រាជធានីភ្នពេញ ៖ តារាសម្តែងវ័យក្មេងនាង កុសមៈ លីនដា បានសម្រេចផ្អឹបការងារសម្តែងមួយរយៈក្រោមហេតុផលមួយចំនួន បើទោះបីជាពេលនេះ នាងកំពុងទទួលបានជោគជ័យលើវិថីមួយនេះក៏ដោយ។ ខុសពីតារាមួយចំនួនដែលប្រឹងប្រែងចាប់ឈោងយកការសម្តែងឲ្យបានជាប់លាប់ ប៉ុន្តែ កុសមៈ លីនដា បែរជាបដិសេធមិនទទួលយកការសម្តែងក្នុងអំឡុងពេលនេះ បើទោះបីជានាងត្រូវបានម្ចាស់ផលិតកម្មទាក់ទងជាបន្តបន្ទាប់ក៏ដោយ។
យ៉ាងណាតារារូបនេះអះអាងថា ការផ្អាកនេះមិនមែនជាបិទបញ្ចប់អាជីពសម្តែងរបស់នាងទាំងស្រុងនោះឡើយ ពោលគឺនាងអាចនឹងទទួលយការសម្តែងឡើងវិញ នៅក្នុងអំឡុងពេលណាមួយដែលសមស្រប។
តារាសម្តែង កុសមៈ លីនដា បានអះអាងប្រាប់តាមសារអេឡិចត្រូនិចថា នាងបានផ្អាកការសម្តែងតាំងពីដើមឆ្នាំ២០១៩មក នៅពេលដែលនាងបានថតបញ្ចប់រឿងចំនួនពីរ គឺរឿង បំណុលម្តាយ និងរឿង បេះដូងតែមួយ។ នាងបញ្ជាក់ថា មូលហេតុដែលធ្វើឲ្យខ្លួនសម្រេចផ្អាកការសម្តែងនាពេលនេះ គឺដោយសារនាងមានបញ្ហាជាច្រើន មិនតែរឿងគ្រួសារ និងរឿងឯកជន។
កុសមៈ លីនដា ថា មួយរយៈនេះខ្ញុំមានបញ្ហាច្រើនបង ណាមួយនៅក្នុងគ្រួសារខ្ញុំក៏មានបញ្ហានេះតិចតួច ហេតុនេះទើបខ្ញុំសម្រេចផ្អាកការថតមួយរយះ ហើយការផ្អាកនេះមិនមែនលើកដំបូងទេបង គឺខ្ញុំតែងតែផ្អាកនៅពេលដែលខ្ញុំចង់សម្រាក។
យ៉ាងណា កុសមៈ លីនដា លើកឡើងថា នៅពេលដែលនាងបានប្រឡូកក្នុងសិល្បៈប្រមាណ២ទៅ៣ឆ្នាំនេះ គឺនាងបានយល់ច្បាស់ពីបញ្ហាដែលបានកើតឡើងនៅក្នុងសង្គមសិល្បៈទាំងល្អ និងអាក្រក់។
នាងបញ្ជាក់ថា កន្លងមក ប៉ារបស់នាងមិនបានគាំទ្រឲ្យនាងចូលសិល្បៈឡើយ បើទោះបីជាគាត់ក៏ជាអ្នកសិល្បៈក៏ដោយ ប៉ុន្តែនៅពេលដែលគាត់ឃើញនាងទទួលបានជោគជ័យនោះ គាត់ក៏លេងមាត់ តែយ៉ាងណា គាត់ក៏បានគាំទ្រនៅពេលដែលនាងបានសម្រេចផ្អាកការសម្តែងនេះដែរ ដោយសារគាត់យល់ច្បាស់ពីបញ្ហាក្នុងសិល្បៈ។
បើតាម កុសមៈ លីនដា បើទោះបីជាផ្អាកការសម្តែងក៏ដោយ ប៉ុន្តែនាងក៏នៅមានខាងអ្នកដឹកនាំរឿងមកទាក់ទងនាងឲ្យថតជាបន្តបន្ទាប់ តែនាងបានបដិសេធ ដោយសារនាងចង់សម្រាកមួយរយៈសិន។
នាងបន្ថែមថា ការងារសម្តែងនេះ នាងនឹងទទួលយកវិញអាចនៅចុងឆ្នាំ ឬដើមឆ្នាំក្រោយ ពោលគឺនៅពេលដែលជំងឺកូវីដ១៩នេះ បានរលត់បាត់ និងបញ្ហារបស់នាងមួយចំនួនទៀតត្រូវបានដោះស្រាយចប់។
ដោយឡែកពាក់ព័ន្ធបញ្ហាស្នេហាវិញ តារាដែលចាប់យោងភាពល្បីល្បាញតាមរយៈការថតរូបម៉ូដែល នាង កុសមៈ លីនដា បានលើកឡើងថា បច្ចុប្បន្ននាងក៏មានអ្នកមកចែចូវផងដែរ ប៉ុន្តែនាងសុំលាក់សិន ក្នុងពេលដែលនាងក៏មិនទាន់ចង់គិត និងដល់អាយុដែលត្រូវគិតពីរឿងស្នេហានោះផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ