀតថា ទីទួលសុវត្ថិភាពដែលកសាងនៅទីនេះ មិនគ្រាន់តែសម្រាប់ជួយសង្គ្រោះជីវិតមនុស្ស សត្វ ពេលមានគ្រោះទឹកជំនន់ប៉ុណ្ណោះទេ តែក៏ធ្វើឱ្យមានសោភ័ណភាពសម្រាប់ក្រុងកំពង់ឆ្នាំងផងដែរ ជាពិសេសដើម្បីកែលំអចំណុចត្រង់នេះឱ្យក្លាយជាតំបន់ទេសចរណ៍សម្រាប់ភ្ញៀវមកលេងកម្សាន្តទៀតផង ។ គម្រោងសាងសង់ គឺមានចំនួន៣
ហិកតា ជាការចំណាយថវិការបស់រាជរដ្ឋាភិបាលក្នុងគម្រោងថវិការដ្ឋបាលខេត្តកំពង់ឆ្នាំង ។
ឯកឧត្តមអភិបាលខេត្ត បានរំឭកថា កន្លងទៅអាជ្ញាធរខេត្តបានខិតខំកសាងហេដ្ឋារចនាសម្ព័ន្ធជាច្រើនកន្លែង ដូចជាសួនច្បារសម្តេចចៅហ្វាវាំង គង់ សំអុល កែលំអសួនច្បារវិមានឯករាជ្យ សួនច្បារផ្សារក្រោម សួនច្បារដំរីសនិងរង្វង់មូលរូបទូកចុងកោះជាដើម ។ សម្រាប់ថ្ងៃនេះ គឺចាប់ផ្តើមកសាងសមិទ្ធផលថ្មីមួយទៀត ហើយសង្ឃឹមថា ក្រោយពេលសមិទ្ធផលថ្មីនេះកសាងរួច នឹងក្លាយជាមានសោភ័ណភាព សម្រាប់លំអក្រុងកំពង់ឆ្នាំជាពុំខានឡើយ ។
សូមបញ្ជាក់ថា ក្រោយពីពិធីសូត្រមន្តក្រុងពាលីរួចហើយ ក៏មានការលែងចាបដើម្បីសុំសេច
ក្តីសុខសប្បាយផងដែរ ៕
ចែករំលែកព័តមាននេះ