ខេត្តបន្ទាយមានជ័យ ៖ ជ្រូករស់ជិត១០០ក្បាលនិងមាន់ជិត១.០០០ក្បាលដែលក្រុមឈ្មួញដឹកតាមរថយន្តនាំចូលដោយខុសច្បាប់ ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចខេត្តចាប់ប្រគល់ជូនមន្ត្រីបសុពេទ្យកាលពីព្រឹកថ្ងៃទី៤ ខែមិថុនា ឆ្នាំ២០២០ នៅការិយាល័យផលិតកម្មនិងបសុព្យាបាលខេត្តបន្ទាយមានជ័យ។ លោកឧត្តមសេនីយ៍ត្រី ចាប សុផាឫទ្ធិ…
ខេត្តបន្ទាយមានជ័យ ៖ ជ្រូករស់ជិត១០០ក្បាលនិងមាន់ជិត១.០០០ក្បាលដែលក្រុមឈ្មួញដឹកតាមរថយន្តនាំចូលដោយខុសច្បាប់ ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចខេត្តចាប់ប្រគល់ជូនមន្ត្រីបសុពេទ្យកាលពីព្រឹកថ្ងៃទី៤ ខែមិថុនា ឆ្នាំ២០២០ នៅការិយាល័យផលិតកម្មនិងបសុព្យាបាលខេត្តបន្ទាយមានជ័យ។
លោកឧត្តមសេនីយ៍ត្រី ចាប សុផាឫទ្ធិ ស្នងការរងទទួលផែនប្រឆាំងបទល្មើសសដ្ឋកិច្ចនៃស្នងការនគរបាលខេត្តបន្ទាយមានជ័យបានឱ្យដឹងថា កាលពីយប់ថ្ងៃទី៣ ខែមិថុនា ឆ្នាំ២០២០ កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តបន្ទាយមានជ័យបានឃាត់រថយន្តមួយគ្រឿងម៉ាកកាមរី ស៊េរីចាស់ ពាក់ស្លាក់លេខ ភ្នំពេញ ២F-១០១៣ ដែលដឹកកូនជ្រូកចំនួន៧៥ក្បាល នៅលើកំណាត់ផ្លូវជាតិលេខ៥៨ ស្ថិតភូមិសាស្ត្រភូមិជោគជ័យ ឃុំអូរបីជាន់ ស្រុកអូរជ្រៅ ហើយត្រូវបានប្រគល់ជូនការិយាល័យផលិតកម្មនិងបសុព្យាបាលខេត្តបន្ទាយមានជ័យ។
លោក ហ៊ុយ ទូច ប្រធានការិយាល័យផលិតកម្មនិងបសុព្យាបាលខេត្តបន្ទាយមានជ័យបានបញ្ជាក់ថា ជាការណែនាំពីអគ្គនាយកដ្ឋានផលិតកម្មនិងបសុព្យាបាលដើម្បីមានវិធានការទប់ស្កាត់សត្វនាំចូលពីប្រទេសជិតខាងដោយខុសច្បាប់ ហើយមន្ត្រីជំនាញបានឃាត់រថយន្តចំនួន២គ្រឿង ក្នុងនោះមួយគ្រឿង ជាប្រភេទចង្កូតស្តាំ ស៊េរីចាស់ ពាក់ស្លាក់លេខ ច.៧៥៨២ ដែលដឹកជ្រូករស់ធំមានចំនួន១៦ក្បាល និងមួយគ្រឿងទៀតប្រភេទកូរ៉េ ម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ ២C-៦១៨១ ដែលដឹកមាន់រស់ចំនួន៨៤០ក្បាល កាលពីយប់ថ្ងៃទី៣ ខែមិថុនា ឆ្នាំ២០២០ក្នុងភូមិសាស្ត្រឃុំអូរបីជាន់ ស្រុកអូរជ្រៅ។
លោកបានបញ្ជាក់ថា ក្រោយពេលកម្លាំងនគរបាលប្រឆាំងបទល្មើសសេដ្ឋខេត្តបន្ទាយមានជ័យចាប់បានរថយន្ត១គ្រឿងដឹកកូនជ្រូកចំនួន៧៥ក្បាលប្រគល់ជូនអោយមន្ត្រីជំនាញ ហើយមន្ត្រីការិយាល័យផលិតកម្មបសុព្យាបាលខេត្តបានបង្ក្រាបឃាត់រថយន្ត២គ្រឿងមាន១គ្រឿងដឹកជ្រូករស់ធំចំនួន១៦ក្បាល និង១គ្រឿងទៀតដឹកមាន់រស់ចំនួន៨៤០ក្បាលត្រូវបានយកទៅរក្សាទុកនៅការិល័យផលិតកម្មនិងបសុព្យាបាលខេត្តបន្ទាយមានជ័យ។
លោកបានបញ្ជាក់បន្តថា ក្រោយពីឃាត់រថយន្តដឹកសត្វជ្រូកនិងមាន់ខាងលើរួចមក ក៏បានយកសំណាកវិភាគរបស់សត្វទាំងនោះបញ្ជូនទៅក្រសួងជំនាញរយៈពេល៣ទៅ៤ថ្ងៃយ៉ាងយូរ ទើបចេញលទ្ធផលថាគ្មានរោគសញ្ញាទេ និងធ្វើការផាកវិន័យហើយប្រគល់ជូនម្ចាស់វិញ ព្រមទាំងណែនាំអោយម្ចាស់ត្រូវបញ្ឈប់សកម្មភាពការនាំចូលសត្វចូលពីប្រទេសជិតខាងដោយល្មើសច្បាប់ ដើម្បីលើកំពស់ទីផ្សារសត្វក្នុងស្រុក បើមិនរាងចាលទេនឹងមានវិធានការតាមច្បាប់ ៕
ចែករំលែកព័តមាននេះ