ខេត្តសៀមរាប ៖ បុរសជាសន្តិសុខម្នាក់បានយកដងអំបោសដែកអុីណុកវាយទៅលើបុរសម្នាក់ទៀតជាអ្នកលក់ការ៉េម បណ្តាលឱ្យរងរបួសបែកក្បាល បន្ទាប់ពីខឹងបុរសជាអ្នកលក់ការ៉េមដែលស្នាក់នៅជួលបន្ទប់ជាប់គ្នានោះជេរប្រមាថប្រពន្ធ និងកូនរបស់ខ្លួន ហើយជនសង្ស័យក៏ទាញដងអំបោសដែកអុីណុកប្រវែង១,១៥ម៉ែត្រ វាយទៅលើជនរងគ្រោះ បណ្តាលឱ្យរងរបួសបែកក្បាលដេរ៧ថ្នេរ ចំណែកជនសង្ស័យត្រូវសមត្ថកិច្ចចាប់ឃាត់ខ្លួន ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង២០នាទីយប់ថ្ងៃទី៩ ខែមិថុនា ឆ្នាំ២០២០ នៅចំណុចបន្ទប់ជួល ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប រហូតដល់ព្រឹកថ្ងៃទី១១ ខែមិថុនា ត្រូវបានកម្លាំងជំនាញរបស់កងរាជអាវុធហត្ថខេត្តចុះឃាត់ខ្លួនជនសង្ស័យដល់ក្នុងផ្ទះ តាមពាក្យបណ្តឹងរបស់ជនរងគ្រោះ ។
តាមប្រភពពីកងរាជអាវុធហត្ថខេត្តបានប្រាប់ឱ្យដឹងនៅរសៀលថ្ងៃទី១១ ខែមិថុនា ឆ្នាំ២០២០ នេះថា ជនសង្ស័យឈ្មោះ ផេង ណាន ភេទប្រុស អាយុ៥៨ឆ្នាំ មុខរបរសន្តិសុខឯកជន ស្នាក់នៅបន្ទប់ជួល ក្នុងភូមិឃុំកើតហេតុខាងលើ ។ ចំណែកជនរងគ្រោះឈ្មោះ ប៉ុន សុភា ភេទប្រុស អាយុ៣៥ឆ្នាំ មុខរបរលក់ការរ៉េម ស្នាក់នៅបន្ទប់ជួលជាប់គ្នាជាមួយជនសង្ស័យ ក្នុងភូមិឃុំកើតហេតុខាងលើ ។
តាមប្រភពដដែលបានឱ្យដឹងបន្តថា មុនពេលកើតហេតុ ជនរងគ្រោះបានជេរម្រមាថទៅលើកូនប្រពន្ធរបស់ជនសង្ស័យ ទើបធ្វើឱ្យជនសង្ស័យទ្រាំមិនបានក៏យកដងអំបោសដែកអុីណុកប្រវែង១,១៥ម៉ែត្រ វាយទៅលើជនរងគ្រោះ បណ្តាលឱ្យរងរបួសត្រង់ថ្ងាសផ្នែកខាងឆ្វេងរយះហូរឈាម បន្ទាប់ពីធ្វើសកម្មភាពរួច ជនសង្ស័យបានចូលដេកក្នុងផ្ទះធ្វើព្រងើយ ចំណែកជនរងគ្រោះត្រូវបានប្រជាពលរដ្ឋជួយដឹកយកទៅព្យាបាលនៅមន្ទីរពេទ្យបង្អែកខេត្តសៀមរាបដេរមុខរបួសចំនួន៧ថ្នេរ ។
ក្រោយពេលកើតហេតុ ជនរងគ្រោះបានមកដាក់ពាក្យបណ្តឹងនៅការិយាល័យជំនាញ បន្ទាប់មកកម្លាំងជំនាញក៏បានធ្វើការឃាត់ខ្លួនជនសង្ស័យខាងលើយកមកសួរនាំនៅការិយាល័យជំនាញកងរាជអាវុធហត្ថខេត្ត ដោយអនុវត្តទៅតាមនីតិវិធីច្បាប់ រួចរៀបចំកសាងសំណុំរឿងបញ្ជូនខ្លួនជនសង្ស័យទៅតុលាការខេត្ត ចាត់ការបន្តតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ