ប្រទេសចិន ៖ តាមប្រភពព័ត៌មាន Shanghaiist បានឱ្យដឹងថា និស្សិតម្នាក់នៅឯសាកលវិទ្យាល័យមួយក្នុងខេត្តសានស៊ី ប្រទេសចិន បានធ្វើបញ្ចប់ជីវិតខ្លួនឯងកាលពីចុងសប្តាហ៍ បន្ទាប់ពីត្រូវបានគេចាប់បាន ពេលលួចបើកចម្លងនៅក្នុងការប្រឡង។…
ប្រទេសចិន ៖ តាមប្រភពព័ត៌មាន Shanghaiist បានឱ្យដឹងថា និស្សិតម្នាក់នៅឯសាកលវិទ្យាល័យមួយក្នុងខេត្តសានស៊ី ប្រទេសចិន បានធ្វើបញ្ចប់ជីវិតខ្លួនឯងកាលពីចុងសប្តាហ៍ បន្ទាប់ពីត្រូវបានគេចាប់បាន ពេលលួចបើកចម្លងនៅក្នុងការប្រឡង។ នៅពេលនេះ ក្រុមគ្រួសាររបស់និស្សិតរួបនេះ បានរករឿងគ្រូដែលមើលការខុសត្រូវការប្រឡងនេះ។
និស្សិតឆ្នាំទី២ វ័យ២០ឆ្នាំ ដែលមានឈ្មោះហៅក្រៅថា ស៊ឺ (Shi) នៅសាកលវិទ្យាល័យ North University of China ត្រូវបានប្រទះឃើញដោយគ្រូគ្រប់គ្រងការប្រឡង ពេលកំពុងចម្លងឯកសារតាមរយៈទូរស័ព្ទដៃ ដែលលាក់នៅក្រោមតុ កាលពីរសៀលថ្ងៃសៅរ៍។
បន្ទាប់ពីគ្រូសម្រេចដកក្រដាស់ប្រឡងរបស់ Shi ចេញ គេបានដើរចេញពីបន្ទប់ ហើយឡើងទៅដំបូលរបស់អគារ រួចក៏លោតចុះមកក្រោមតែម្តង ។ មុនពេលគាត់លោត គាត់បានផ្ញើសារចុងក្រោយទៅម្តាយរបស់គាត់ ដោយនិយាយថា «សុំទោស» ។
បន្ទាប់ពីមរណភាពរបស់និស្សិតរូបនេះ សមាជិកគ្រួសាររបស់គាត់មួយចំនួន បានចោទប្រកាន់សាកលវិទ្យាល័យ និងគ្រូបង្រៀនថា ជាមូលហេតុដែលធ្វើឱ្យជីវិតរបស់ Shi ត្រូវបាត់បង់។
សាច់ញាតិម្នាក់របស់ Shi បានប្រាប់សារព័ត៌មាន Global Times កាលពីថ្ងៃច័ន្ទថា៖ «ពួកយើងទទួលស្គាល់ថា វាជាកំហុសមួយដែលបើកចម្លងពេលកំពុងប្រឡង។ តែនេះមិនមែនមានន័យថា សាកលវិទ្យាល័យរួចខ្លួននោះទេ ព្រោះ Shi បានបាត់បង់ជីវិត នៅក្នុងម៉ោងសិក្សានៅទីធ្លាសាលា»។
ទោះយ៉ាងណា កាលពីថ្ងៃអង្គារ៍ លោកសាកលវិទ្យាធិការនៃសាកលវិទ្យាល័យ បានប្រាប់អ្នកយកព័ត៌មានថា ថ្នាក់ដឹកនាំជឿជាក់ថា គ្រូដែលគ្រប់គ្រងការប្រឡងនោះមិនមានអ្វីខុសទេ។ បញ្ហានេះបានក្លាយជាប្រធានបទដ៏ក្តៅគគុកមួយនៅលើបណ្តាញសង្គមចិន នៅសប្តាហ៍នេះ ដោយមានអ្នកនិយមលេងអ៊ីនធើរណេតជាច្រើន បានយល់ស្របនឹងការលើកឡើងរបស់សាកលវិទ្យាធិការ៕ ដកស្រង់ចេញពីវេបសាយ ៖ shanghaiist (កែសម្រួលដោយ ៖ បុប្ផា)
ចែករំលែកព័តមាននេះ