រាជធានីភ្នំពេញ ៖ វាជារឿងចម្លែកមួយដែលកម្ពុជា ធ្លាប់តែនាំចូលជ្រូកពីប្រទេសវៀតណាមមកផ្គត់ផ្គង់លើទីផ្សារព្រោះវៀតណាមគេសំបូរជ្រូកនិងមានតម្លៃថោក តែនៅពេលបច្ចុប្បន្ននេះ បែរជាកម្ពុជានាំចេញជ្រូកខ្លះៗទៅកាន់ប្រទេសវៀតណាម និងមានឈ្មួញខ្លះនាំពីប្រទេសថៃហើយបន្តនាំចេញទៅប្រទេសវៀតណាម ដោយសារតែទីផ្សារជ្រូកនៅប្រទេសវៀតណាមមានតម្លៃខ្ពស់ជាងជ្រូករស់នៅកម្ពុជា ។
បើតាមលោកស្រ៊ុន ពៅប្រធានសមាគមអ្នកចិញ្ចឹមសត្វកម្ពុជា បានអោយដឹងថា សព្វថ្ងៃនេះ តម្លៃជ្រូករស់នៅក្នុងប្រទេសវៀតណាមមានតម្លៃខ្ពស់ណាស់ គឺចន្លោះពី១៧០០០រៀលទៅ១៨០០០រៀលក្នុងមួយគីឡូក្រាម ដែលធ្វើអោយដូច្នេះ អ្នកនាំចូលជ្រូកពីប្រទេសថៃចង់មិនចង់ នឹងនាំចេញទៅវៀតណាមបន្ត ដើម្បីបានចំនេញ ។ ម្យ៉ាងទៀត អ្នកចិញ្ចឹមជ្រូកនៅតាមព្រំដែន ក៏បានលួចដឹកចេញតាមម៉ូតូម្ដងពីរបីក្បាលទៅប្រទេសវៀតណាម ដើម្បីផ្គត់ផ្គង់ដែលជាហេតុធ្វើអោយជ្រូករស់ក្នុងប្រទេសកម្ពុជាកាន់តែឡើងថ្លៃថែមទៀត ។
លោកបន្តថា បើទោះបីជាជ្រូកនាំចូលពីថៃនិងពីកម្ពុជាមួយចំនួន បានហូរចេញទៅកាន់ប្រទេសវៀតណាមក្ដីក៏ប៉ុន្តែ ការផ្គត់ផ្គង់លើទីផ្សារក្នុងប្រទេសកម្ពុជានៅតែមិនខ្វះខាតជ្រូកសម្រាប់ពលរដ្ឋនោះទេ ព្រោះកសិករនិងម្ចាស់កសិដ្ឋានជាច្រើនបានចាប់ផ្ដើមចិញ្ចឹមឡើងវិញហើយបន្ទាប់ពីស្ថានភាពជំងឺប៉េសជ្រូកអាហ្វ្រិកបានស្ងប់ស្ងាត់មួយរយៈ ។ លោកថា៖« ការឡើងថ្លៃជ្រូករស់នៅលើទីផ្សារប្រទេសកម្ពុជា ក្នុងពេលនេះ គឺជាការល្អប្រសើរណាស់ ដើម្បីអោយកសិករ និងកសិដ្ឋានចិញ្ចឹមជ្រូក រៀបចំទ្រុង និងកសិដ្ឋានឡើងវិញ បើមិនឡើងថ្លៃទេ ហើយនៅតែបន្តលក់ជ្រូកខាតទៀតនោះតើថ្ងៃណាទើបកម្ពុជាបញ្ចប់ការនាំចូលទាំងស្រុកពីប្រទេស មកផ្គត់ផ្គង់ ។
ចំណែកការឡើងថ្លៃជ្រូកក្នុងពេលបច្ចុប្បន្ននេះ គឺវាមិនហួសហេតុមិនអាចទទួលយកបាននោះទេ ជាក់ស្ដែងដូចបានដឹងហើយថានៅវៀតណាមវាឡើងថ្លៃខ្ពស់និងមិនមានជ្រូកសម្រាប់ផ្គត់ផ្គង់លើទីផ្សារប្រទេសគេផង ដែលវាជាឱកាសល្អមួយសម្រាប់កម្ពុជា »។លោកតាន់ ផាន់ណារ៉ា ប្រតិភូទទួលរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ បានអោយដឹងថា កម្ពុជាបានកំណត់និងរឹតបន្តឹងនូវការនាំចូលជ្រូកពីប្រទេសក្រៅ មកផ្គត់ផ្គង់នៅលើទីផ្សារ ដោយសព្វថ្ងៃនេះកម្ពុជានាំចូលជ្រូកតែពីប្រទេសថៃមួយប៉ុណ្ណោះ ដោយសារតែតម្លៃជ្រូកនៅប្រទេសថៃ នៅមានតម្លៃទាប បើធៀបនឹងតម្លៃជ្រូកនៅប្រទេសវៀតណាម ។
លោកបន្តថាចាប់តាំងពីមានការរឹតបន្តឹងការនាំចូលមកក៏ឃើញថាវាចាប់ផ្ដើមល្អប្រសើរចំពោះទីផ្សារនៃជ្រូករស់ ។ ជាជំហានបន្ទាប់ក្រសួងក៏បានចាប់ផ្ដើមរឹតបន្តឹងនូវការនាំចូលសាច់ដទៃទៀត ដើម្បីទុកលទ្ធភាពអោយអ្នកក្នុងស្រុកជាអ្នកផ្គត់ផ្គង់វិញម្ដង ហើយក៏អាចធ្វើអោយពួកគាត់រកប្រាក់ចំណេញពីរបរចិញ្ចឹមជ្រូកនិងសត្វចិញ្ចឹមផ្សេងៗផងដែរ ។ចំណែកលី ឡាវីល អគ្គនាយកក្រុមហ៊ុន M’s Pig របស់អ្នកឧកញ៉ាម៉ុង ឬទ្ធីក៏បានអោយដឹងផងដែរ បើសិនជាស្ថានភាពទីផ្សារជ្រូករស់នៅកម្ពុជា ល្អប្រសើរដូចជាពេលនេះ មិនយូរទេអ្នកចិញ្ចឹមកាន់តែច្រើន ហើយកម្ពុជានឹងឈានទៅដល់ការផ្គត់ផ្គង់បានទាំងស្រុង ដោយមិនចាំបាច់នាំចូលពីខាងក្រៅប្រទេសដើម្បីផ្គត់ផ្គង់ទៀតនោះទេ ។
គួរបញ្ជាក់ថា នៅក្នុងសម័យកូវីដ១៩នេះ វិស័យកសិកម្មកម្ពុជា ហាក់មានកំណើននិងសកម្មភាពល្អប្រសើរ ដោយកសិករ អាចធ្វើដាំដុះបន្លែ ផ្គត់ផ្គង់ទីផ្សារ និងទទួលបានតម្លៃសមរម្យផងដែរ ។ ក្រៅពីនោះ កសិករ ក៏ចាប់ផ្ដើមចិញ្ចឹមមាន់ ទា និងជ្រូកដើម្បីផ្គត់ផ្គង់ទៅកាន់ទីផ្សារ ក្នុងពេលព្រំដែនរវាងប្រទេសកម្ពុជា និងប្រទេសជិតខាងត្រូវបានរឹតបន្តឹង ៕
ចែករំលែកព័តមាននេះ