រាជធានីភ្នំពេញ ៖ អស់រយៈពេល១ខែ នៃការរឹតបន្ដឹងច្បាប់ចរាចរណ៍មានមន្ត្រីនគរបាល៥រូប ត្រូវបានដកតំណែង និងព្យួរការងារ ក្រោយពីពួកគាត់ ល្មើសដោយសារអនុវត្តលើសពីច្បាប់ដែលបានកំណត់ ។ នេះបើតាម អគ្គស្នងការរងនគរបាលជាតិ នាយឧត្តមសេនីយ៍ ហ៊ឹម យ៉ាន ។
ថ្លែងក្នុងសន្និសីទសារព័ត៌មានស្តីពីលទ្ធផលនៃការអនុវត្តន៍ច្បាប់ចរាចរណ៍នាព្រឹកថ្ងៃទី១ មិថុនា នៅអគ្គស្នងការដ្ឋាននគរបាលជាតិ នាយឧត្តមសេនីយ៍ ហ៊ឹម យ៉ាន បានលើកឡើងថា ក្នុងរយៈពេល១ខែ នៃការរឹតបន្តឹងការអនុវត្តច្បាប់ចរាចរណ៍ផ្លូវគោក គិតចាប់ពីថ្ងៃទី១ ដល់៣១ ខែឧសភា ឆ្នាំ២០២០ មានមន្ត្រីនគរបាលចំនួន៥នាក់ ត្រូវបានដកដំណែង និងព្យួរការងារ ដោយសារតែប្រព្រឹត្តល្មើសនឹងច្បាប់ចរាចរណ៍ ។
អគ្គស្នងការដ្ឋាន នគរបាលជាតិ មានប្រសាសន៍បន្តថា រហូតមកដល់ពេលនេះមន្ត្រីនគរបាលមួយចំនួននៅតែមិនបានធ្វើជាគំរូល្អដល់ប្រជាពលរដ្ឋនោះទេ ទាក់ទងនឹងការអនុវត្តនូវច្បាប់ចរាចរណ៍នេះ ហើយមន្ត្រីនគរបាលខ្លះនៅតែបំពាននឹងច្បាប់ ប៉ុន្តែពួកគេទាំងនោះមិនត្រូវបានលើកលែងនោះឡើយ ដោយអគ្គស្នងការនគរបាលបានដកតំណែង និងព្យួរការងារជាបន្តបន្ទាប់ ។
លោកបានគូសបញ្ជាក់យ៉ាងដូច្នេះថា៖«មកទល់ពេលនេះ ក្នុងខែនេះគឺយើងបានដាក់វិន័យ ៥នាក់ រួមមាន
ទីមួយ-ប្រធានការិយាល័យ ចរាចរណ៍ផ្លូវគោកខេត្តកំពង់ធំ ត្រូវបានដកហួតមុខតំណែង និងព្យួរការងារ ។
ទីពីរ-ព្យួរការងារ អធិការរងស្រុកចន្ទ្រា ខេត្តស្វាយរៀង ។ទីបី-ព្យួការងារ មន្ដ្រីនគរបាលចរាចរណ៍ផ្លូវគោក រាជធានីភ្នំពេញបីរូប» ។
ជាមួយគ្នានេះដែរ អគ្គស្នងការរងនគរបាលជាតិ លើកឡើងថា ទោះបីជាមានការធ្លាក់ចុះនូវអត្រា គ្រោះថ្នាក់ចរាចរណ៍ ក្នុងរយៈពេល១ខែ នៃការរឹតបន្ដឹង ច្បាប់ចរាចរណ៍ផ្លូវគោក ក៏រាជរដ្ឋាភិបាល នៅតែមានការព្រួយបារម្ភដដែល ដោយសារតែប្រជាពលរដ្ឋនៅតែបន្តមិនគោរពច្បាប់ ជាពិសេសគឺការមិនពាក់មួកសុវត្ថិភាពនេះតែម្តង ។
អគ្គស្នងការរងបានបន្ថែមទៀតថា យ៉ាងណាក៏ដោយការរឹតបន្តឹងនូវច្បាប់ចរាចរណ៍នេះ នឹងបន្តទៅមុខជានិច្ច ដោយគ្នានការលើកលែងនោះឡើយ ហើយការធ្វើនេះគឺដើម្បីការពារអាយុជីវិត និងទ្រព្យសម្បត្តិរបស់ប្រជាពលរដ្ឋតែប៉ុណ្ណោះ មិនមែនធ្វើឡើង ដើម្បីគាបសង្កត់ប្រជាពលរដ្ឋ ដូចការលើកឡើងរបស់ជនអគតិមួយក្តាប់តូចឡើយ ។
គិតចាប់ពីថ្ងៃទី១-៣១ ខែឧសភា ឆ្នាំ២០២០គឺរយៈពេល១ខែពេញ នៃការរឹតបន្តឹងការអនុវត្តច្បាប់ ស្តីពីចរាចរណ៍ផ្លូវគោកថ្មី នគរបាលចរាចរណ៍ ដោយលទ្ធផលសមត្ថកិច្ចបានឃាត់ និងផាកពិន័យចំពោះយានយន្ត ល្មើសច្បាប់ចំនួន ៤៤.៧៦៥គ្រឿង ក្នុងនោះមានទោចក្រយានយន្ត និងត្រីចក្រយានយន្តចំនួន៣២.៧២៦គ្រឿង ស្មើនឹង២៧% និងរថយន្តគ្រប់ប្រភេទចំនួន១២.០៣៩គ្រឿង ស្មើនឹង២៧% ។
យោងតាមសេចក្តីប្រកាសព័ត៌មាន ស្តីពីលទ្ធផលនៃការរឹតបន្ដឹង អនុវត្តច្បាប់ស្តីពីចរាចរណ៍ផ្លូវគោក របស់គណៈកម្មាធិការសុវត្ថិ ភាពចរាចរណ៍ ផ្លូវគោក(គ.ស.ច.គ)នៅថ្ងៃទី១ មិថុនានេះ បានឲ្យដឹងថា បើប្រៀបធៀបរយៈពេលដូចគ្នានៃខែឧសភា ឆ្នាំ២០១៩ ឃើញថា ស្ថានភាពចរាចរណ៍មានភាពល្អប្រសើរជាងមុន ដោយគ្រោះថ្នាក់ចរាចរណ៍បានថយចុះចំនួន១៣០លើក ស្មើ៣៧% (២១៨/៣៤៨ លើក) អ្នកស្លាប់ថយចុះ៤២នាក់ ស្មើ២៧% (១១៣/១៥៥នាក់) អ្នករបួសថយចុះ១៦២នាក់ ស្មើ៣២% (៣៤២/៥០៤នាក់) ។ ប៉ុន្តែបើប្រៀបធៀបទៅនឹងខែមេសា ឆ្នាំ២០២០នេះ គ្រោះថ្នាក់ចរាចរណ៍ថយចុះ ២៨លើក ស្មើ១១% (២១៨/២៤៦នាក់) អ្នកស្លាប់ថយចុះ ១៤នាក់ ស្មើ១១% (១១៣/១២៧នាក់) អ្នករបួសថយចុះ ២៦នាក់ ស្មើ៧% (៣៤២/២៤៦លើក) ។
គណៈកម្មាធិការជាតិ សុវត្ថិភាពចរាចរណ៍ផ្លូវគោក បានបញ្ជាក់ថា ចំណុចកត់សម្គាល់ នោះគឺ អ្នកប្រើប្រាស់ផ្លូវយ៉ាងច្រើន គោរពនិងអនុវត្តច្បាប់ស្តីពី ចរាចរណ៍ផ្លូវគោកយ៉ាងផុលផុស បើកបរ អធ្យាស្រ័យ និងមានសណ្តាប់ធ្នាប់ល្អ ដែលបានឆ្លុះបញ្ចាំងអំពីចូលរួមលើកកម្ពស់ និងភាពថ្លៃថ្នូររបស់សង្គមជាតិ និងជាប្រភពលើកទឹកចិត្តដល់ កងកម្លាំងអនុវត្តច្បាប់ឲ្យកាន់តែមានស្មារតីខ្ពស់ ក្នុងការបំពេញភារកិច្ចរឹតបន្តឹង ការអនុវត្តច្បាប់ស្តីពីចរាចរណ៍ផ្លូវគោកផងដែរ ។
ជាមួយគ្នានោះដែរគ.ស.ច.គ បានកោតសរសើរ វាយតម្លៃខ្ពស់ ចំពោះកងកម្លាំងនគរបាលចរាចរណ៍ផ្លូវគោក និងមន្ត្រីអនុវត្តច្បាប់នៃស្ថាប័នពាក់ព័ន្ធ ដែលបានខិតខំប្រឹងប្រែងយ៉ាងសកម្ម ក្នុងការបំពេញតួនាទីភារកិច្ចដ៏ថ្លៃថ្លា ជំរុញការរឹតបន្ដឹងអនុវត្តច្បាប់ ស្តីពីចរាចរណ៍ផ្លូវគោក និងការបម្រើសេវាសាធារណៈ ប្រកបដោយភាពថ្លៃថ្នូរ ទន់ភ្លន់សុភាពរាបសារ និងម៉ឺងម៉ាត់ ក្នុងស្មារតីទទួលខុសត្រូវខ្ពស់ ។
គ.ស.ច.គ ក៏បានទទួលយកនូវមតិរិះគន់ក៏ដូចជាសំណូមពរនានា ដើម្បីពិនិត្យឆ្លុះបញ្ចាំង និងកែលម្អទាន់ពេលវេលានូវកង្វះខាតទាំងឡាយ សំដៅធ្វើឱ្យការរឹតបន្ដឹងអនុវត្តច្បាប់ ស្តីពីចរាចរណ៍ផ្លូវគោកកាន់តែ ល្អប្រសើរឡើងថែមទៀត ៕
ចែករំលែកព័តមាននេះ