រាជធានីភ្នំពេញ ៖ តារាសម្តែងជើងចាស់តាំងពីឆ្នាំ៩០លោក ជា ណូបូ បានបង្ហាញគម្រោងដ៏ធំមួយនៅក្នុងការងារកសិកម្មនាពេលអនាគត ដើម្បីស្វែងរកប្រាក់ចំណូល ក្រោយពេលលោកនឹងបញ្ចប់អាជីពសម្តែង ខណៈពេលការងារមួយនេះ លោកគ្រោងនឹងចាប់ផ្តើម បន្ទាប់ពីជំងឺកូវីដ១៩ បានផុតរលត់ទៅ។
គម្រោងធ្វើកសិកម្មដ៏ធំរបស់លោកនាពេលនេះ គឺការបើកកសិដ្ឋានដើម្បីចិញ្ចឹមមាន់ បង្កង និងផ្ទះត្រចៀកកាំ នៅលើផ្ទៃដីប្រមាណ៣ហិចតា នាខេត្តកំពង់ស្ពឺ។
លោក ជា ណូបូ បានអះអាងថា គម្រោងធ្វើកសិកម្មនេះ គឺលោកបានគិតមកជាយូរមកហើយ បន្ទាប់ពីការងារថត ដោយសារនេះជាចំណង់ចំណូលចិត្តរបស់លោក តែមិនទាន់មានឱកាស ទើបតែពេលនេះលោកបានសម្រេចធ្វើឲ្យគម្រោងនេះ ចេញជារូបរាងឡើងនាពេលខាងមុខ។
លោកបញ្ជាក់ថា ជាជំហានដំបូង យើងធ្វើជាលក្ខណៈតូចសិន មុនឈានដល់ដំណាក់កាលធំ ហើយតាមការប៉ាន់ស្មានយើងត្រូវចំណាយប្រមាណជា៥ម៉ឺនដុល្លារយ៉ាងតិច ដែលការចំណាយនេះ យើងមិនទាន់គិតលើកិច្ចការមួយចំនួនទៀតសម្រាប់ដំណើរការកសិដ្ឋានមួយនេះ។
លោកបន្តថា ផ្ទៃដីដែលលោកបានទិញនោះ គឺស្ថិតក្នុងតំបន់ដែលអំណោយផលសម្រាប់ធ្វើកសិកម្ម ដោយសារវាជាដីវាលស្រែដាច់ស្រយាល និងជាប់ជើងភ្នំ ដូចនេះប្រសិនបើយើងចិញ្ចឹមមាន់ បង្កង ហើយនោះយើងក៏នឹងអាចឆ្លៀតធ្វើផ្ទះចិញ្ចឹមច្រកៀកកាំថែមទៀតក៏បាន។
បើតាមលោក ជា ណូបូ ថា កសិដ្ឋានចិញ្ចឹមមាន់របស់លោកនាពេលនេះ គឺមិនមែនចិញ្ចឹមមាន់នៅក្នុងស្រុកនោះឡើយ ពោលគឺជាពូជមាន់ដែលនាំចូលពីបណ្តាប្រទេសប៉ែកអឺរ៉ុប ដែលមានតម្លៃថ្លៃ ហើយការចិញ្ចឹមនេះ លោកក៏មានការសហការជាមួយក្រុមហ៊ុនផងដែរ។
លោកបន្ថែមថា មូលហេតុដែលលោកចិញ្ចឹមពូជមាន់បរទេសនេះ គឺដោយសារតែវាមានតម្លៃថ្លៃ ហើយក៏មិនសូវជាពិបាកចិញ្ចឹមដូចមាន់ក្នុងស្រុកនោះដែរ ខណៈពេលដែលយើងក៏មានដៃគូសហសម្រាប់ការទិញមាន់យកទៅលក់ ដោយមិនមានការព្រួយបារម្ភនោះឡើយ។ ចំណែកបង្ក គឺលោកចិញ្ចឹមបង្កកធម្មតា ដែលវាអាចឆាប់រហ័សនៅក្នុងការទទួលផល ព្រោះលោកត្រូវយកចំណូលពីការលក់បង្កនេះ ដើម្បីយកមកទ្រង់ទ្រង់កសិដ្ឋានចិញ្ចឹមមាន់ ព្រោះការចឹញ្ចឹមនេះ វាអាចនឹងប្រើប្រាស់ថវិកាច្រើនគួរសម។
យ៉ាងណាម៉ិញ តាមគម្រោងមួយនេះលោកហាក់មិនទាន់មានការរំពឹងខ្ពស់នៅឡើយទេថា វានឹងអាចទទួលបានជោគជ័យតាមការគម្រោងទុក ប៉ុន្តែតាមរយៈបទពិសោធន៍របស់លោកកន្លងមក គឺវាអាចនឹងជោគជ័យច្រើន ដោយសារបច្ចុប្បន្នផ្ទះរបស់លោកនៅម្តុំចំការដូងនោះក៏មានការចិញ្ចឹមមាន់នេះ ហើយវាក៏ទទួលបានផលជាបន្តបន្ទាប់ផងដែរ។
ដោយឡែកពាក់ព័ន្ធទៅនឹងការងារសិល្បៈវិញលោក ជា ណូបូ បានលើកឡើងថា បន្ទាប់ពីចប់ជំងឺកូវីដ១៩នេះទៅ លោកនឹងប្រញាប់សម្រុកចេញថតបញ្ចប់រឿងឲ្យគេដែលនៅសេសសល់ប្រមាណជា៣០%ទៀត ហើយបន្ទាប់មកលោកអាចនឹងបញ្ចប់ការសម្តែងតែម្តង។
លោកបញ្ជាក់ថា ជាធម្មតា ប្រសិនបើលោកចេញទៅធ្វើកសិកម្មនៅខេត្តហើយនោះ គឺលោកនឹងស្នាក់ទីនោះ ដែលវាមានចម្ងាយផ្លូវទៅមកប្រហែល៨០គីឡូម៉ែត្រ ដូចនេះលោកអាចនឹងមិនមានពេលវេលាគ្រប់គ្រាន់ទៀតទេ សម្រាប់ការងារសម្តែងនេះ។ យ៉ាងណា ក្នុងនាមជាតារាសម្តែងមួយរូប លោកនៅតែសម្តែងការសោកស្តាយនូវអាជីពសម្តែងនេះដដែល ប៉ុន្តែដោយសារយោងទៅលើវ័យកាន់តែចាស់ទៅហើយនោះ រូបលោកត្រូវការការងារមួយដែលល្អជាប់លាប់ និងអាចមានលុយសល់ កុំឱ្យមហាជនមួយចំនួនតែងរិះគន់ថា អ្នកសិល្បៈពេលចាស់ទៅ គឺគ្មានអ្វីសោះនោះឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ