ខេត្តបន្ទាយមានជ័យ ៖ គ្រួសារមួយដែលកាលពីប៉ុន្មានឆ្នាំមុនបានយករទេះធ្វើជម្រក (ដោយដេកក្នុងរទេះ) ពេលនេះមានខ្ទមរស់នៅបណ្តោះអាសន្នហើយ តែគួរឲ្យសង្វេគត្រង់ថា ទារកទើបកើតបាន២៧ថ្ងៃដេកក្នុងរទេះមិនថា ភ្លៀង ផ្គរយ៉ាងណា ខណៈពេលគ្រួសារមួយនេះរុញរើសអេតចាយរកប្រាក់ដោះស្រាយជីវភាព។…
ខេត្តបន្ទាយមានជ័យ ៖ គ្រួសារមួយដែលកាលពីប៉ុន្មានឆ្នាំមុនបានយករទេះធ្វើជម្រក (ដោយដេកក្នុងរទេះ) ពេលនេះមានខ្ទមរស់នៅបណ្តោះអាសន្នហើយ តែគួរឲ្យសង្វេគត្រង់ថា ទារកទើបកើតបាន២៧ថ្ងៃដេកក្នុងរទេះមិនថា ភ្លៀង ផ្គរយ៉ាងណា ខណៈពេលគ្រួសារមួយនេះរុញរើសអេតចាយរកប្រាក់ដោះស្រាយជីវភាព។
គ្រួសាទុរគតខាងលើ បុរសជាប្តីឈ្មោះ សុខ វៃ អាយុ៤០ឆ្នាំ មានប្រពន្ធឈ្មោះ បេង មុំ អាយុ៣៤ឆ្នាំ មានកូនក្នុងបន្ទុក៣នាក់ តែកូនស្រីច្បងអាយុ១១ឆ្នាំ ត្រូវបានគ្រួសារនគរបាលចិត្តធម៌មួយនៅឯខេត្តកំពង់ធំ សុំយកទៅចិញ្ចឹមដើម្បីឲ្យបានរៀនសូត្រនឹងគេ។ គ្រួសារមួយនេះ កាលពីដើមស៊ីឈ្នួលអូសរទេះនៅច្រកទ្វារអន្តរជាតិប៉ោយប៉ែត និងធ្លាប់យករទេះធ្វើជម្រក (ដេកក្នុងរទេះ) ហើយកោះសន្តិភាពក៏ធ្លាប់លើកយកមកសរសេរធ្វើឲ្យសប្បុរសជនផ្តល់អំណោយជាហូរហែផងដែរ។
មិនតែប៉ុណ្ណោះ ពេលនោះអាជ្ញាធរក្រុង និងខេត្ត ក៏បានជួយឧបត្ថម្ភជាស្បៀងជាបន្តបន្ទាប់ដូចគ្នា។ លុះដល់សម័យកូវីដ១៩ មកដល់ គ្រួសាដដែលនេះគ្មានមុខរបរ ព្រោះថៃបិទព្រំដែន ក៏បង្ខំចិត្តនាំគ្នារុញរទេះរើសអេតចាយរកប្រាក់ ដើម្បីចិញ្ចឹមក្រពះ។ ចំណែកស្ត្រីជាប្រពន្ធនៃគ្រួសានេះ ទើបសម្រាលបានកូនប្រុសម្នាក់អាយុទើបតែ២៧ថ្ងៃប៉ុណ្ណោះ នៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត។
ព្រោះតែជីវភាពតោកយ៉ាក ស្ត្រីជាប្រពន្ធបានធ្វើការទាំងសរសៃខ្វី ដោយដើររើសអេតចាយជាមួយប្តីតាំងពីសម្រាលកូនបាន១សប្តាហ៍។ អ្វីដែលគួរឲ្យសង្វេគមែនទែននោះ គឺកូនប្រុសតូចរបស់គ្រួសានេះ ដែលទើបនឹងឃើញពន្លឺព្រះអាទិត្យ ក៏ត្រូវដេកតែនៅក្នុងរទេះ បើទោះបីជាក្រោមកំដៅថ្ងៃហួតហែង ឬមានភ្លៀងធ្លាក់ផ្គររន្ទះយ៉ាងណាក៏ដោយ ក៏គ្រួសាមួយនេះយកសំពត់កៅស៊ូបិទបាំងជាជម្រក ធ្វើឲ្យមើលទៅពិតជាកំសត់ណាស់។
កាលពីម្សិលមិញនៃ ត្រូវជាថ្ងៃទី៤ ខែមិថុនា ឆ្នាំ២០២០ រទេះរើសអេតចាយរបស់គ្រួសានេះបែកកង់ ហើយជាងប្រាប់ថា ត្រូវដូរពោះវៀន ព្រោះបំណាស់បែកធំមិនអាចប្រើប្រាស់បាននោះទេ។ អ្វីដែលកាន់តែអាណិតថែមទៀតនោះ គ្រួសាខាងលើនិយាយថា គ្មានប្រាក់ដូរពោះវៀនកង់នោះទេ ព្រោះបច្ចុប្បន្នពួកគាត់រកមួយថ្ងៃបាន១ម៉ឺន ឬជាង១ម៉ឺនរៀល ដើម្បីដោះស្រាយជីវភាពគ្រួសា ស្ទើរមិនចង់គ្រប់។
ដោយក្តីអាណិត ភ្នាក់ងារកោះសន្តិភាព បានចេញប្រាក់ថ្លៃប្តូរពោះវៀនកង់រទេះ និងផ្តល់ប្រាក់បន្តិចបន្តួចឲ្យគ្រួសានេះតែម្តង។ ហើយគ្រួសាខាងលើអះអាងថា បច្ចុប្បន្នសុំដីគេរស់នៅបណ្តោះអាសន្នក្នុងសង្កាត់កើតហេតុ។
ជាចុងក្រោយពួកគាត់ក៏អំពាវនាវដល់សប្បុរសជនទាំងក្នុង និងក្រៅប្រទេស មេត្តាជួយផង ព្រោះពេលនេះពួកគាត់គ្មានដីរស់នៅ និងគ្មានមុខរបរអ្វីក្រៅពីដើររើសអេតចាយរកប្រាក់ ដើម្បីដោះស្រាយជីវភាពឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ