បើនិយាយអំពីសេចក្តីសុខ សិរីសួស្តីនៃជីវិត មនុស្សនៅលើពិភពលោកនេះទាំងគ្រហស្ថ ទាំងបព្វជិត ទាំងអ្នកមាន ទាំងអ្នកក្រសុទ្ធតែជាអ្នកប៉ងប្រាថ្នាដូចៗគ្នា សូម្បីតែចោរដែលខំលួច ប្លន់ កេងប្រវ័ញ្ចទ្រព្យគេទាំងយប់ទាំងថ្ងៃក៏ដើម្បីតែសេចក្ដីសុខផ្ទាល់ខ្លួននេះដែរ ។ តែទោះជាយ៉ាងណាសេចក្ដីសុខដែលកើតឡើងព្រោះតែការបៀតបៀនមនុស្សសត្វទាំងឡាយ សេចក្ដីសុខនោះលោកចាត់ថាជាសេចក្ដីសុខក្លែងក្លាយ សេចក្ដីសុខមិនពិតប្រាកដដោយហេតុថាសុខកើតពីអំពើមិនល្អ ។
សេចក្ដីសុខមានច្រើនប្រភេទតែបើនិយាយដោយបំព្រួញមានតែ៣ប្រការប៉ុណ្ណោះគឺៈ
១-សុខព្រោះការសរសើរបានដល់ការរស់នៅប្រកបដោយគុណតម្លៃទាំងសីលធម៌ សុជីវធម៌ កិត្តិយស សេចក្តីថ្លៃថ្នូរ បូករួមទាំងមុខរបរចិញ្ចឹមជីវិតសុចរិតផងដែរ។
២-សុខព្រោះមានភោគៈគឺទ្រព្យសម្បត្តិដែលបានមកនោះប្រកបដោយកម្លាំងញើសឈាម ការងារសុចរិតពិតៗ មិនបានទៅកេងប្រវ័ញ្ចអ្នកណាឡើយ ។
៣-សុខព្រោះបាននូវសម្បត្តិសុគតិ ដោយអំណាចនៃការរស់នៅប្រកបដោយជីវិតសីលធម៌ សុវជីវធម៌នេះ ពេលទម្លាយខន្ធទៅ នឹងបានទៅបដិសន្ធិក្នុងសុគតិភព។
បុគ្គលទាំងឡាយបើចង់បានសុខពិតប្រាកដគប្បីប្រព្រឹត្តអំពើល្អ កុំបៀតបៀនគ្នា កុំឈ្នានីសគ្នា កុំញុះញង់ កុំនិយាយមួលបង្កាច់បង្ខូចកេរ្តិ៍អ្នកដទៃ បើធ្វើបែបនេះបានមែននោះយើងនឹងបាននូវសេចក្ដីសុខពិតប្រាកដមិនខានឡើយ ។ សាន សារិន
ចែករំលែកព័តមាននេះ