ចិន ៖ តាមប្រភពព័ត៌មាន Shanghaiist បានឱ្យដឹងថា ភ្លាមៗបន្ទាប់ពីបានអនុញ្ញាតឱ្យអ្នកជំងឺកូវីដ១៩ ចុងក្រោយដែលសម្រាកនៅមន្ទីរពេទ្យប៉េកាំង ត្រឡប់ទៅផ្ទះវិញ គេបានរកឃើញករណីឆ្លងថ្មីនូវជំងឺកូវីដ១៩ ក្នុងទីក្រុង ដែលកន្លងមកបានស្ងប់ស្ងាត់មិនឃើញមានការឆ្លងរយៈពេល២ខែមកហើយ។
អាជ្ញាធរសុខាភិបាលក្រុងប៉េកាំង បាននិយាយនៅក្នុងសន្និសីទកាសែតមួយកាលពីថ្ងៃពុធថា បុរសអាយុ៥២ឆ្នាំ ដែលមានឈ្មោះហៅថា Tang បានទៅមន្ទីរពេទ្យ កាលពីថ្ងៃពុធ បន្ទាប់ពីមានអាការៈក្តៅខ្លួន។
វាមិនច្បាស់ទេថា តើលោក Tang ត្រូវបានឆ្លងដោយរបៀបណា? គាត់និយាយថា គាត់មិនបានចាកចេញពីទីក្រុងប៉េកាំង ឬមានទំនាក់ទំនងជាមួយមនុស្សមកពីខាងក្រៅទីក្រុង ក្នុងរយៈពេលពីរសប្តាហ៍កន្លងមកនេះទេ។
ឯអ្នកកាសែតមន្ត្រីក្រុងប៉េកាំង បានពណ៌នាករណីនេះថា ជាករណីគួរឱ្យព្រួយបារម្ភ ដែលទាមទារឱ្យមានការប្រុងប្រយ័ត្នបន្ថែមទៀតជាបន្តបន្ទាប់។ ទំនាក់ទំនងជិតស្និទ្ធពីរនាក់ ត្រូវបានដាក់នៅឱ្យដាច់ដោយឡែកពីគេ ហើយនឹងត្រូវទទួលការធ្វើតេស្តរកវីរុសនេះ។
ជាផ្លូវការ បុរសខាងលើ គឺជាករណីឆ្លងក្នុងស្រុកដំបូងបង្អស់ដែលទីក្រុងប៉េកាំងបានរាយការណ៍ក្នុងរយៈពេល៥៥ថ្ងៃ។ ព័ត៌មាននេះ កើតឡើងភ្លាមៗ បន្ទាប់ពីរដ្ឋធានីរបស់ប្រទេសចិនបានប្រារព្ធពិធីអបអរសាទរចំពោះអ្នកជំងឺចុងក្រោយ ដែលបានអនុញ្ញាតឱ្យត្រឡប់ទៅផ្ទះវិញ៕ ដកស្រង់ចេញពីវេបសាយ ៖ shanghaiist (កែសម្រួលដោយ ៖ បុប្ផា)
ចែករំលែកព័តមាននេះ