សុខភាព ៖ អ្នកទាំងអស់គ្នាបានដឹងស្រាប់ហើយថា បច្ចុប្បន្ននេះមានអាកាសធាតុក្តៅខ្លាំងណាស់។ ដូច្នេះហើយ អ្នកខ្លះក៏ប្រើប្រាស់កង្ហារបំបាត់ភាពក្តៅនោះ និងដើម្បីអាចគេងលក់ស្រួល។ ប៉ុន្តែអ្នកជំនាញយល់ថា ការគេងដាក់កង្ហារ ប្រហែលជាមិនមែនតែងតែជាគំនិតល្អ…
សុខភាព ៖ អ្នកទាំងអស់គ្នាបានដឹងស្រាប់ហើយថា បច្ចុប្បន្ននេះមានអាកាសធាតុក្តៅខ្លាំងណាស់។ ដូច្នេះហើយ អ្នកខ្លះក៏ប្រើប្រាស់កង្ហារបំបាត់ភាពក្តៅនោះ និងដើម្បីអាចគេងលក់ស្រួល។ ប៉ុន្តែអ្នកជំនាញយល់ថា ការគេងដាក់កង្ហារ ប្រហែលជាមិនមែនតែងតែជាគំនិតល្អ និងផ្តល់សុខភាពឡើយ។ ខណៈពេលដែលការបើក កង្ហារធ្វើឲ្យអាកាសធាតុក្នុងបន្ទប់ប្រែទៅជាត្រជាក់ និងស្រស់ស្រាយជាងមុនក៏ដោយ តែវាក៏ធ្វើឲ្យធូលីដី វិលវល់ក្នុងបន្ទប់ដែរ។ វាពិតជារឿងមិនល្អឡើយបើសិនជាអ្នកជួបបញ្ហាអាឡែហ្ស៊ី ជំងឺហឺត ឬប្រតិកម្មនឹង សារធាតុអ្វីមួយ។
ចូរពិនិត្យមើលកង្ហារអ្នកឲ្យមែនទែន ថាតើវាមានធូលីច្រើនជាប់ស្លាបកង្ហារឬអត់ ព្រោះធូលីទាំង នេះនឹងហោះវិលវល់ក្នុងបរិយាកាសគ្រប់ពេលដែលអ្នកបើកដំណើការវ។ ម្យ៉ាងវិញទៀត អ្នកមិនគួរគេងបើកកង្ហារ ដោយសារតែវាអាចធ្វើឲ្យស្បែកស្ងួត និងផ្លូវដង្ហើមក្នុងច្រមុះស្ងួតដែរ។ បើសិនជាផ្លូវក្នុងច្រមុះទៅជាស្ងួតពេក រាងកាយអាចផលិតស្លេសកាន់តែច្រើនដែលធ្វើឲ្យអ្នកមានអារម្មណ៍ស្ទះៗផ្លូវដង្ហើមបាន។
ម្យ៉ាងទៀតនោះ អ្នកដែលគេងទល់មុខនឹងកង្ហារផ្ទាល់ប្រហែលជាភ្ញាក់ពីគេងមករឹងសាច់ដុំ ឬរមួលសាច់ដុំបាន។ នេះដោយសារតែកំហាប់នៃខ្យល់ត្រជាក់អាចធ្វើឲ្យសាច់ដុំទៅជាតឹង និងរមួលបាន។ បញ្ហានេះកើតឡើងញឹកញាប់ ជាពិសេសចំពោះអ្នកដែលគេងបែរមុខ និងករកកង្ហារតែម្តង។ បើសិនជាអ្នកភ្ញាក់ពីគេងមករឹងកនៅពេលព្រឹក វាប្រហែលជាដោយសារតែអ្នកបើកកង្ហារចំមុខហើយ៕ ដោយ ៖ សហការី
ចែករំលែកព័តមាននេះ