រាជធានីភ្នំពេញ ៖ លោកអ៊ាង សុផល្លែត ជំនួយការសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានប្រាប់ឱ្យដឹងថា លោក AHMAD RITHAUDEEN អតីតរដ្ឋមន្ដ្រីក្រសួងការបរទេសម៉ាឡេស៊ី បានជំរាបជូនសម្ដេចតេជោនាយករដ្ឋមន្ដ្រីថា គោលបំណងរបស់លោក គឺនាំមកនូវការផលិតម្ហូបអ៊ិស្លាមមកក្នុងព្រះរាជាណាចក្រកម្ពុជា ដែលម្ហូបនេះកំពុងពេញនិយមទូទាំងពិភពលោកជាពិសេសនៅទ្វីបអឺរ៉ុប ។
លោកអ៊ាង សុផល្លែត បានប្រាប់ឱ្យដឹងបែបនេះ នារសៀលថ្ងៃទី២ មេសា នៅភូមិ គ្រឹះក្បែរវិមានឯករាជ្យក្នុងឱកាសដែលលោកអតីតរដ្ឋមន្ដ្រីក្រសួងការបរទេសម៉ាឡេស៊ីចូលជួបសំដែងការគួរសម និងពិភាក្សាការងារជាមួយសម្ដេច ខណៈពេលដែលលោកមកបំពេញទស្សនកិច្ចនៅព្រះរាជាណាចក្រកម្ពុជា ។
ពាក់ព័ន្ធនឹងគោលបំណងនេះលោក AHMAD RITHAUDEEN បានជំរាបជូនសម្ដេចតេជោនាយករដ្ឋមន្ដ្រីថា ម្ហូបនេះដើម្បីផលិតបានគឺត្រូវការបច្ចេកទេសមកពីម៉ាឡេស៊ី ។ នៅពេលដែលនាំមកផលិតនៅកម្ពុជា បានហើយម្ហូបមូស្លីមនេះនឹងអាចជួយដល់កម្ពុជាក្នុងការនាំចេញម្ហូបអាហាររបស់កម្ពុជាឆ្ពោះទៅកាន់ប្រទេសមូស្លីមផងដែរ ។ ម្យ៉ាងវិញទៀតលោកក៏បានណែនាំកូនប្រុសរបស់លោកដែលជាប្រធានក្រុមហ៊ុន IT នៅម៉ាឡេស៊ី ហើយសព្វថ្ងៃកំពុងតែរៀបចំ និងថែទាំប្រព័ន្ធព័ត៌មានវិទ្យារបស់រដ្ឋាភិបាលម៉ាឡេស៊ី ជូនដល់សម្ដេចតេជោ ដែលកូនរបស់លោកអាចមានលទ្ធភាពចូលរួមចំណែកជួយដល់កម្ពុជាលើវិស័យ IT នេះ។
ជាការឆ្លើយតបសម្ដេចតេជោនាយករដ្ឋ មន្ដ្រី ហ៊ុន សែន បានថ្លែងអំណរគុណយ៉ាងជ្រាលជ្រៅចំពោះសន្ដានចិត្ដរបស់លោក AHMAD RITHAUDEEN ។ សម្ដេចបានស្នើសុំឱ្យក្រុមរបស់លោកបន្ដធ្វើការជាមួយនឹង NIDA ពាក់ព័ន្ធទៅនឹងប្រព័ន្ធ IT ដើម្បីស្វែងរកកិច្ចសហប្រតិបត្ដិការគ្នាលើវិស័យនេះ។ ពាក់ព័ន្ធនឹងម្ហូបអ៊ិស្លាម សម្ដេចបានធ្វើការណែនាំឱ្យក្រុមរបស់លោក RITHAUDEEN ធ្វើការជាមួយនឹងលោកអូស្មាន់ ហាស្សាន់ ដើម្បីធ្វើការជំរុញផ្នែកម្ហូបអ៊ិស្លាមនេះ។ សម្ដេចតេជោនាយករដ្ឋមន្ដ្រីបានមានប្រសាសន៍ថា នយោបាយកម្ពុជាកំពុងតែផ្ដោតការយកចិត្ដទុកដាក់ទៅលើមជ្ឈិមបូព៌ា ដូច្នេះការបង្កើតម្ហូបអ៊ិស្លាម និងនាំទៅប្រទេសមូស្លីមនោះ គឺអាចជាការចូលរួម ចំណែកក្នុងដំណើរនយោបាយរបស់កម្ពុជា ក្នុងការជួយដល់ទំនាក់ទំនងកម្ពុជាជាមួយមជ្ឈិមបូព៌ាផង ក៏ដូចជាជំរុញការវិនិយោគលើវិស័យកសិកម្មពីមជ្ឈិមបូព៌ាផង ។
ចែករំលែកព័តមាននេះ