ប្រទេសអង់គ្លេស ៖ កីឡាករទាំងអស់ក្នុងក្រុមហង្សក្រហម Liverpool បាននាំគ្នាលុតជង្គង់នៅកណ្តាលរង្វង់នៃទីលានប្រកួតក្នុងកីឡដ្ឋាន Anfield របស់ខ្លួន កាលពីថ្ងៃច័ន្ទ ក្នុងន័យបង្ហាញអំពីសាមគ្គីភាពគ្នាជាមួយសកម្មភាពមួយ ដែលត្រូវបានគេហៅថា…
ប្រទេសអង់គ្លេស ៖ កីឡាករទាំងអស់ក្នុងក្រុមហង្សក្រហម Liverpool បាននាំគ្នាលុតជង្គង់នៅកណ្តាលរង្វង់នៃទីលានប្រកួតក្នុងកីឡដ្ឋាន Anfield របស់ខ្លួន កាលពីថ្ងៃច័ន្ទ ក្នុងន័យបង្ហាញអំពីសាមគ្គីភាពគ្នាជាមួយសកម្មភាពមួយ ដែលត្រូវបានគេហៅថា «Black Lives Matter» ។
ក្នុងនោះកីឡាករកំពូលៗរបស់ក្រុមមួយនេះ រួមមានកីឡាករ Virgil van Dijk, James Milner, Joe Gomez, Andrew Robertson និង Trent Alexander-Arnold បានបង្ហោះរូបភាពដូចគ្នារបស់ក្រុម ដោយភ្ជាប់មកជាមួយពាក្យថា «សាមគ្គីភាពគឺជាកម្លាំង» ។
ការបង្ហោះសារលើបណ្តាយទំនាក់ទំនងសង្គម Twitter ដែលបញ្ចូលជាមួយពាក្យ #blacklivesmatter គឺជាសារចុងក្រោយ នៃការគាំទ្រពីសំណាក់កីឡាករបាល់ទាត់ ចំពេលមានភាពវឹកវរនៅសហរដ្ឋអាមេរិក។ បន្ទាប់ពីមរណភាពរបស់បុរសជនជាតិស្បែកខ្មៅលោក George Floyd ដែលបានបាត់បង់ជីវិត អំឡុងពេលត្រូវឃាត់ខ្លួននៅរដ្ឋ Minnesota សហរដ្ឋអាមេរិក ហើយត្រូវមន្ត្រីប៉ូលិសស្បែកសម្នាក់ បានព្យាយាមយកជង្គង់សង្កត់កជាប់ រហូតដល់សន្លប់បាត់បង់ស្មារតី ហើយក្រោយមកក៏បានដាច់ខ្យល់បាត់បង់ជីវិតភ្លាមៗនៅកន្លែងកើតហេតុតែម្តង។
ការតវ៉ាបានផ្ទុះឡើងកាលពីសប្តាហ៍មុន ហើយបណ្តាលឱ្យមានការរីករាលដាលយ៉ាងខ្លាំងនៅទូទាំងទីក្រុងជាច្រើន របស់សហរដ្ឋអាមេរិក ។
បុគ្គលល្បីល្បាញ អត្តពលិក ជាពិសេសកីឡាករបាល់ទាត់ជាច្រើន មានប្រតិកម្មជុំវិញហេតុការណ៍នេះ ដែលត្រូវបានពិភពលោកមើលឃើញថា ជាទង្វើរើសអើងជាតិសាសន៍សម្រាប់ជនជាតិស្បែកខ្មៅ។
ជាក់ស្តែងនៅក្នុងការប្រកួតក្របខណ្ឌ Bundesliga របស់ប្រទេសអាល្លឺម៉ង់ កីឡាករ Jadon Sancho ជាមួយនិង Achraf Hakimi របស់ក្រុម Borussia Dortmund និងខ្សែប្រយុទ្ធ Marcus Thuram របស់ក្រុម Borussia Mönchengladbach រួមជាមួយខ្សែបម្រើ Weston McKennie របស់ក្រុម Schalke 04 បានបង្ហាញសកម្មភាពចូលរួមតវ៉ារកយុត្តិធម៌ ចំពោះការបាត់បង់ជីវិតលោក George Floyd អំឡុងពេលការប្រកួតកាលពីសប្តាហ៍មុន៕ (ដកស្រង់ចេញពី Goal.com)
ចែករំលែកព័តមាននេះ