រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា កន្លងមកនេះមានបាតុភាពមួយកើតឡើងនៅខេត្តប៉ៃលិន ដោយគយថៃបិទច្រកមិនឱ្យប្រជាជនកម្ពុជានាំទំនិញចូលទៅក្នុងប្រទេសថៃ។ ចំពោះបញ្ហានេះសម្តេចតេជោនាយករដ្ឋមន្ត្រីសង្កត់ធ្ងន់ថា គប្បីមានការប្រុងប្រយ័ត្ន ព្រោះថា មិនអាចឱ្យទំនិញតែប្រទេសមួយចូលមក ហើយមិនឱ្យទំនិញពីប្រទេសមួយចេញទៅបានទេ គឺការធ្វើពាណិជ្ជកម្មទ្វេភាគីគ្មានតុល្យភាព។ ក្នុងករណីនេះសម្តេចបញ្ជាក់ថា ប្រជាជននៅខេត្តប៉ៃលិនបានធ្វើសំណើថា បើមានបាតុភាពនេះកើតឡើងទៀត ប្រជាជនកម្ពុជានៅខេត្តប៉ៃលិនស្នើសុំដល់សម្តេចនាយករដ្ឋមន្ត្រីដើម្បីបិទមិនឱ្យទំនិញថៃចូលមកកម្ពុជារយៈពេល៧ខែ។ នេះគ្រាន់តែជាសំណើរបស់ប្រជាជនកម្ពុជា។
លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោហ៊ុន សែន បានប្រាប់ឱ្យដឹងថា សម្តេចបានមានប្រសាសន៍បែបនេះនាព្រឹកថ្ងៃទី២៤ ខែមីនា នៅវិមានសន្តិភាពទីស្តីការនាយករដ្ឋមន្ត្រី ក្នុងឱកាសដែលលោក Prasas Prasasvinitchai ឯកអគ្គរាជទូតថៃប្រចាំព្រះរាជាណាចក្រកម្ពុជាចូលជួបសំដែងការគួរសម និងជម្រាបលា ខណៈពេលលោកបញ្ចប់បេសកកម្មការទូតនៅកម្ពុជា ។ សម្តេចតេជោនាយករដ្ឋមន្ត្រីមានប្រសាសន៍សំដែងនូវការរីករាយចំពោះអ្វីដែលបានប្រព្រឹត្តកន្លងទៅ នោះគឺការសំដែងសិល្បៈរួម និងការមកតាំងពិព័រណ៍ពាណិជ្ជកម្មនៅកម្ពុជា ទោះបីជាប្រទេសទាំងពីរនៅមានបញ្ហាជាមួយគ្នាខ្លះក៏ដោយ ប៉ុន្តែកិច្ចសហប្រតិបត្តិការលើវិស័យពាណិជ្ជកម្មកំពុងតែមានដំណើរការល្អ។
ក្នុងឱកាសសំដែងការគួរសម និងជម្រាបលាសម្តេចតេជោនាយករដ្ឋមន្ត្រី លោកឯកអគ្គរាជទូតថៃបានថ្លែងអំណរគុណចំពោះសម្តេចតេជោនាយករដ្ឋមន្ត្រីក៏ដូចជារាជរដ្ឋាភិបាលកម្ពុជាដែលបានបញ្ជូនសិល្បករទៅសំដែងនៅប្រទេសថៃ នោះគឺឆ្លុះបញ្ចាំងនូវកិច្ចប្រឹងប្រែងរបស់រាជរដ្ឋាភិបាលកម្ពុជាក្នុងការពង្រីក និងពង្រឹងទំនាក់ទំនងរវាងកម្ពុជា និងថៃ។ ថៃមានគម្រោងធ្វើពិព័រណ៍ពាណិជ្ជកម្មនៅកម្ពុជានាខែឧសភាខាងមុខនេះ ដោយមានរដ្ឋមន្ត្រីពាណិជ្ជកម្មថៃចូលរួមផងដែរ។ ម្យ៉ាងទៀតថៃមានបំណងពង្រឹង ពង្រីកកិច្ចសហប្រតិបត្តិការជាមួយកម្ពុជាផងដែរក្នុងការនាំទំនិញចេញពីកម្ពុជា ពិសេសនៅថ្ងៃទី២៩ ខែមីនា ខាងមុខនេះ សមាគមនាំអង្ករចេញ និងគណៈកម្មការម៉ាស៊ីនកិនស្រូវរបស់ថៃនឹងមកកម្ពុជារយៈពេល៣ថ្ងៃដើម្បីធ្វើការសិក្សាស្វែងយល់ធ្វើយ៉ាងណាសហការជាមួយកម្ពុជាក្នុងការនាំអង្ករចេញ។
សម្តេចតេជោនាយករដ្ឋមន្ត្រី បានស្វាគមន៍ចំពោះសមាគមដែលមានបំណងនាំអង្ករចេញពីកម្ពុជា និងគណៈកម្មការម៉ាស៊ីនកិនស្រូវថៃមកកម្ពុជាដើម្បីសហការគ្នាក្នុងក្របខណ្ឌACMEC ផង និងក្នុងក្របខណ្ឌទ្វេភាគីផង ដើម្បីជំរុញការនាំអង្ករចេញ ព្រោះថា សព្វថៃ្ង ថៃ និងវៀតណាមកំពុងនាំអង្ករចេញ ហើយបើរួមគ្នាប្រទេសទាំង៥ រួមទាំងកម្ពុជាផងនោះ គឺមានចំនួនប្រមាណ៥០%ផ្គត់ផ្គង់ទូទាំងពិភពលោក។ ដូច្នេះ សម្តេចសូមសំដែងការស្វាគមន៍នូវបំណងក្នុងការជំរុញនាំអង្ករចេញ ៕
ចែករំលែកព័តមាននេះ