ថៃ ៖ តាមប្រភពព័ត៌មាន Bangkok Post បានឱ្យដឹងថា ក្រុមអ្នកគាំទ្រចម្រៀងរ៉ក បានមើលក្រុមតន្ត្រីដែលពួកគេចូលចិត្តលេងតាមរយៈវេទិកាប្រជុំវីដេអូ Zoom នៅថ្ងៃអាទិត្យ ខណៈដែលការប្រគំតន្ត្រីត្រូវបានគេផ្សាយបន្តផ្ទាល់តាមអ៊ីនធើរណេត។ ការប្រមូលផ្តុំជាសាធារណៈត្រូវបានហាមឃាត់ចាប់តាំងពីពាក់កណ្តាលខែមីនា ដើម្បីការពារការរីករាលដាលនៃជំងឺកូវីដ១៩ ប៉ុន្តែការប្រគំតន្ត្រីរយៈពេល ៦ម៉ោងនៅថ្ងៃអាទិត្យ តាមអ៊ីនធើរណេត បានផ្តល់ឱកាសឱ្យមនុស្សបានឃើញ និងប្រាស្រ័យទាក់ទងជាមួយសិល្បករពីចម្ងាយ។
យុវតី Siriyagorn Aimchomchid អាយុ២១ឆ្នាំ បាននិយាយថា៖ ១ក្រុមតន្ត្រីដែលខ្ញុំចូលចិត្ត មិនមានការសម្តែងផ្ទាល់អំឡុងពេលរឹតបន្តឹងទេ។ ដូច្នេះការដែលអាចជួបពួកគេនៅថ្ងៃនេះ គឺធ្វើឱ្យខ្ញុំសប្បាយរីករាយ»។
អ្នកគាំទ្រតន្ត្រីមួយចំនួនបានប្រមូលផ្តុំគ្នាជាក្រុមតូចៗ ដែលត្រូវបានអនុញ្ញាតិឱ្យស្ថិតនៅក្រោមការកំណត់ ដើម្បីរក្សាសុវត្ថិភាព ហើយត្រូវបានគេដាក់លក់ចំនួន ៣០០០សំបុត្រ ដែលមានតម្លៃ ៤៩៩បាតក្នុងមួយសំបុត្រ។
នាយករៀបចំកម្មវិធីមហោស្រពតន្ត្រី What The Duck Music បាននិយាយថា៖ «ការប្រគំតន្រី្តតាមអ៊ីនធើរណេត អនុញ្ញាតឱ្យទស្សនិកជននិងសិល្បករ ច្រៀងជាមួយគ្នានឹងនិយាយជាមួយគ្នា។ ខ្ញុំគិតថា វាធ្វើឱ្យមានភាពជិតស្និទ្ធជាងការទៅមើលផ្ទាល់»។
ប៉ុន្តែ Sirinapa Darathum អាយុ១៥ឆ្នាំ ជានិស្សិតម្នាក់ដែលកំពុងមើលជាមួយមិត្តភក្តិ ៣នាក់បាននិយាយថា ការមើលតាមអ៊ីនធើរណេត មិនអាចយកទៅប្រៀបធៀបទៅនឹងភាពរំភើបនៃការទៅមើលផ្ទាល់នោះទេ៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ