ខេត្តកំពង់ឆ្នាំង ៖ កម្មការិនីរោងចក្រកាត់ដេរចំនួន២៨នាក់ បានរងរបួសធ្ងន់ និងស្រាល នៅក្នុងហេតុការណ៍គ្រោះថ្នាក់ចរាចរណ៍មួយបានកើតឡើង នៅវេលាម៉ោង៦និង៣០នាទីព្រឹក ថ្ងៃទី១២ ខែមិថុនា ឆ្នាំ២០២០ នៅចំណុចកសិដ្ឋានចិញ្ចឹមត្រី ស្ថិតនៅភូមិថ្លុកឫស្សី ឃុំសេដ្ឋី ស្រុកសាមគ្គីមានជ័យ ខណៈរថយន្តដឹកដីបើកកៀររ៉ឺម៉កដឹកកម្មកររោងចក្រ ក្នុងដំណើរស្របទិសគ្នា ។
សមត្ថកិច្ចនគរបាលចរាចរណ៍ស្រុកសាមគ្គីមានជ័យ បានឲ្យដឹងថា ករណីគ្រោះថ្នាក់ចរាចរណ៍ខាងលើនេះបង្កឡើងដោយរថយន្តដឹកដី គ្មានស្លាកលេខ បានបើកបរក្នុងទិសដៅស្របទិសគ្នា ជាមួយ និងរ៉ឺម៉ក ម៉ូតូដឹកកម្មក លើកំណាត់ផ្លូវជាតិលេខ៥ លុះដល់ចំណុចកើតហេតុបានបុក និងកៀររ៉ឺម៉កម៉ូតូដែលដឹកកម្មករ បណ្តាលអោយធ្លាក់ផ្លូវរងរបួសធ្ងន់ និងស្រាល ។
ប្រភពដដែលបានបន្តថា កម្មកររងគ្រោះក្នុងហេតុការខាងលើមានចំនួន២៨នាក់ ក្នុងនោះរបួសធ្ងន់ម្នាក់ ពួកគាត់ធ្វើការនៅធ្វើការនៅរោងចក្រ TakFook និងរោងចក្រ T.F.G ។
ក្រោយពេលកើតហេតុ កម្មករទាំងអស់បានដឹកទៅសង្គ្រោះនោះមណ្ឌលសុខភាពស្រុកកំពង់ត្រឡាច ចំនួន៤នាក់ និងនៅក្លីនិកឯកជន ២៤នាក់ ។
សមត្ថកិច្ចនគរបាលបាននាំយកវត្ថុតាងមានរថយន្ត និងរ៉ឺម៉កម៉ូតូទៅរក្សាទុកនៅប៉ុស្ដិ៍រដ្ឋបាលសេដ្ឋី ដើម្បីរង់ចាំធ្វើការដោះស្រាយតាមនីតិវិធីផងដែរ ។ ដោយឡែកអ្នកបើកបររថយន្តបានរត់គេចខ្លួនបាត់ ។
ដោយនៅរសៀលថ្ងៃដដែលនេះដែរ លោកជំទាវ កែ ច័ន្ទមុន្នី អ្នកតំណាងរាស្ត្រមណ្ឌលកំពង់ឆ្នាំង ដឹកនាំ មន្ត្រីរាជការ ចុះសាកសួរសុខទុក្ខ និងផ្តល់អំណោយដល់កម្មករទាំងអស់ ដែលកំពុងសម្រាកនៅមណ្ឌលសុខភាព និងក្លីនិកឯកជន ដោយក្នុងម្នាក់ៗទទួលបានថវិកា៣ម៉ឺនរៀលផងដែរ ៕
ចែករំលែកព័តមាននេះ