ប្រទេសចិន ៖ តាមប្រភពព័ត៌មាន Oddity Central បានឱ្យដឹងថា នៅព័ទ្ធជុំវិញដោយរុក្ខជាតិខៀវស្រងាត់ មានកន្លែងមានស្រះ និងថ្លុកទឹកជាច្រើនកន្លែង នៅក្នុងភូមិមួយដែលមានឈ្មោះថា «Ding Wuling» គួរតែមានមូសច្រើន ជាពិសេសនៅរដូវក្តៅតែម្តង។ តែអស់ជាច្រើនសតវត្សរ៍មកហើយ ភូមិនេះគឺគ្មានមូសសូម្បីតែមួយក្បាល។
មានទីតាំងស្ថិតនៅលើភ្នំនៃខេត្តហ្វូជាន ប្រទេសចិន ដែលមានកម្ពស់ជាង ៧០០ម៉ែត្រពីនីវ៉ូទឹកសមុទ្រ ភូមិនេះគឺជាផ្ទះរបស់ជនជាតិភាគតិចហ្កាកា ដែលជាប្រជាជនមានប្រវត្តិ និងវប្បធម៌ដ៏សំបូរបែប ដោយបង្ហាញពីស្ថាបត្យកម្មប្លែកនៃផ្ទះថ្មរបស់ពួកគេ។
ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ វប្បធម៌ និងស្ថាបត្យកម្មនៃភូមិដ៏ស្រស់ស្អាតនេះ ត្រូវបានគ្របដណ្ដប់ដោយអាថ៌កំបាំងដែលត្រូវបានផ្សព្វផ្សាយដោយប្រព័ន្ធផ្សព្វផ្សាយជាតិ ពោលគឺការដែលគ្មានវត្តមានមូសទាល់តែសោះ។ ទោះបីត្រូវបានគ្របដណ្ដប់ដោយដើមឈើខៀវស្រងាត់ និងព័ទ្ធជុំវិញដោយរុក្ខជាតិក៏ដោយ ក៏ភូមិនេះត្រូវបានរាយការណ៍ថា មិនមានមូស អស់ជាច្រើនទសវត្សមកហើយ។
វាមិនច្បាស់ទេថា តើអ្នកវិទ្យាសាស្ត្រធ្លាប់ធ្វើការស៊ើបអង្កេត ដើម្បីឈានដល់ទីបំផុតនៃអាថ៌កំបាំងនេះឬក៏អត់ទេ? តែប្រជាជនមានជំនឿថា នេះមកពីមានថ្មមួយដែលរាងដូចសត្វគីង្គក់ពីធម្មជាតិ។
គេជឿថា ថ្មនេះគឺជាព្រះការពារមិនឱ្យមានមូសនៅក្នុងភូមិ។ ការពន្យល់ដ៏ពេញនិយមមួយទៀត គឺគេនិយាយពីទម្លាប់អនាម័យរបស់អ្នកស្រុក ដែលយកសំរាមទៅកប់នៅក្បែរភ្នំ ដែលមិនធ្វើឱ្យមូសអាចរស់នៅបាន៕ ដកស្រង់ចេញពីវេបសាយ ៖ odditycentral (កែសម្រួលដោយ ៖ បុប្ផា)
ចែករំលែកព័តមាននេះ