ខេត្តបន្ទាយមានជ័យ ៖ ស្រាថ្នាំយីហោតាំងគួយ ដែលគេសង្ស័យថា ជាប់ពាក់ព័ន្ធ និងកាពុលមនុស្សស្លាប់ និងកំពុងសម្រាកព្យាបាលជាច្រើននាក់នៅក្រុងប៉ោយប៉ែត និងស្រុកម៉ាឡៃ កាលពីយប់ថ្ងៃទី៩ មិថុនា។ សម្រាបថ្ងៃទី១១ ខែមិថុនានេះ ត្រូវមន្ត្រីសាខាកាំកុងត្រូលសហការណ៍ជាមួយស្ថាប័ន និងសមត្ថកិច្ចពាក់ព័ន្ធ ដឹកនាំដោយលោក គាត ហ៊ុល អភិបាលក្រុងប៉ោយប៉ែត ព្រមទាំងចៅសង្កាត់ប៉ោយប៉ែត និងសង្កាត់ផ្សារកណ្តាល ចុះធ្វើការត្រួតពិនិត្យ ហើយដកហូតពីតាមទីផ្សារ និងតូបលក់តាមភូមិក្នុងក្រុងប៉ោយប៉ែតទាំងមូលបាន រាប់ពាន់ដប។
គេមិនទាន់ដឹងថា អាជីវករដែលទទួលស្រាថ្នាំយីហោ តាំង គួយ ដាក់លក់ច្រើនៗ និងត្រូវមន្ត្រីជំនាញ ហៅសាកសួរឬយ៉ាងណានៅឡើយទេ ព្រោះលោក សាន វិជ្ជាសារ៉ាវុឌ្ឍ ប្រធានសាខាកាំកុងត្រូលខេត្ត មិនអាចទាក់ទងសុំការអត្ថាធិប្បាយបាន ដោយទូរស័ព្ទម្តងចុចចូលគ្មានអ្នកទទួល ម្តងជាប់រវល់។ យ៉ាងណាក៏ដោយ លោក អ៊ឹម សុភារៈ នាយប៉ុស្តិ៍រដ្ឋបាលនគរបាលសង្កាត់ប៉ោយប៉ែត ប្រាប់តាមទូរស័ព្ទថា ករណីចុះពិនិត្យរកស្រាយីហោ សង្ស័យខាងលើគឺកំពុងបន្តធ្វើដូចភ្លៀងរលឹមតាំងពីព្រឹករហូតដល់ល្ងាចនេះ មិនទាន់ឈប់នៅឡើយទេ។
លោកនាយប៉ុស្តិ៍បន្តថា ក្រោយពិនិត្យលើទីផ្សារមន្ត្រី និងសមត្ថកិច្ចចុះពិនិត្យតាមតូប អាជីវករ គ្រប់ភូមិនៅទូទាំងក្រុងទៀតផង ដែលគិតមកដល់ម៉ោងជាង៥ល្ងាចថ្ងៃនេះ រកឃើញស្រាយីហោខាងលើ ជាប់សង្ស័យខាងលើប្រហែល៥០០យួរ ហើយថាវត្ថុតាងទាំងនេះក្រោយប្រមូលបានប្រគល់ជូនទៅខាងមន្ត្រីជំនាញ កាំកុងត្រូលចាត់ការបន្តតាមនីតិវិធីច្បាប់។ អ្នកស្រុករិះគន់ថា ស្រាថ្នាំខាងលើបានវាយលុកទីផ្សារស្ទើរពេញក្រុង ប៉ោយប៉ែត និងស្រុកមួយចំនួនក្នុងខេត្តមួយរយៈទៅហើយ លុះមានអ្នកស្លាប់ទើបមន្ត្រីជំនាញស្ទុះស្ទាចុះត្រួតពិនិត្យ ទីបំផុតរាប់ពាន់ដបនេះជាការប្រមូលរយៈពេល១ថ្ងៃតែប៉ុណ្ណោះ៕ ដោយ ៖ មុត សារុន
ចែករំលែកព័តមាននេះ