រាជធានីភ្នំពេញ ៖ មន្ត្រីជាន់ខ្ពស់ក្រសួងមហាផ្ទៃ នៅព្រឹកថ្ងៃទី០៩ មិថុនា ២០២០នេះ បានបដិសេធថា ពុំបានចាប់ ឬអនុវត្តច្បាប់ចំពោះសកម្មជនអាវក្រហមថៃម្នាក់ឈ្មោះ វ៉ាន់ឆាឡឹម សាតស័ក្តិសិទ្ធ (Wanchalearm Satsaksit) នោះទេ ហើយសមត្ថកិច្ចកម្ពុជាកំពុងធ្វើការស៊ើបអង្កេតចំពោះព័ត៌មានមួយនេះ ដែលពាក់ព័ន្ធនឹងការបាត់ខ្លួនជនជាតិថៃរូបនេះ ។
លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ និងជាអ្នកនាំពាក្យនគរបាលជាតិ បានអោយដឹងថា សមត្ថកិច្ចកម្ពុជា បដិសេធចំពោះការចាប់ខ្លួនជនជាតិថៃឈ្មោះ វ៉ាន់ឆាឡឺម សាតស័ក្តិសិទ្ធិ ព្រោះសមត្ថកិច្ចកម្ពុជាមិនបានអនុវត្តច្បាប់ចំពោះបុគ្គលរូបនេះទេ ។ ដោយឡែកវីដេអូពីកាមេរ៉ាសុវត្ថិភាព ពាក់ព័ន្ធនឹងបុគ្គលរូបនេះ សមត្ថកិច្ចនឹងធ្វើការស្រាវជ្រាវ ។
សូមជម្រាបថា លោក វ៉ាន់ឆាឡឹម សាតស័ក្តិសិទ្ធិ Wanchalearm Satsaksit អាយុ៣៧ឆ្នាំ គឺជាសកម្មជនម្នាក់ និងមានទំនាក់ទំនងនយោបាយជាមួយក្រុមអាវក្រហម បានភៀសខ្លួនមកកាន់កម្ពុជា នៅក្រោយរដ្ឋប្រហារយោធា នៅក្នុងប្រទេសថៃ កាលពីខែឧសភា ២០១៤ និងបន្តសកម្មភាពនយោបាយខណៈពេលកំពុងនិរទេសខ្លួន ដោយតែងតែធ្វើអត្ថាធិប្បាយរិះគន់រដ្ឋាភិបាលថៃ នៅលើបណ្តាញសង្គម ។ ត្រូវបានអាជ្ញាធរថៃ ចេញដីកាតាមចាប់ខ្លួន កាលពីខែមិថុនា ២០១៨ ពីបទរំលោភលើច្បាប់ឧក្រិដ្ឋកម្មបច្ចេកវិទ្យារបស់ប្រទេសថៃ ។
កាសែតថៃ បានផ្សាយថា លោក វ៉ាន់ឆាឡឹម សាតស័ក្តិសិទ្ធិ ត្រូវចាប់ខ្លួននៅវេលាម៉ោងជិត៥ល្ងាចកាលពីថ្ងៃព្រហស្បតិ៍ ទី០៤ មិថុនា ២០២០ ដាក់ក្នុងរថយន្តពណ៌ខ្មៅម៉ាក នៅមុខខុនដូមួយ ដែលសកម្មជនរូបនេះស្នាក់ច្រើនឆ្នាំមកហើយ ក្នុងខណ្ឌជ្រោយចង្វារ រាជធានីភ្នំពេញ ។
ដោយឡែក នៅព្រឹកថ្ងៃចន្ទ ម្សិលមិញនេះ បុគ្គលិកខាងស្ថានទូតថៃប្រចាំនៅកម្ពុជា បានប្រាប់ថា ពួកគេមិនមានព័ត៌មានទាក់ទងនឹងការបាត់ខ្លួនលោក វ៉ាន់ឆាឡឹម សកម្មជនថៃដែលរិះគន់រដ្ឋាភិបាលថៃនោះទេ ។
ចំណែកឯលោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានអោយដឹងកាលពីព្រលប់ថ្ងៃទី៨ មិថុនា ថា ក្រសួងការបរទេសកម្ពុជា ក៏បានទទួលកំណត់ទូតពីស្ថានទូតថៃប្រចាំកម្ពុជា កាលពីថ្ងៃទី៨ ខែមិថុនា ដោយបានសាកសួរអំពីព័ត៍មានចាប់ខ្លួនលោក វ៉ាន់ឆាឡឹម សាតស័ក្តិសិទ្ធិ ហើយខាងទូតថៃក៏បានចោទសួរថា ព័ត៌មាន ដែលបានផ្សព្វផ្សាយអំពីការចាប់ខ្លួននោះពិត ឬមិនពិត ? ហើយសុំឲ្យខាងអាជ្ញាធរកម្ពុជាផ្ទៀងផ្ទាត់ព័ត៌មានដែលថាមានជនជាតិថៃត្រូវបានចាប់ខ្លួនហ្នឹង ។
លោក កុយ គួង បាន បន្តថា ទាក់ទងការតវ៉ា នៅមុខស្ថានទូតកម្ពុជាប្រចាំនៅប្រទេសថៃ គឺក្រុមអ្នកតវ៉ា បានយកញត្តិទៅដាក់នៅស្ថានទូត ដើម្បីទាមទារឲ្យមានការស៊ើបអង្កេតថា តើអ្នកដែលចាប់ខ្លួននៅទីណា ? ក្រុមអ្នកតវ៉ា បានអះអាងថា ពួកគេដឹងតាមបណ្តាញសារព័ត៌មានផ្សេងៗថា មានការចាប់ខ្លួនលោក វ៉ាន់ឆាឡឹម សាតស័ក្តិសិទ្ធិ ។
កាលពីថ្ងៃអាទិត្យ បើតាមកាសែតបាងកកប៉ុស្តិ៍ បានចុះផ្សាយថា ក្រុមគ្រួសាររបស់សកម្មជនថៃ លោកវ៉ាន់ឆាឡឹម បានអំពាវនាវឲ្យរដ្ឋាភិបាលថៃ និងស្ថាប័នអន្តរជាតិ ជួយស្វែងរកសកម្មជនថៃ ដែលបាត់ខ្លួននៅកម្ពុជា ។
កាសែតបាងកកប៉ុស្តិ៍ នៅថ្ងៃច័ន្ទ បានផ្សាយដែរថា ប្រជាជនថៃមួយក្រុម ដែលគាំទ្រសកម្មជនរូបនោះ បានតវ៉ានៅមុខស្ថានទូតខ្មែរប្រចាំនៅទីក្រុងបាងកកផងដែរ ដោយមានកាន់ក្រដាសបង្ហាញសារថា ជួយដល់សកម្មជន វ៉ាន់ឆាឡឹម ។ ពួកគេក៏ជំរុញឲ្យអាជ្ញាធរកម្ពុជា ជួយស្វែងរកសកម្មជន ដែលបាត់ខ្លួននេះផងដែរ ៕
ចែករំលែកព័តមាននេះ