ប្រទេសអង់គ្លេស ៖ ការប្រកួតក្របខណ្ឌលំដាប់ទី៣ និងទី៤ (League One, Two) រដូវកាលនេះ ត្រូវបានប្រកាសបញ្ចប់មុនពេលកំណត់ បន្ទាប់ពីមានការបោះឆ្នោតជាផ្លូវការពីក្លិបទាំងអស់កាលពីថ្ងៃអង្គារ៍។
ម្ចាស់ជើងឯកទាំងពីរក្របខណ្ឌ នឹងត្រូវបានទូទាត់តាមរយៈពិន្ទុក្នុងមួយប្រកួត ខណៈក្រុមត្រូវឡើងថ្មី (Promotion), ក្រុមត្រូវកាត់ចោល (Relegation) និងការប្រកួតជម្រុះ (Play-Off) នៅតែមានដដែល។
ជាលទ្ធផលយើងឃើញថាក្រុម Coventry City (ម្ចាស់ជើងឯក League One) និងក្រុម Rotherham United (លេខ២) ត្រូវឡើងទៅលេងក្របខណ្ឌ Championship រដូវកាលក្រោយ។
ដោយឡែកក្រុម Swindon Town (ម្ចាស់ជើងឯក League Two), ក្រុម Crewe Alexandra និងក្រុម Plymouth Argyle នឹងត្រូវឡើងទៅលេងនៅ League One រដូវកាលក្រោយ។ ខណៈក្រុមបាតតារាង Stevenage នៅ League Two មិនទាន់កំណត់ថា ត្រូវកាត់ចោលទៅលេង National League នៅឡើយទេ បន្ទាប់ពីក្រុម Macclesfield Town ត្រូវបានគេចោទប្រកាន់ពីបទ ប្រព្រឹត្តខុសឆ្គងនឹងវិន័យរបស់ស្ថាប័ន EFL កាលពីថ្ងៃទី១ ខែមិថុនាកន្លងទៅ ហើយបញ្ហានេះកំពុងត្រូវបានបន្តពិភាក្សា។
សូមជម្រាបថា ការបោះឆ្នោតលីគទាំង២ ត្រូវបានអនុម័តដោយសំឡេងភាគច្រើនលើសលុប។ EFL ក៏បានបញ្ជាក់ផងដែរថា ការប្រកួតជម្រុះ (Play-Off) វគ្គផ្តាច់ព្រ័ត្រ League Two នឹងត្រូវធ្វើឡើងនៅកីឡដ្ឋានជាតិ Wembley នៅថ្ងៃទី២៩ ខែមិថុនា។ ខណៈនៅមិនទាន់មានកាលបរិច្ឆេទណាមួយ ត្រូវបានបញ្ជាក់ពី EFL សម្រាប់ការប្រកួតជម្រុះ League One នៅឡើយទេ។
សូមបញ្ជាក់ថាលីគបាល់ទាត់អង់គ្លេស ត្រូវបានផ្អាកសកម្មភាពទាំងស្រុងកាលពីថ្ងៃទី១៣ ខែមីនា ក្រោយការផ្ទុះខ្លាំងនៃវីរុសកូវីដ-១៩ ខណៈបច្ចុប្បន្នមានតែក្របខណ្ឌ Premier League និង Championship ដែលប្រកាសបន្តសកម្មភាពប្រកួតប្រជែងឡើងវិញ នៅចុងខែមិថុនានេះ ៕ (ដកស្រង់ចេញពី៖ BBC)
ចែករំលែកព័តមាននេះ