រាជធានីភ្នំពេញ៖ តារាចម្រៀងផលិតកម្មហង្សមាសពេជ្រ សោភា បានរំឭកពីអតីតកាលជីវិតតោកយ៉ាកមិនអាចបំភ្លេចបាន ខណៈនាងចាប់កំណើតក្នុងគ្រួសារក្រីក្រនៅជនបទ ។ ការរំឭកនេះនៅក្នុងថ្ងៃខួបកំណើតរបស់នាងនាថ្ងៃទី៩ ខែមិថុនា ឆ្នាំ២០២០ ។
យ៉ាងណាក្ដីពេជ្រ សោភា បានបង្ហាញពីភាពរឹងមាំរបស់ខ្លួន ដែលបានខិតខំតស៊ូយ៉ាងលំបាកអស់ពេលជាច្រើនឆ្នាំ រហូតមានជីវភាពរស់នៅយ៉ាងល្អប្រសើរនាពេលបច្ចុប្បន្ន បើទោះបីជានាពេលនេះនាងបាត់បង់ឪពុកជាទីស្រឡាញ់ដែលធ្លាប់ប្រៀនប្រដៅនាងក៏ដោយ ។
ពេជ្រ សោភា បានបញ្ជាក់តាមរយៈសំណេរបង្ហោះនៅលើហ្វេសប៊ុកថា «ថ្ងៃនេះជាថ្ងៃដែលម្តាយខ្ញុំបានផ្តល់ជីវិតឲ្យខ្ញុំ ហើយក៏ថ្ងៃដែលម៉ែពិបាកបំផុត ពុកម៉ែខ្ញុំជាកូនអ្នកក្រ ក្រដល់ហៅមិនឮ តែខ្ញុំមិនដែលអន់ចិត្តទេដែលកើតមកជាកូនពុកម៉ែ តែព្រោះតែភាពក្រនេះហើយទើបគ្រួសារខំរក មេរៀនជីវិតត្រូវខំ ដើម្បីគ្រួសារយើង ព្រោះតែយើងក្រ អគុណរពុក អគុណរម៉ែដែលបង្រៀនកូនឲ្យចេះរឹងមាំ »។
សារដែលពេជ្រ សោភា បានបង្ហោះនោះ ប្រិយមិត្តអ្នកគាំទ្ររបស់នាងជាច្រើនបានជូនពរថ្ងៃកំណើតដល់រូបនាង ជាមួយនឹងគាំទ្រឲ្យតារាចម្រៀងរីបនេះបន្តភាពរឹងមាំទៅមុខទៀត ដ្បិតបច្ចុប្បន្ននាងបានឈរនៅក្នុងតំណែងតារាចម្រៀងជួរមុខនៅក្នុងផលិតកម្មហង្សមាស ។
ទម្រាំឈានមកដល់ចំណុចនេះ ពេជ្រ សោភា បានឆ្លងកាត់ព្យុះជីវិតជាច្រើនតាំងពីកុមារភាព តាំងពីជាអ្នកលក់ទឹកអំពៅ រហូតក្លាយជាតារាចម្រៀងមួយរូបដែលមានកេរ្តិ៍ឈ្មោះល្បី ។
តារាចម្រៀងពេជ្រ សោភា បានចាប់កំណើតនៅខេត្តខេត្តព្រៃវែង ។ នាងគឺជាកូនពៅក្នុងចំណោមបងប្អូនស្រីបួននាក់ ។
ពេជ្រ សោភា ជាសមាជិកគ្រួសារមួយរូបដែលត្រូវធានារ៉ាប់រងរកប្រាក់ចំណូលសម្រាប់គ្រួសាររបស់នាងតាមរយៈការលក់ទឹកអំពៅនៅតាមដងផ្លូវ ខណៈពេលចំណូលពីការលក់នេះស្ទើរតែមិនគ្រប់គ្រាន់សម្រាប់ជីវភាពគ្រួសារ ។ នៅពេលនាងរៀដល់ថ្នាក់ទី១១ នៅវិទ្យាល័យនាងក៏បោះបង់ចោលការសិក្សា និងបានមកប្រកបអាជីពជាអ្នកចម្រៀងនៅភោជនីយដ្ឋានមួយក្នុងរាជធានីភ្នំពេញ ។
ពេលនោះហើយដែលជាសំណាងល្អ ពេជ្រ សោភា ត្រូវបានថៅផលិតកម្មហង្សមាសចាប់អារម្មណ៍ពីទឹកដមសំឡេងរបស់នាង ក៏ផ្តល់ឱកាសឲ្យនាងបានចូលច្រៀងក្នុងផលិតនៅក្នុងអំឡុងឆ្នាំ២០០៤ ហើយបន្តមកទល់បច្ចុប្បន្ននេះ ។
នៅក្នុងផលិតកម្មរស្មីហង្សមាស បទចម្រៀងដំបូងរបស់ពេជ្រ សោភា ដែលល្បីគឺបទ « Better day» ជាមួយDJ-ស្តី ហើយបន្ទាប់មកមានបទល្បីជាច្រើនទៀតទាំងបទទោល និងបទឆ្លងឆ្លើយ ៕
ចែករំលែកព័តមាននេះ