ខេត្តកំពង់ឆ្នាំង ៖ រដូវបិទនេសាទបានមកដល់ហើយ គឺចាប់បិទតាំងពីថ្ងៃទី១ ខែមិថុនា ហើយនឹងបើកឱ្យនេសាទវិញនៅថ្ងៃទី១ ខែតុលា នេះ សម្រាប់ប្រជាពលរដ្ឋនៅតំបន់ជុំវិញបឹងទន្លេសាប នេះគឺជាច្បាប់ស្តីពីជលផលដែលបានកំណត់…
ខេត្តកំពង់ឆ្នាំង ៖ រដូវបិទនេសាទបានមកដល់ហើយ គឺចាប់បិទតាំងពីថ្ងៃទី១ ខែមិថុនា ហើយនឹងបើកឱ្យនេសាទវិញនៅថ្ងៃទី១ ខែតុលា នេះ សម្រាប់ប្រជាពលរដ្ឋនៅតំបន់ជុំវិញបឹងទន្លេសាប នេះគឺជាច្បាប់ស្តីពីជលផលដែលបានកំណត់ ។ ប៉ុន្តែបើគិតត្រឹមថ្ងៃទ១១ ខែ មិថុនានេះ ស្ថានភាពទឹកទន្លេនៅមិនទាន់ប្រែប្រួលឡើងតាមរបបទឹកភ្លៀង ឬទឹកទន្លេមេគង្គនោះឡើយ ។ ស្ថានភាពនេះធ្វើឱ្យប្រជាពលរដ្ឋលើកឡើងថា ៖ ទិន្នផលត្រីបានធ្លាក់ចុះពីមួយឆ្នាំទៅមួយឆ្នាំ តាមការប្រែប្រួលអាកាសធាតុ, កត្តាមនុស្ស និងវារីអគ្គីសនី ។
មន្ត្រីជំនាញជលផលដែលសុំមិនបញ្ចេញឈ្មោះបានលើកហេតុផលថា៖ ជាធម្មតា នៅខែវស្សា ឬ ក្នុងអំឡុងខែឧសភា និងខែមិថុនា ភ្លៀងបានចាប់ផ្តើមធ្លាក់ ហើយបានហូរចូលទន្លេសាប គួបផ្សំរបបទឹកទន្លេមេគង្គ ហូរចាក់ចូលមកទៀតទឹកទន្លេសាបបានចាប់ផ្តើមឡើង គឺជាពេលត្រីចាប់ផ្តើមរកទីជម្រកសម្រាប់ពងកូន។ ប៉ុន្តែចាប់តាំងពីមានការកសាងវារីអគ្គីសនីនៅប្រទេសចិនជាច្រើនកន្លែងជាបន្តបន្ទាប់ ជាច្រើនកន្លែង និងចុងក្រោយ មានការកសាង វារីអគ្គីសនី នៅ «ដនសាហុង» ប្រទេសឡាវ បន្ថែម១ទៀត ធ្វើឱ្យរបបទឹកទន្លេមេគ្គងកាន់តែអស់ទៅ និងរហូតដល់ខែកញ្ញា ដែលទឹកបានពេញតម្រូវការរបស់វារីអគ្គីសនី នៅស្រុកគេ ទើបហូរចូលធ្លាក់ចូលមកស្រុកយើង ។
តាមប្រភពដដែលបានលើកឡើងថា ជាធម្មតា នៅខែមិថុនា, កក្កដា និងខែសីហា របបទឹកទន្លេមេគង្គបានហូរ ចាក់មកជួយបំពេញផ្ទៃបឹងទន្លេសាប ។ របបទឹកទន្លេមេគង្គនេះ ក៏បាននាំមកនូវដីល្បប់ និងកូនត្រី ទើបញាស់ល្អិតៗ ច្រើនប្រភេទ ដែលភាសារជំនាញហៅថា៖ ត្រីបន្លាស់ទីឆ្ងាយ មានដូចជា ត្រីពោ ត្រីប្រា ត្រីរៀល និងត្រីឆ្កោក ជាដើម។ ពេលវាហូរមកតាមទឹកទម្រាំចូលដល់បឹងទន្លេសាប វាបានធំធាត់ជាបណ្តើរៗ ។
តាមប្រភពដដែលបានលើកឡើងបន្តថា លុះដល់ខែ តុលា ទឹកបានហូរចេញទៅវិញ គឺដល់រដូវបើកនេសាទ ។ ប៉ុន្តែបច្ចុប្បន្ននេះ របបទឹកទន្លេមេគង្គ បានអូសបន្លាញ រហូតដល់ខែកញ្ញា ទើបហូរចូលមក គឺបានតែ១ ខែ គឹដល់ពេលហូរចេញវិញ ម្លោះហើយវាបានខុសពីធម្មជាតិនៃការវិវឌ្ឍន៍ ការបង្ករកំណើតរបស់ពូជត្រីទាំងនោះ ម្យ៉ាងវិញទៀតបើមានកូនត្រីពូជ ដូចបានរៀបរាប់មកខាងលើ ក៏គ្មានត្រីណាធំធាត់ទាន់ដែរ ។ សម្រាប់ទន្លេសាប បច្ចុប្បន្នពឹងតែម្យ៉ាងគត់គឺ របបទឹកភ្លៀង ដែលហូរធ្លាក់នៅតាមបណ្តាខេត្តមួយចំនួន នៅជុំវិញបឹងទន្លេសាប សម្រាប់ឱ្យពូជត្រីធ្វើការបង្កកំណើតរបស់វាតែប៉ុណ្ណោះ ហើយមិនសង្ឃឹមថា៖ ផលត្រីបឹងទន្លេសាប នឹងសំបូរ ហូរហៀរដូច កាលពីប៉ុន្មានឆ្នាំមុនទៀតនោះទេ ។
បន្ថែមពីលើនេះទៀត ប្រជាពលរដ្ឋកាន់តែកើន ស្បៀងអាហារកាន់តែតម្រូវការ ។ ពួកគាត់បានប្រព្រឹត្តបទល្មើសនេសាទខុសច្បាប់ ដោយបានប្រើប្រាស់ របាំងស្បៃមុង របាំងសាច់អួន មានប្រវែងរាប់គីឡួម៉ែត្រ ប្រើប្រាស់ឧបករឆក់ លបសម័យថ្មីប្រើស១០០ និងនេសាទក្នុងរដូវហាមឃាត់ជាដើម ។ កត្តាទាំងអស់នេះហើយដែល មិនសង្ឃឹមថាទិន្នផលត្រីនឹងសំបូរវិញនោះទេ ។
ផ្តើមចេញពីបញ្ហានេះ ប្រមុខរាជរដ្ឋាភិបាល,ក្រសួងកសិកម្ម, និងនាយកដ្ឋាន,បានដាក់ចេញផែន ការ វារីវប្បកម្ម ដោយបំផុសឱ្យប្រជាពលរដ្ឋចិញ្ចឹមត្រីជាលក្ខណៈគ្រួសារជាសហគមន៍ នៅតាមស្រះ បឹងបួរនិង បង្កើតតំបន់អភិរក្ស ជាច្រើនកន្លែង ដើម្បីថែរក្សាមេពូជត្រី នៅតាមបឹង តាមទន្លេ ដែលមានស្ថានភាពទឹកជ្រៅ ដើម្បីធានាដល់អ្វីដែលមន្ត្រីជំនាញតែងបានអះអាងថា ដើម្បីនិរន្តភាព៕
ចែករំលែកព័តមាននេះ