ប្រទេសថៃ ៖ តាមប្រភពព័ត៌មាន Oddity Central បានឱ្យដឹងថា ស្ត្រីជនជាតិថៃអាយុ៤០ឆ្នាំម្នាក់ កំពុងទទួលបានការចាប់អារម្មណ៍លើបណ្តាញសង្គមអាស៊ី ចំពោះយុទ្ធសាស្ត្រដ៏ប៉ិនប្រសប់របស់នាងក្នុងការលក់សម្លៀកបំពាក់ជជុះតាមអនឡាញ។ ដោយសារតែសម្លៀកបំពាក់ភាគច្រើនដែលនាងលក់ គឺសល់ពីមនុស្សដែលបានបាត់បង់ជីវិត នាងបានសម្រេចចិត្តសម្តែងជាខ្មោចឆៅក្នុងអំឡុងពេល Live លក់លើអនឡាញ។
Kanittha Thongnak អាយុ៤០ឆ្នាំ បានលក់ខោអាវជជុះនៅតាមដងផ្លូវនៅ Chon Daen ភាគខាងជើងប្រទេសថៃ អស់រយៈពេល៣ឆ្នាំ។ តែដោយសារតែការបិទផ្សារ ដោយសារកូវីដ១៩ នាងត្រូវខកខានមិនបានរកប្រាក់ចំណូលដូចពីមុន។ នាងក៏សម្រេចចិត្តតែងខ្លួនធ្វើខ្មោច ហើយ Live លក់ខោអាវដែលសល់ពីមនុស្សដែលបានបាត់បង់ជីវិត ។ ហើយនាងត្រូវបានទទួលការចាប់អារម្មណ៍យ៉ាងខ្លាំង។
ក្នុងរយៈពេលតែ ៥ថ្ងៃ នៃការ Live លក់លើអនឡាញ នាងបានទទួលការចាប់អារម្មណ៍ពីទស្សនិកជនជាច្រើនរហូតដល់ជាង ៤ពាន់នាក់។ នាងទទួលស្គាល់ថា វាពិតជាប្រសើរជាងការលក់ពីមុនៗឆ្ងាយណាស់។
គួរបញ្ជាក់ផងដែរថា ខោអាវជជុះដែលនាងយកមកលក់នេះ គឺយកមកពីការដេញថ្លៃពីអ្នកបូជាសព ព្រោះតែពួកគេជាអ្នកសម្អាតសម្លៀកបំពាក់របស់អ្នកបាត់បង់ជីវិតដែលនៅសល់។ នាងថា ការតែងខ្លួនលក់ខុសគេនេះ គឺមិនមានអ្វីគួរឱ្យខ្មាស់ទេ។ អ្វីដែលសំខាន់ គឺនាងត្រូវរកអង្ករច្រកឆ្នាំង៕ ដកស្រង់ចេញពីវេបសាយ ៖ odditycentral (កែសម្រួលដោយ ៖ បុប្ផា)
ចែករំលែកព័តមាននេះ