ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ចោរស្រីម្នាក់ជំនាញខាងដើរលូកយកលុយគេតាមផ្សារនោះអស់លក្ខណ៍ហើយ ក្រោយពីត្រូវបានប្រជាពលរដ្ឋចាប់បាន រួចប្រគល់ឱ្យប៉ូលិសមូលដ្ឋានយកទៅសួរនាំ រួចរៀបចំកសាងសំណុំរឿងបញ្ជូនទៅអធិការ ដ្ឋាននគរបាលក្រុង ដើម្បីចាត់ការបន្តតាមនីតិវិធីច្បាប់។ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោង១០ព្រឹក…
ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ចោរស្រីម្នាក់ជំនាញខាងដើរលូកយកលុយគេតាមផ្សារនោះអស់លក្ខណ៍ហើយ ក្រោយពីត្រូវបានប្រជាពលរដ្ឋចាប់បាន រួចប្រគល់ឱ្យប៉ូលិសមូលដ្ឋានយកទៅសួរនាំ រួចរៀបចំកសាងសំណុំរឿងបញ្ជូនទៅអធិការ ដ្ឋាននគរបាលក្រុង ដើម្បីចាត់ការបន្តតាមនីតិវិធីច្បាប់។ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោង១០ព្រឹក ថ្ងៃទី១០ ខែមិថុនា ឆ្នាំ២០២០ នៅបរិវេណក្នុងផ្សារក្រោម ស្ថិតក្នុងភូមិវិហាចិន សង្កាត់ស្វាយដង្គំ ក្រុង-ខេត្តសៀមរាប។
បើតាមលោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាបបានប្រាប់ថា បន្ទាប់ពីមានពលរដ្ឋចាប់បានចោរស្រីជើងឆើតម្នាក់ជំនាញខាងធ្វើសកម្មភាពដើរលួចលុយប្រជាពលរដ្ឋដែលមកទិញឥវ៉ាន់ក្នុងផ្សារក្រោម រួចយកមកប្រគល់ឱ្យសមត្ថកិច្ចនគរបាលប៉ុស្តិ៍សង្កាត់ដង្គំ ដើម្បីសួរនាំ និងរៀបចំកសាងសំណុំរឿងបញ្ជូនខ្លួនបន្តទៅអធិការដ្ឋាននគរបាលក្រុងសៀមរាប ចាត់ការបន្តតាមនីតិវិធីច្បាប់។
លោកបានបន្ថែមថា ជនសង្ស័យជាចោរស្ត្រីជើងឆើតខាងលើមានឈ្មោះ យស់ ស្រីម៉ៅ អាយុ៤៣ឆ្នាំ មុខរបរពុំពិតប្រាកដ រស់នៅភូមិថ្មី សង្កាត់ស្វាយដង្គំ ក្រុងខេត្តសៀមរាប ពាក់ព័ន្ធករណីអំពើលួច (យកប្រាក់)។ ចំណែកជនរងគ្រោះ ហួត យឿន ភេទស្រី អាយុ៦៦ឆ្នាំ មានទីលំនៅភូមិស្វាយដង្គំ សង្កាត់ស្វាយដង្គំ ក្រុង-ខេត្តសៀមរាប។
លោកបានបញ្ជាក់ថា មុនពេលកើតហេតុ នៅថ្ងៃទី១០ ខែមិថុនា វេលាម៉ោង១០នាទីព្រឹក ស្ថិតនៅចំណុចបរិវេណក្នុងផ្សារក្រោម ភូមវិហាចិន មានករណីអំពើលួច (យកប្រាក់) ដោយជនសង្ស័យបានដើរទៅផ្សារក្រោមចាស់ ក្នុងគោលបំណងទៅទិញម្ហូប លុះពេលដើរទៅដល់កន្លែងលក់ចានឆ្នាំង ស្រាប់តែឃើញមានស្ត្រីចំណាស់ម្នាក់ដើរចេញពីកន្លែងលក់ចានឆ្នាំបានបន្តិច ហើយណាមួយកន្លែងនោះរាងចង្អៀតព្រោះតែមានមនុស្សច្រើនផងដែរ ជនសង្ស័យក៏ដើរតាមពីក្រោយស្ត្រីរងគ្រោះ រួចក៏យកដៃស្ដាំលូកយកប្រាក់នៅហោប៉ៅខាងឆ្វេងរបស់ជនរងលួចបានលុយចំនួន៥០ដុល្លារ និងលុយខ្មែរចំនួន២៨៤០០០រៀល។
ប្រភពដដែលបន្តថា ក្រោយពេលធ្វើសកម្មភាពលួចលុយរួច ជនរងគ្រោះក៏បានចាប់ដៃជនសង្ស័យជាប់ ហើយក៏បានប្រគល់ឱ្យសន្តិសុខផ្សារយកមកប៉ុស្ដិ៍នគរបាលរដ្ឋបាលសង្កាត់ស្វាយដង្គំ ដើម្បីសួរនាំ។ ក្រោយពីការសាកសួរជនសង្ស័យក៏បានឆ្លើយសារភាពថា ខ្លួនពិតជាបានធ្វើសកម្មភាពលួចយកលុយពីគេពិតប្រាកដមែន។
បច្ចុប្បន្ន ជនសង្ស័យ (ចោរស្រី) ត្រូវបានកម្លាំងនគរបាលជំនាញ រៀបចំកសាងសំណុំរឿង បញ្ជូនខ្លួនទៅកាន់តុលាការខេត្ត ដើម្បីចាត់ការបន្តតាមនីតិវិធីនៃច្បាប់។ ចំណែកលុយ ដែលចោរស្រីលួចពីជនរងគ្រោះនោះ ត្រូវបានសមត្ថកិច្ចនគរបាលជំនាញ ធ្វើការប្រគល់ឱ្យស្ត្រីរងគ្រោះវិញហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ