រាជធានីភ្នំពេញ ៖ នៅរសៀលថ្ងៃសៅរ៍ទី៦ មិថុនា ឆ្នាំ២០២០ ស្អែកនេះ សង្វៀនប្រដាល់របស់ទូរទស្សន៍អាស៊ីអាគ្នេយ៍ នៅតែមានការប្រកួតបិទទ្វារជាមួយវត្តមានកីឡាករកម្ពុជាដែលសុទ្ធតែក្មេងៗ និងមានសមត្ថភាពបង្ហាញខ្លួន ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជាទាំង៦រូបដែលមានឈ្មោះឡើងប្រកួតមិត្តភាពក្នុងព្រឹត្តិការណ៍ប្រដាល់នោះ ប៉ុក វិបុល គឺជាកីឡាករជើងខ្លាំងម្នាក់ដែលលោករំពឹងខ្ពស់សម្រាប់ការប៉ះគ្នាក្នុងនាមគូឯក ដោយសារតែគេទើបផ្ដួលកីឡាករជើងខ្លាំងកម្ពុជាមួយចំនួន និងមានបំណងចង់ឱ្យកីឡាកររូបនេះ កាន់តែមានអ្នកចាប់អារម្មណ៍ពីសមត្ថភាពឈានឡើងដែលលោកសម្គាល់ឃើញកន្លងមកនោះផង ។
បើទោះជាគេត្រូវប្រឈមនឹងកីឡាករម្ខាងទៀត គឺ ម៉ន ភារម្យ ដែលល្អ តែម្នាក់ៗនៅតែមានទំនុកចិត្តចំពោះសមត្ថភាពរបស់កីឡាករ ប៉ុក វិបុល ច្រើនជាង ។ លោកថា មួយគូនេះភាគីម្ខាងៗពិតជាចង់ឈ្នះដាច់ខាត ខណៈដែលអ្នកណាឈ្នះ ក្រៅពីបានមុខមាត់ និងទឹកប្រាក់តម្លៃខ្លួនក្នុងនាមជាអ្នកឈ្នះខ្ពស់ជាងហើយ ក៏បានទទួលទំនុកចិត្តពីអ្នកគាំទ្រជាងមុនបន្ថែម ។ ប៉ុន្តែបើការប្រកួតនេះ បែរជាចាញ់ព្រោះតែប្រកួតមិនបានល្អវិញ មិនខុសពីត្រូវបាក់មុខ និងរងការរិះគន់ពីអ្នកគាំទ្រនោះទេ។
លោកជឿជាក់ថា កីឡាករកម្ពុជាគូនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ហើយពិតជាបើកការប្រកួតមិនលាក់ដៃ ដើម្បីជៀសផុតពីការរិះគន់ណាមួយ ។ អ៊ីចឹងហើយទើបលោកយល់ថា ជំនួបរវាងជើងខ្លាំងជាមួយនឹងកីឡាករកំពុងឡើងសន្ទុះនេះ នឹងក្លាយជាដៃគូមិនធម្មតាសម្រាប់ការប្រកួតទាំង
មូល ដោយសារតែភាគីខាងណាក៏មិនចង់បាក់មុខ។
ក្នុងចំណោមការប្រកួតគូពិសេស២គូ គូពិសេសមួយគូ ក៏ទទួលបានការចាប់អារម្មណ៍ផងដែរ ។ កីឡាករ សឿម សារ៉ាន់ ដែលអ្នកស្នេហាវិស័យប្រដាល់ស្គាល់ថាជាកីឡាករមានសមត្ថភាពមួយរូប និងកំពុងឡើងកូដ ក៏ត្រូវគណៈកម្មការរំពឹងថា នឹងធ្វើឱ្យអ្នកគាំទ្រជក់ចិត្តផងដែរ បន្ទាប់ពីផ្គូផ្គងឱ្យប៉ះប្រកួតជាមួយកីឡាករ ប្រាក់ ឌីណា ដែលជាជើងខ្លាំងម្នាក់ ។
លោកថា ការប្រកួតរបស់ពួកគេនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលកីឡាករម្ខាងៗនៅមិនទាន់មានក្រេឌីតដូចគ្នា តែខ្លាំង ដោយគ្រាន់តែពិបាកទុកចិត្តពីភាពខ្លាំង១០០ភាគរយ ដោយសារកីឡាករម្ខាងទៀតក៏មិនធម្មតា ។ លោកយល់ថា កីឡាករ សឿម សារ៉ាន់ ជាដៃគូខ្លាំងម្នាក់ តែគេក៏មិនទាន់ប្រាកដដូចគ្នាថានឹងទទួលបានជ័យជម្នះសម្រាប់ការប្រកួតនោះដែរ ដោយមានតែការចាំអ៊ុតមើលប៉ុណ្ណោះ ។ មួយគូទៀត ក៏មិនទាន់មានអ្នកទុកចិត្តថា អ្នកណានឹងឈ្នះនៅឡើយដែរ ដោយអ្នកគាំទ្រកំពុងតែរង់ចាំមើលដូចគ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ