ខេត្តកំពត ៖ អភិបាលខេត្តកំពត បានលើកឡើងថា ការបាត់បង់ជីវៈចម្រុះនឹងនាំមកនូវផលប៉ះពាល់ធ្ងន់ធ្ងរដល់ជីវិតមនុស្ស ជាពិសេសប្រភពចំណីអាហារ និងប្រព័ន្ធសុខភាព។ ដូច្នេះឯកឧត្តមសូមឲ្យប្រជាពលរដ្ឋ អាជ្ញាគ្រប់លំដាប់ថ្នាក់ មន្ត្រីមន្ទីរជំនាញ និងពាក់ព័ន្ធ កងកម្លាំងទាំង៣ប្រភេទ ក្រុមហ៊ុន អង្គការនានា សូមជួយចូលរួមអភិរក្សជីវៈចម្រុះឲ្យបានល្អ។
ថ្លែងក្នុងទិវាបរិស្ថានជាតិ និងបរិស្ថានពិភពលោក៥ មិថុនា ឆ្នាំ២០២០ ក្រោមប្រធានបទ «អភិរក្សជីវៈចម្រុះដើម្បីយើងទាំងអស់គ្នា» នៅបរិវេណមាត់ព្រែកកំពត ស្ថិតក្នុងសង្កាត់កំពង់កណ្ដាល ក្រុងកំពត ខេត្តកំពតកាលពីព្រឹកថ្ងៃទី១០ ខែមិថុនា ឆ្នាំ ២០២០ ។
លោក ជាវ តាយ អភិបាលខេត្តកំពត បានលើកឡើងថា ការជួបជុំមន្ត្រីរាជការកងកម្លាំងប្រដាប់អាវុធ យុវជន ប្រជាពលរដ្ឋ ថ្នាក់ដឹកនាំ និងបុគ្គលិកក្រុមហ៊ុនជីប ម៉ុងអ៊ិនស៊ី ជាច្រើននាក់នាឱកាសនេះ ជាសក្ខីភាពបញ្ជាក់ថា យើងទាំងអស់គ្នាបានយល់ដឹង និងបានចូលរួមយ៉ាងសកម្ម ក្នុងកិច្ចគាំពារបរិស្ថាន និងបង្ហាញពីទឹកចិត្តស្រឡាញ់បរិស្ថាន ស្រឡាញ់ជីវៈចម្រុះ ដែលជាប្រភពអាហារនៃមនុស្សយើងគ្រប់គ្នា។
លោកអភិបាលខេត្តបានបន្តថា សកម្មភាពសព្វថ្ងៃនេះមនុស្សកំពុងធ្វើឲ្យប៉ះពាល់យ៉ាងធ្ងន់ធ្ងរដល់ ជីវៈចម្រុះ លើភពផែនដី គ្រាន់តែចន្លោះឆ្នាំ២០១០ ដល់ឆ្នាំ ២០១៥ គម្របព្រៃឈើប្រមាណ៣២លានហិកតាត្រូវបានបាត់បង់ បើ តាមឯកសារក្នុងរយៈពេល១៥០ឆ្នាំចុងក្រោយនេះ គម្របផ្កាថ្មសមុទ្របានបាត់បង់ជិតពាក់កណ្តាល ។ រីឯផ្ទាំងទឹកកកនៅតំបន់ប៉ូលវិញ កំពុងរលាយយ៉ាងលឿន ស្របពេលដែលកម្រិត អាស៊ីតទឹកសមុទ្រកើនឡើងកាន់តែខ្ពស់គំរាមកំហែងដល់ជីវិតសត្វនានា។
បច្ចុប្បន្ន ពិភពលោកកំពុងស្ថិតនៅលើបន្ទាត់ក្រហម នៃការវិនាសផុតពូជទ្រង់ទ្រាយធំ ការបាត់បង់ជីវៈចម្រុះ នឹងនាំមកនូវផលប៉ះពាល់ធ្ងន់ធ្ងរត្រឡប់មកយើងវិញ ពិសេសប្រភពចំណីអាហារ និងប្រព័ន្ធសុខភាព។ ដូច្នេះការអភិរក្សជីវៈចម្រុះ ជាមធ្យោបាយតែមួយគត់ ដើម្បីការពារភពផែនដីដ៏ស្រស់បំព្រង និងរក្សាបាននូវសេវាកម្មធម្មជាតិ ដែលផ្តល់ឲ្យមនុស្ស។
លោកសង្ឃឹមថា ការស្រឡាញ់បរិស្ថាន និងដក់ជាប់ក្នុងក្រអៅបេះដូងរបស់ពលរដ្ឋគ្រប់គ្នា ក្នុងកិច្ចគាំពារ និរន្តរភាពគុណភាពបរិស្ថានល្អតកូនតចៅយើងនិងមនុស្សជំនាន់ក្រោយ។
លោកស៊ុយ ធាប្រធានមន្ទីរបរិស្ថានខេត្តកំពត បានបញ្ជាក់ថា ជីវចម្រុះសំដៅដល់ទី១. ជីវីតនៅលើផែនដីរួមមាន រុក្ខជាតិ និងសត្វ ប្រមាណ៨លានប្រភេទ, ទី២. បណ្តាប្រព័ន្ធអេកូឡូស៊ី ដែលផ្តល់ជម្រករុក្ខជាតិ និងសត្វ និងទី៣. នានាភាពហ្សែននៅក្នុងចំណោមជីវិតទាំងនោះ ។
ដូចគ្នានេះដែរ តំណាងក្រុមហ៊ុនជីប ម៉ុងអ៊ីនស៊ី បានសម្តែងការពេញចិត្ត និងគាំទ្រចំពោះសកម្មភាព កិច្ចការពារ និងអភិរក្សបរិស្ថាន អភិរក្សជីវៈចម្រុះ និងការលប់បំបាត់សំរាម និងថងផ្លាស់ស្ទិក នៅតាមទីសាធារណៈ៕
ចែករំលែកព័តមាននេះ