ADផ្ទាំងផ្សព្វផ្សាយពាណិជ្ជកម្ម

ចន្លោះមួយម៉ោងប៉ុណ្ណោះ! រោងម៉ាស៊ីនកិនស្រូវខ្ទេចខាតអស់ប្រមាណ៦០ម៉ឺនដុល្លារ

3 ឆ្នាំ មុន

កំពង់ចាម
០២ ខែ មិថុនា ឆ្នាំ ២០២០ ម៉ោង ១៦:៥០

ខេត្តត្បូងឃ្មុំ ៖ បើតាមសេចក្តីរាយការណ៍បានឱ្យដឹងថា ភ្លៀងធ្លាក់១មេលាយឡំជាមួយនឹងខ្យល់កន្ត្រាក់បានបោកបក់ជាខ្លាំង បណ្តាលឲ្យរប៉ើកដំបូលនៅបញ្ជាការដ្ឋានសឹករងស្រុកអូររាំងឪ, រលំរោង និងម៉ាស៊ីនកិនស្រូវផងដែរ ហេតុការណ៍នេះកើតឡើងកាលពីម៉ោង៦និង៣០នាទីល្ងាច ថ្ងៃទី០១ ខែមិថុនា ឆ្នាំ២០២០ ស្ថិតនៅក្នុងស្រុកអូរាំងឪ ។ ក្នុងហេតុការណ៍គ្រោះថ្នាក់ធម្មជាតិនេះ មិនមានអ្នកណាម្នាក់គ្រោះថ្នាក់ដល់អាយុជីវិតនោះទេ ចំពោះទំហំទឹកប្រាក់គិតជាការខូចខាតប្រមាណ៦០ម៉ឺនដុល្លារ។

លោកអធិការនគរបាលស្រុកអូរាំងឪ ប្រាប់ឲ្យដឹងថា មុនដំបូង គេបានឃើញមេឃខ្មៅមីរដេរដាសនៅលើអាកាស ក្រោយមកស្រាប់តែបង្ហោះភ្លៀងធ្លាក់ចុះមកលាយឡំដោយខ្យល់កន្ត្រាក់ បោកបក់ជាខ្លាំងក្នុងរង្វង់ពីកន្លះម៉ោងទៅមួយម៉ោង លុះពេលស្ងប់ក្រោយភ្លៀងកម្លាំងប៉ុស្តិ៍រដ្ឋបាល ក៏បានរាយការណ៍ពីការខូចខាតផ្សេងៗ ដោយសារតែគ្រោះធម្មជាតិនេះ។

អធិការនគរបាលស្រុកអូរាំងឪប្រាប់បន្តថា ដំបូលផ្ទះលោកតាំង ម៉េងរ៉ាត់ នៅភូមិអំពិលជុំ ឃុំអំពិលតាពក ដែលជាអភិលបាលរងស្រុកអូររាំងឪ បានរងការខូចខាត និង១កន្លែងទៀត ដួលរលំរោងម៉ាស៊ីនកិនស្រូវ នៅភូមិអំពិលត្បូង ឃុំអំពិលតាពក ស្រុកអូររំងឪ មានម្ចាស់ឈ្មោះ បេ គឹមស៊ាង ភេទប្រុស អាយុ៤១ឆ្នាំ និងប្រពន្ធឈ្មោះ ប៉ូ ឆេងគា អាយុ៣៦ឆ្នាំ ។ ហើយរោងម៉ាស៊ីនរងគ្រោះនោះមានទំហំ៣០X៤៥ម៉ែត្រ ត្រូវបានរងការខូចខាតទាំងស្រុង បើគិតជាទឹកប្រាក់ប្រហែល៦០ម៉ឺនដុល្លារ។

លោកបន្តថា លុះរហូតមកដល់ព្រឹកថ្ងៃទី២ ខែមិថុនានេះ កម្លាំងសមត្ថកិច្ចក៏បានចុះស្រង់ទិន្នន័យនៃការខូចខាតដោយគ្រោះធម្មជាតិខ្យល់កន្ត្រាក់នេះ គឺមិនមានប្រជាពលរដ្ឋណាម្នាក់រងគ្រោះថ្នាក់ដល់អាយុជីវិតនោះទេ។

លោកអភិបាលស្រុកអូររាំងឪបានប្រាប់ឱ្យដឹងដែរថា ចំពោះភ្លៀងខ្យល់កន្ត្រាក់ដែលបានកើតឡើងខាងលើនេះ នៅតាមបណ្ដាឃុំផ្សេងៗទៀតមិនមានរងផលប៉ះពាល់នោះទេ។ហើយរោងម៉ាស៊ីនដែលដួលរលំដោយខ្យល់កន្ត្រាក់ ត្រូវបានម្ចាស់រុះរើ និងរៀបចំដំឡើងជាថ្មីឡើងវិញ។

គួររំលឹកថា ជារៀងរាល់ឆ្នាំឲ្យតែនៅរដូវវស្សាចូលមកដល់ តែងតែមានភ្លៀងខ្យល់កន្ត្រាក់ បណ្ដាលឱ្យមានរប៉ើកដំបូលផ្ទះនៅតាមបណ្ដាឃុំមួយចំនួនក្នុងស្រុកអូរាំងឪ ប៉ុន្តែនៅក្នុងឆ្នាំ២០២០ នេះ គ្រោះធម្មជាតិហាក់បីដូចជាមានសភាពធ្ងន់ធ្ងរជាងឆ្នាំកន្លងទៅ។ (កែសម្រួលដោយ ៖ បុប្ផា)