អ៊ីតាលី ៖ តាមប្រភពព័ត៌មាន CNN បានឱ្យដឹងថា នាយករដ្ឋមន្ត្រីប្រទេសអ៊ីតាលី លោក Giuseppe Conte បាននិយាយនៅក្នុងសន្និសីទសារព័ត៌មានមួយនៅរាត្រីថ្ងៃព្រហស្បតិ៍នេះថា…
អ៊ីតាលី ៖ តាមប្រភពព័ត៌មាន CNN បានឱ្យដឹងថា នាយករដ្ឋមន្ត្រីប្រទេសអ៊ីតាលី លោក Giuseppe Conte បាននិយាយនៅក្នុងសន្និសីទសារព័ត៌មានមួយនៅរាត្រីថ្ងៃព្រហស្បតិ៍នេះថា ប្រទេសអ៊ីតាលី កំពុងតែបន្ធូរបន្ថយវិធានការទប់ស្កាត់ការឆ្លងវីរុសកូរ៉ូណា ដោយអនុញ្ញាតឱ្យមានការលេងកីឡា ដូចជាការប្រកួតកីឡាបាល់ទាត់ Coppa Italia ជាដើម។
គ្រឹះស្ថានផ្សេងទៀតក៏អាចបើកដំណើរការឡើងវិញផងដែរ ចាប់ពីថ្ងៃទី២៥ ខែមិថុនា រួមទាំងការជំរុំរដូវក្តៅ សាលាមត្តេយ្យ និង កន្លែងផ្សេងៗទៀតមួយចំនួន។ កីឡាដែលមិនមែនលេងជាផ្លូវការ មិនមានពាក់ព័ន្ធនឹងការប៉ះរាងកាយ ក៏អាចចាប់ផ្តើមឡើងវិញដែរ។
មន្ត្រីមូលដ្ឋាននឹងអាចវាយតម្លៃពីលទ្ធភាពជោគជ័យនៃការចាប់ផ្តើមសកម្មភាពទាំងនេះឡើងវិញ ដោយពឹងផ្អែកលើករណីឆ្លងកូវីដ១៩នៅតំបន់នីមួយៗ។ ដោយឡែកការប្រគំតន្ត្រី មជ្ឈមណ្ឌលសន្និបាត និងក្លឹបរាត្រី ជាមួយនឹងការរាំ នឹងមិនអនុញ្ញាតឱ្យចាប់ផ្តើមសកម្មភាពរបស់ពួកគេឡើងវិញទេ រហូតដល់ថ្ងៃទី១៤ ខែកក្កដា។
គួរបញ្ជាក់ផងដែរថា ប្រទេសអ៊ីតាលី បានជាប់គាំងទូទាំងប្រទេសចាប់តាំងពីថ្ងៃទី៩ ខែមីនា។ មកដល់ពេលនេះ ប្រទេសអ៊ីតាលី មានករណីឆ្លងកូវីដ១៩សរុប ២៣៦,១៤២ករណី ករណីបាត់បង់ជីវិត សរុប ៣៤,១៦៧ករណី និង ករណីជាសះស្បើយ ១៧១,៣៣៨ករណី៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ