មិត្តប្លមជាប្រភេទមនុស្សដែលមានចិត្តប្រឡងប្រណាំងជាមួយយើងជានិច្ច នៅពេលដែលយើងមានលំនឹង ឬកំពុងចម្រើន គេមិនចោលយើងទេ គេតែងពឹងពាក់យើង ឱបដៃឱបជើងយើង តែនៅពេលណាដែលយើងចុះខ្សោយ ឬមានសេចក្តីប្រមាទភ្លាំងភ្លាត់នៅក្នុងការងារភ្លាម គេក៏ជួយច្រានយើងដោយពាក្យសរសើរ ដោយសម្តីបញ្ជោរក្នុងបំណងកុំឲ្យយើងមើលឃើញនូវការប្រហែសធ្វេសរបស់យើង ។
លុះដល់កំហុសនោះកាន់តែច្រើន កាន់តែធំឡើងគេក៏ដើរខ្សឹប ដើរនិយាយប្រាប់អ្នកដទៃនូវអ្វីៗដែលជាកំហុសរបស់យើង ថែមទាំងប្រឌិតរឿងអាស្រូវមិនពិតផ្សំបញ្ចូលថែមទៀត គឺពេលនោះហើយជាពេលវេលាដែលគេធាក់យើងឲ្យខ្ទាតចេញ ដើម្បីនឹងបានស៊ីដាច់កន្លែងនោះតែម្តង ព្រោះគេឃ្លានជាយូរមកហើយ ។
ចំណែកកល្យាណមិត្តជាមិត្តល្អ តែពេលខ្លះគេមិនហ៊ានហាមឃាត់យើងដែលធ្វើនូវអំពើឆ្គាំឆ្គងទេ មកអំពីគេខ្លាចយើងខឹង ខ្លាចយើងស្អប់គេ បានជាគេមិនហ៊ានឃាត់ តែគេអាចធ្វើជាមិត្តល្អបាន បើគេមានសន្តានចិត្តល្អ ព្យាយាមដឹកនាំឲ្យយើងដើរក្នុងផ្លូវ ស្តាប់ធម៌ រៀនធម៌ និងធ្វើអ្វីៗដែលល្អ គេសរសើរយើងក្នុងផ្លូវល្អ ក្នុងគោលបំណងឲ្យយើងមាននូវស្មារតី កែកំហុសឆ្គងដោយខ្លួនឯង និងប្រាប់ឱ្យយើងដឹងនូវកំហុសឆ្គងទាន់ពេលវេលា ។
ពិតមែនតែមនុស្សល្អមានមិនច្រើនមែន ប៉ុន្តែការជ្រើសរើសមិត្តមិនមែនជាការផ្សងព្រេងដូចចាក់ឆ្នោតទេ គឺត្រូវតែសិក្សាអំពីលក្ខណៈរបស់មនុស្សឲ្យបានច្បាស់លាស់សិន ទើបសេពគប់ជាការប្រសើរបំផុត ។ សាន សារិន
ចែករំលែកព័តមាននេះ