ខេត្តបន្ទាយមានជ័យ ៖ ពលករខ្មែរប្រុសស្រីចំនួន២១នាក់ក្នុងនោះស្រី៦នាក់ បានត្រូវភាគីថៃឃាត់ខ្លួននៅក្បែរបន្ទាត់ព្រំដែន ក្នុងភូមិផានសឹក ឃុំផានសឹក ស្រុកអារញ្ញ ខេត្តស្រះកែវ ឈមនឹងទឹកដីកម្ពុជា ក្នុងស្រុកម៉ាឡៃ…
ខេត្តបន្ទាយមានជ័យ ៖ ពលករខ្មែរប្រុសស្រីចំនួន២១នាក់ក្នុងនោះស្រី៦នាក់ បានត្រូវភាគីថៃឃាត់ខ្លួននៅក្បែរបន្ទាត់ព្រំដែន ក្នុងភូមិផានសឹក ឃុំផានសឹក ស្រុកអារញ្ញ ខេត្តស្រះកែវ ឈមនឹងទឹកដីកម្ពុជា ក្នុងស្រុកម៉ាឡៃ កាលពីយប់ថ្ងៃទី៩ ខែមិថុនា ឆ្នាំ២០២០ ។ ទោះជាយ៉ាងណា ពលករខ្មែរទាំង២១នាក់នេះ មិនត្រូវបានគេមិនស្គាល់អត្តសញ្ញាណទេ ។
នៅពេលសាកសួរពលករទាំងនេះ ក៏មិនខុសពីពលករដែលសមត្ថកិច្ចធ្លាប់ឃាត់ខ្លួនកាលពីលើក
មុនៗដែរ គឺពួកគេប្រាប់សមត្ថកិច្ចថៃថា ចង់ទៅរកការងារធ្វើនៅក្រុងបាងកក និងខេត្តឈុនបូរី ព្រោះនៅភូមិកំណើតគ្មានការងារធ្វើ ខណៈភាគីថៃបិទព្រំដែន ដើម្បីទប់ស្កាត់ការរីករាលដាលនៃ
ជំងឺកូវីដ-១៩ ។ ក្រោយពីឃាត់ខ្លួន ភាគីថៃបាននាំយកទៅសាកសួរ នៅទីបញ្ជាការកងរយទា
ហានឈុតខ្មៅ១២០៦ ក្នុងស្រុកខាងលើ ។
លោក សួង សៅ មេបញ្ជាការនគរបាលការពារព្រំដែនគោក វរសេនាតូចលេខ៨១៥ ដែលគ្រប់គ្រងនៅបន្ទាត់ព្រំដែនស្រុកម៉ាឡៃ ប្រាប់ថា ពលករខ្មែរទាំង២១នាក់នេះត្រូវបានភាគីថៃបញ្ជូនមកកម្ពុជាតាមច្រករបៀងអូរបីជាន់ ស្រុកអូរជ្រៅ កាលពីព្រឹកថ្ងៃទី១០ ខែមិថុនា ។
លោកបញ្ជាក់ថា ពលករទាំងនេះឆ្លងដែនខុសច្បាប់ចូលទៅដីថៃតាមរយៈមេខ្យល់ តែលោកថា ពិបាកចាត់ការណាស់ ព្រោះក្រុមមេខ្យល់គេទាក់ទងគ្នាជាមួយពលករតាមរយៈទូរស័ព្ទ និងមិនបញ្ចេញអត្តសញ្ញាណឡើយ ។
គួរបញ្ជាក់ថា កាលពីថ្ងៃទី៨ ខែមិថុនាកន្លងទៅ សមត្ថកិច្ចថៃក្នុងស្រុកអារញ្ញ បានចាប់ឃាត់ខ្លួនពលរដ្ឋខ្មែរចំនួន៥នាក់ ដែលលួចឆ្លងដែនខុសច្បាប់ខាងត្បូងផ្លូវជាតិលេខ៥ ក្នុងក្រុងប៉ោយប៉ែត ។ ពលរដ្ឋខ្មែរទាំង៥នាក់នេះអះអាងថា ពួកគាត់ជាអាជីវករលក់ដូរនៅផ្សាររុងក្លឿ ចង់ចូលទៅមើលតូប ព្រោះបារម្ភពីទំនិញខ្លាចត្រូវទឹកភ្លៀងខូច ។ ទោះជាយ៉ាងណា ពលរដ្ឋទាំងនេះសមត្ថកិច្ចថៃបានបញ្ជូនមកកម្ពុជាវិញហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ