ខេត្តស្ទឹងត្រែង ៖ ស្នូរផ្ទុះអាវុធតបតគ្នាទៅវិញទៅមក រវាងក្រុមជនល្មើសមិនស្គាល់មុខបានបាញ់សំដៅទៅលើក្រុមមន្ត្រីឧទ្យានុរក្ស ខណៈកំពុងដើរល្បាតក្នុងដែនជម្រកសត្វព្រៃសៀមប៉ាង ប៉ុន្តែពុំមានអ្នកម្នាក់រងរបួសនោះឡើយ ។
ហេតុការណ៍ខាងលើនោះបានកើតឡើងកាលពីវេលាម៉ោង៨និង៤០នាទីយប់ថ្ងៃទី១០ មិថុនា ឆ្នាំ២០២០ ស្ថិតក្នុងដែនជម្រកសត្វព្រៃសៀមប៉ាង ។ បើតាមសេចក្តីរាយការណ៍បានឲ្យដឹងថា ទីកន្លែងកើតហេតុនៅចំណុចUTM0636244.1563741 ស្ថិតក្នុងភូមិសាស្ត្រត្រពាំងអង្គ្រង ភូមិខិះស្វាយ ឃុំព្រែកមាស ស្រុកសៀមប៉ាង ខេត្តស្ទឹងត្រែង ។
យោងតាមប្រភពព័ត៌មានអោយដឹងថា នៅយប់កើតហេតុនោះ គេប្រទះឃើញមនុស្សមិនស្គាល់អត្តសញ្ញាណចំនួន៩នាក់ ប្រដាប់ដោយអាវុធកែច្នៃគ្រប់ដៃ មានកូមសម្រាប់ឆ្លុះបំភ្លឺគ្រប់គ្នា ដើរបរបាញ់សត្វ លុះពេលប្រទះជាមួយនឹងក្រុមមន្ត្រីឧទ្យានុរក្សល្បាតដែលកំពុងស្នាក់នៅចំណុចកើតហេតុ ស្រាប់តែក្រុមជនល្មើសបានផ្ទុះអាវុធសំដៅទៅលើក្រុមមន្ត្រីឧទ្យានុរក្សល្បាត ភ្លាមៗនោះក្រុមមន្ត្រីឧទ្យានុរក្សល្បាតក៏បានបាញ់តបតទៅវិញផងដែរ។
តាមការបំភ្លឺពីក្រុមមន្ត្រីឧទ្យានុរក្សល្បាតខាងលើបានឱ្យដឹងថា ក្រុមជនមិនស្គាល់មុខបានបាញ់មួយគ្រាប់មកលើក្រុមរបស់ពួកគាត់ បន្ទាប់មកទៀតក្រុមជនល្មើសបន្តបាញ់សំដៅមកលើទីតាំងស្នាក់នៅរបស់ក្រុមមន្ត្រីឧទ្យានុរក្សចំនួន២បន្ថែមគ្រាប់ទៀត ឯក្រុមរបស់ពួកគាត់ក៏សម្រេចបាញ់តបតទៅវិញក្នុងគោលបំណងការពារខ្លួន គ្រានោះក្រុមជនល្មើសក៏បានបាញ់សន្ធាប់មកលើក្រុមពួកគាត់ជាច្រើនគ្រាប់ទៀត ហើយក្រុមរបស់ពួកគាត់ក៏បាញ់តបតជាច្រើនគ្រាប់វិញ ទើបក្រុមជនល្មើសដកថយគេចខ្លួនបាត់អស់។
ក្រោយពេលមានការប្រឈមដាក់គ្នារវាងក្រុមជនល្មើសជាមួយក្រុមមន្ត្រីឧទ្យានុរក្សនោះ នៅថ្ងៃទី១១ ខែមិថុនា ឆ្នាំ២០២០ ក្រុមការងារចម្រុះនៃកងកម្លាំងប្រដាប់អាវុធមានកម្លាំងយោធាយោធភូមិភាគ១ ដឹកនាំដោយលោកឧត្តមសនីយ៍ទោ ខេង សារុន មេបញ្ជាការរងកម្លាំងអាវុធហត្ថខេត្តដឹកនាំ ដោយលោក គង់ សាវឿន មេបញ្ជាការរង រួមនឹងគណ:អភិបាលស្រុកសៀមប៉ាង បានចុះទៅពិនិត្យលើទីតាំងកើតហេតុជាកន្លែងផ្ទុះអាវុធនៅក្នុងដែនជម្រកសត្វព្រៃសៀមប៉ាង ត្រង់ចំណុច UTM ខាងលើផងដែរ ។
លោកឧត្តមសេនីយ៍ទោ ខេង សារុន បានបញ្ជាក់ប្រាប់ឱ្យដឹងថា លោកបានបញ្ជាឲ្យកងកម្លាំងយោធាយោធភូមិភាគ១ដែលឈរជើងនៅតាមខ្សែបន្ទាត់ព្រំដែនកម្ពុជា-ឡាវទាំងអស់ត្រូវចាំឃ្លាំមើល ក្រែងជាប្រជាជនឡាវចូលឆ្លងដែនខុសច្បាប់មកបរបាញ់សត្វនៅក្នុងដែនជម្រកសត្វព្រៃសៀមប៉ាង តែទោះបីជាយ៉ាងណា យើងនៅមិនទាន់ដឹងថា ក្រុមជនល្មើសមិនស្គាល់អត្តសញ្ញាណទាំងនោះជាកម្លាំងខាងណាឲ្យពិតប្រាកដនៅឡើយទេ ខណៈបច្ចុប្បន្នកម្លាំងសមត្ថកិច្ចខាងលើកំពុងស្រាវជ្រាវលើករណីនេះយ៉ាងដិតដល់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ