ប្រទេសប្រេស៊ីល ៖ សហព័ន្ធកីឡាបាល់ទាត់ប្រេស៊ីល (CBF) បានបញ្ចេញមូលនិធិជំនួយ ដែលមានទឹកប្រាក់ចំនួន ២១លានដុល្លារ ដើម្បីជួយក្លិបនៅលីគកំពូលប្រេស៊ីល (Serie A) រួមចំណែកជួយកាត់បន្ថយផលប៉ះពាល់ផ្នែកហិរញ្ញវត្ថុ អំឡុងពេលមានវិបត្តិកូវីដ-១៩។
នៅក្នុងសេចក្តីថ្លែងការណ៍របស់ CBF ក៏បានបន្ថែមទៀតថា ប្រាក់ជំនួយប្រមាណ ៣លានដុល្លារបន្ថែមទៀត នឹងត្រូវផ្តល់ជូនក្លិបដែលនៅក្នុងក្របខណ្ឌលំដាប់ទី២ (Serie B) ផងដែរ។
CBF ក៏ធ្លាប់បានផ្តល់ប្រាក់ជំនួយចំនួនប្រមាណ ៤លានដុល្លារ ដល់ក្លិបនៅក្នុងក្របខ័ណ្ឌលំដាប់ទី៣ និងទី៤ ក៏ដូចជាការបែងចែកទៅឱ្យក្របខណ្ឌបាល់ទាត់នារីផងដែរ។
សូមបញ្ចាក់ថា សកម្មភាពបាល់ទាត់ក្នុងប្រទេសប្រេស៊ីល ត្រូវផ្អាកទាំងស្រុងចាប់តាំងពីខែមីនា ដោយសារការផ្ទុះឡើងពីវីរុសកូវីដ-១៩ ហើយបច្ចុប្បន្នក្លិបមួយចំនួនកំពុងបានព្យាយាមដោះស្រាយជាមួយបញ្ហា ការបាត់បង់ប្រាក់ចំណូលពីការប្រកួត និងការលក់សំបុត្ររបស់ខ្លួន។
ប្រទេសប្រេស៊ីល បច្ចុប្បន្នកំពុងរងគ្រោះខ្លាំងពីវីរុសជាសកល (កូវីដ-១៩) ដែលមានអ្នកស្លាប់ខ្ពស់បំផុតនៅតំបន់អាមេរិកខាងត្បូងសរុបចំនួន ៣៨,៤៩៧នាក់ និងមានអ្នកឆ្លងសរុប ៧៤២,០៨៤នាក់ ដោយឈរនៅលេខរៀងទី២ បន្ទាប់សហរដ្ឋអាមេរិក៕ (ដកស្រង់ចេញពី Eurosport)
ចែករំលែកព័តមាននេះ