ខេត្តកំពង់ធំ ៖ មានករណីក្មេងប្រុសអាយុ៤ឆ្នាំម្នាក់បានលង់ទឹកប្រឡាយ បណ្តាលឱ្យបាត់បង់ជីវិត ខណៈឪពុកម្តាយទៅធ្វើការរោងចក្រ ហើយផ្ញើកូននឹងជីដូនឱ្យជួយមើល ប៉ុន្តែដោយសារជីវភាពខ្វះខាត ជីដូនក៏ទៅធ្វើការសំណង់ រួចយកចៅប្រុសទៅផ្ញើម្តាយមីង លុះម្តាយមីងមិនស្រួលខ្លួនក៏ដេកលក់ ស្រាប់តែក្មេងប្រុសរងគ្រោះរួមជាមួយកូនអ្នកជិតខាងបានទៅទឹកប្រឡាយ បណ្តាលឱ្យលង់បាត់បង់ជីវិតតែម្តង ។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី៣ ខែមិថុនា ឆ្នាំ២០២០ នៅភូមិពុកយុក សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ។
ក្មេងប្រុសរងគ្រោះឈ្មោះ ទុយ វី អាយុ៤ឆ្នាំ មានឪពុកឈ្មោះ វុន និងម្តាយឈ្មោះ នាង ផល្លី រស់នៅភូមិឃុំកើតហេតុខាងលើ ។
តាមប្រភពព័ត៌មានបានឱ្យដឹងថា មុនពេលកើតហេតុ ឪពុកម្តាយរបស់ក្មេងប្រុសរងគ្រោះបានទៅធ្វើការរោងចក្រអស់ ដោយទុកអោយក្មេងប្រុសរងគ្រោះនៅជាមួយជីដូនមើលថែ ក្រោយមកដោយសារតែជីវភាពរស់នៅមានការខ្វះខាត ជីដូនក៏បានសម្រេចចិត្តទៅធ្វើការងារសំណង់នៅឯស្រុកស្ទោង ដោយបានទុកចៅអោយម្តាយមីងជួយមើលថែបន្ត ។
តាមប្រភពព័ត៌មានបានឱ្យដឹងបន្តថា លុះនៅវេលាម៉ោងកើតហេតុខាងលើ ម្តាយមីងរបស់ក្មេងប្រុសរងគ្រោះមិនសូវស្រួលខ្លួន ក៏ដេកលក់នៅក្នុងផ្ទះ ទុកក្មេងប្រុសរងគ្រោះឱ្យលេងជាមួយក្មេងៗដទៃទៀតជាកូនអ្នកជិតខាង បន្ទាប់មកក្មេងៗទាំងនោះក៏បាននាំគ្នាទៅលេងទឹកប្រឡាយត្រង់ចំណុចរណ្តៅអាអុិចដែលមានជម្រៅប្រហែល១,៥ម៉ែត្រ បណ្ដាលឱ្យក្មេងប្រុសរងគ្រោះលង់ទឹកបាត់បង់ជីវិតតែម្ដង ។
ក្រោយពេលកើតហេតុ សមត្ថកិច្ចប៉ុស្តិ៍និងមេភូមិបានចុះទៅពិនិតកន្លែងកើតហេតុ និងសពក្មេងប្រុសរងគ្រោះ បានសន្និដ្ឋានថា ក្មេងប្រុសរងគ្រោះបានបាត់បង់ជីវិតដោយសារលង់ទឹក ក៏ប្រគល់សពអោយសាច់ញាតិចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ